မြန်မာနိုင်ငံကြက်ခြေနီအသင်း မန္တလေးတိုင်းဒေသကြီးကြက်ခြေနီကြီးကြပ်မှုကော်မတီရုံး အဆောက်အဦသစ် လွှဲပြောင်းပေးအပ်ပွဲအခမ်းအနားကို မေလ(၁၄)ရက်နေ့ နံနက်ပိုင်းက မန္တလေးမြို့ရှိ အဆိုပါအဆောက်အဦသစ်တွင်ကျင်းပခဲ့ပါသည်။

 

အခမ်းအနားသို့ မန္တလေးတိုင်းဒေသကြီးအစိုးရအဖွဲ့ လူမှုရေးရာဝန်ကြီး ဒေါက်တာလှကြွယ်၊ လွှတ်ဝောာ်ကိုယ်စားလှယ်များ၊ မြန်မာနိုင်ငံကြက်ခြေနီအသင်းဥက္ကဌ ပါမောက္ခ ဒေါက်တာမျိုးညွန့်၊ ဒုတိယဥက္ကဌ ဒေါက်တာ တင်တင်လေးနှင့် အလုပ်အမှုဆောင်များ၊ ဒုတိယအထွေထွေအတွင်းရေးမှူး၊ လက်ထောက် အထွေထွေအတွင်းရေးမှူးနှင့် တာဝန်ရှိသူများ၊ တိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ ဒေါက်တာသိန်းထွန်းဆောင်နှင့် ကော်မတီဝင်များ၊ အပြည်ပြည်ဆိုင်ရာကြက်ခြေနီကော်မတီမှ တာဝန်ရှိသူများ၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်းမှ တာဝန်ရှိသူများ၊ မိတ်ဖက်အမျိုးသားကြက်ခြေနီအသင်းများမှတာဝန်ရှိသူများ၊ ဖိတ်ကြားထားသူများ၊ မြို့နယ်ကြက်ခြေနီအသင်းခွဲများမှ တာဝန်ရှိသူများ၊ ကြက်ခြေနီစေတနာလုပ်အားရှင်များ တက်ရောက်ခဲ့ပါသည်။

 

ဦးစွာ တိုင်းဒေသကြီးအစိုးရအဖွဲ့လူမှုရေးရာဝန်ကြီး၊ မြန်မာနိုင်ငံကြက်ခြေနီအသင်းဥက္ကဌ၊ တိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ နှင့် အပြည်ပြည်ဆိုင်ရာကြက်ခြေနီကော်မတီမှ တာဝန်ရှိသူများက မန္တလေးတိုင်းဒေသကြီးကြက်ခြေနီကြီးကြပ်မှုကော်မတီရုံး အဆောက်အဦသစ် ကို ဖဲကြိုးဖြတ်၍ ဖွင့်လှစ်ပေးပြီး အထိမ်းအမှတ် ကမ္ဗည်းမော်ကွန်းကို အမွေးနံ့သာရည်များဖြင့် ပက်ဖြန်းပေးခဲ့ပါသည်။

 

ထို့နောက် အခမ်းအနားကို ဆက်လက်ကျင်းပရာ တိုင်းဒေသကြီးအစိုးရအဖွဲ့ လူမှုရေးဝန်ကြီးက အဖွင့်အမှာစကားပြောကြားခဲ့ပြီး မြန်မာနိုင်ငံကြက်ခြေနီအသင်းဥက္ကဌက အမှာစကားပြောကြား ခဲ့ပါသည်။

ယင်းနောက် အပြည်ပြည်ဆိုင်ရာကြက်ခြေနီကော်မတီမှ ဌာနေကိုယ်စားလှယ် Mr. Arnaud de Baecque က မန္တလေးတိုင်းဒေသကြီး ကြက်ခြေနီ ကြီးကြပ်မှုကော်မတီရုံး အဆောက်အဦသစ် ဆောက်လုပ်လှူဒါန်းရခြင်းနှင့် စပ်လျဉ်း၍ ရှင်းလင်း ပြောကြားခဲ့ပြီး အဆောက်အဦသစ်ကို လွှဲပြောင်းပေးအပ်ရာ အသင်းဥက္ကဌက လက်ခံရယူခဲ့ပြီး ကျေးဇူးတင်စကားပြောကြားကာ ဂုဏ်ပြုမှတ်တမ်းလွှာ ပြန်လည်ပေးအပ်ခဲ့ပါသည်။

မန္တလေးတိုင်းဒေသကြီးကြက်ခြေနီကြီးကြပ်မှုကော်မတီရုံး အဆောက်အဦသစ်သည် အလျား (၄၀)၊ အနံ (၆၀)၊ (၃) ထပ်ခွဲ အဆောက်အဦးဖြစ်ပြီး အဆိုပါ အဆောက်အဦနှင့်မြေ ကို အပြည်ပြည်ဆိုင်ရာကြက်ခြေနီကော်မတီက လှူဒါန်းခဲ့ခြင်းဖြစ်ပါသည်။