မြန်မာနိုင်ငံကြက်ခြေနီအသင်းမှ မန္တလေးတိုင်းဒေသကြီး မိုးကုတ်မြို့နယ်ရှိ အခြေခံပညာကျောင်း (၁၅)ကျောင်းသို့ လက်ဆေးဘေစင်များနှင့် လက်သန့်ဆေးရည်များ လှူဒါန်းခြင်း၊ ဒေါက်တာအောင်မြင့် နှင့် ဦးပါရာကပ်တို့မှမြို့နယ်ကြက်ခြေနီတပ်ဖွဲ့သို့ စကားပြောစက်များ လှူဒါန်းခြင်းနှင့် ဒါနလူငယ်အဖွဲ့မှ လူနာထမ်းစင်လှူဒါန်းခြင်းတို့ကို ဒီဇင်ဘာလ ၁၄ ရက်နေ့က အမှတ်(၁)အခြေခံပညာအထက်တန်းကျောင်း၌ ပြုလုပ်ခဲ့တယ်လို့သိရပါတယ်။ အဆိုပါလှူဒါန်းပွဲသို့ တိုင်းဒေသကြီးလွှတ်တော်ကိုယ်စားလှယ် ဦးစောသောင်းတင်၊ မြို့နယ်အုပ်ချုပ်ရေးမှူး ဦးလှမိုးဦး၊ မြို့နယ်ပညာရေးမှူးဦးရဲမြင့်၊ မြို့နယ်ကြက်ခြေနီတပ်ဖွဲ့မှူး ဒေါ်မြင့်မြင့်ဦးနှင့် မြို့နယ်ကြက်ခြေနီအသင်းခွဲ အမှုဆောင်များ၊ ကျောင်းအုပ်ဆရာကြီး၊ ဆရာမကြီးများ တက်ရောက်ခဲ့ကြပါတယ်။

၂၀၂၀ ပြည့်နှစ်၊ ဒီဇင်ဘာလ ၁၃ ရက်နေ့က တနင်္သာရီတိုင်းဒေသကြီး ကော့သောင်းမြို့နယ် ဖော့သုတ်ကျေးရွာမှာ COVID-19ရောဂါကာကွယ်ထိန်ချုပ်ရေး အသိပညာပေးခြင်း၊ ပိုစတာများကပ်ခြင်းလုပ်ငန်းများကို ကော့သာင်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် စုစုပေါင်း (၄၅) ဦးတို့က ဝိုင်းဝန်းကူညီဆောင်ရွက်ပေးခဲ့ကြတယ်လို့ သိရပါတယ်။ ထို့အတူ ပုလောမြို့နယ်ကြက်ခြေနီအသင်းခွဲမှကြက်ခြေနီတပ်စုမှူး ဦးဝင်းမင်းထွန်း ဦးဆောင်တဲ့ ကြက်ခြေနီစေတနာလုပ်အားရှင်များကလည်း မကျည်းကုန်းကျေးရွာအုပ်စု နတ်အိမ်ကမ်းကျေးရွာမှာ အသိပေးပညာပေးခြင်း၊ ပိုစတာများကပ်ခြင်းနဲ့ နှာခေါင်းစည်းများပေးဝေခြင်းများကို သြားရောက်ပြုလုပ်ခဲ့ကြပါတယ်။

တာချီလိတ်မြို့နယ်ကကြက်ခြေနီစေတနာလုပ်အားရှင်တွေက တာချီလိတ်မြို့နယ် ဆန်ဆိုင်းအခြေခံပညာအထက်တန်းကျောင်း၊ တာလော့အခြေခံပညာအလယ်တန်းကျောင်းခွဲနဲ့ ပုန်းထွန်အခြေခံပညာကျောင်းတွေမှာဖွင့်ထားတဲ့ Quarantine စင်တာတွေမှာ အစားအသောက်စီစဉ်ပေးတာတွေ၊ အတည်ပြုလူနာတွေနေထိုင်ခဲ့တဲ့အခန်းတွေကိုဆေးဖြန်းတာတွေနဲ့ ရောဂါကာကွယ်ဖို့လိုက်နာနေထိုင်ဖို့လိုအပ်တာတွေကို အသိပညာပေးနှိုးဆော်တာတွေကို ဒီဇင်ဘာလ၁၃ရက်နေ့က ဆောင်ရွက်ခဲ့ကြပါတယ်။

မိုင်းပျဉ်းနှင့်မိုင်းခတ်မြို့အဝင်ဂိတ်တွေမှာလည်း ကြက်ခြေနီစေတနာလုပ်အားရှင်တွေက ကိုဗစ်၁၉ရောဂါကူးစက်မှုကိုကာကွယ်ဖို့အတွက် ခရီးသွားမှတ်တမ်းရယူတာတွေ၊ ကိုယ်အပူချိန်တိုင်းပေးတာတွေနဲ့ နှာခေါင်းစည်းဝတ်ဆင်ဖို့အသိပညာပေးတာတွေကို နေ့စဉ်ဆောင်ရွက်လျက်ရှိနေကြပါတယ်။

ဒီဇင်ဘာလ ၁၁ ရက်နေ့က တနင်္သာရီတိုင်းဒေသကြီး မြိတ်မြို့နယ်ကြက်ခြေနီသူနာပြုတပ်ဖွဲ့က ကြက်ခြေနီတပ်ခွဲမှူး ဦးဇေယျာမိုးနဲ့ကြက်ခြေနီစေတနာလုပ်အားရှင် ၆ ဦးတို့ဟာ ဒီဇင်ဘာလ ၁၁ ရက်နေ့က မြိတ်မြို့နယ် ပသောင်းကျေးရွာမှာ COVID- 19‌ေရာဂါကာကွယ်ရေး အသိပညာပေး ဆော်သြခဲ့ကြတယ်။ ပညာပေးပိုစတာကပ်ကြတယ်။ ရောဂါကာကွယ်ရေးအတွက်သုံးဖို့အတွက် လက်ဆေး ဆပ်ပြာဆီဘူးများ ပေးအပ်ခဲ့ကြပါတယ်။

ဒီဇင်ဘာလ ၁၀ ရက်နေ့မှ ၁၁ ရက်နေ့အထိ ကရင်ပြည်နယ်၊ ကော့ကရိတ်မြို့နယ်ရှိ ရပ်ကွက် (၇)ခုမှ ဈေးများ၊ လမ်းဆုံများ၊ လူစည်ကားရာနေရာများတွင် ကိုဗစ်-၁၉ ရောဂါကာကွယ်ရေးအတွက် နှာခေါင်းစည်းတပ်ဆင်စေခြင်းကမ်ပိန်းများပြုလုပ်ခြင်း၊ ကျန်းမာရေးအသိပညာပေးခြင်းတို့ကို ကော့ကရိတ်မြို့နယ်မှ ကြက်ခြေနီစေတနာလုပ်အားရှင်များက ရပ်ကွက်အုပ်ချုပ်ရေးမှူးများ၊ ကျန်းမာရေးဝန်ထမ်းများ၊ မြို့နယ်မီးသတ်တပ်ဖွဲ့တို့နှင့် ပူးပေါင်းဆောင်ရွက်လျှက်ရှိသည်။

ဒီဇင်ဘာလ ၁၁ ရက်နေ့က ပေါင်မြို့နယ်မှ ကြက်ခြေနီစေတနာလုပ်အားရှင်များက မွန်ပြည်နယ်၊ ပေါင်မြို့နယ်ရှိ မြို့မဈေးတွင် ကိုဗစ်-၁၉ ရောဂါကာကွယ်ရေးလုပ်ငန်းများအား ဌာနဆိုင်ရာများမှ တာဝန်ရှိသူများနှင့် ပူးပေါင်းဆောင်ရွက်ခဲ့ကြသည်။

ဒီဇင်ဘာလ ၁၀ရက်နေ့က ပဲခူးတိုင်းဒေသကြီး ဇီးကုန်းအခြေခံပညာအထက်တန်းကျောင်းမှာဖွင့်ထားတဲ့ Quarantine Center မှာ အသွားအလာကန့်သတ်စောင့်ကြည့်ခြင်းခံယူကာ ရောဂါပိုးစစ်ဆေးခဲ့ပြီး ရောဂါပိုးမတွေ့ရှိခဲ့သူများအား နေအိမ်သို့ပြန်လည်ပို့ဆောင်ရာတွင် ဇီးကုန်းမြို့နယ်ကြက်ခြေနီစေတနာလုပ်အားရှင်များက ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းကူညီဆောင်ရွက်ပေးခဲ့ကြပါတယ်။

ဒီဇင်ဘာလ ၁၀ ရက်နေ့က ဧရာဝတီတိုင်းဒေသကြီး မအူပင်မြို့ပြည်သူ့ဆေးရုံကြီး၌ ဆေးကုသမှုခံယူပြီး ကျန်းမာရေးကောင်းမွန်သဖြင့် ဆေးရုံဆင်းခွင့်ရသူ တစ်ဦးကို မော်လမြိုင်ကျွန်းမြို့နယ်ကြက်ခြေနီတပ်ဖွဲ့မှ လူနာတင်ယာဥ်နဲ့ မအူပင်မြို့မှ သွားရောက် ခေါ်ဆောင်ပြီး မော်လမြိုင်ကျွန်းမြို့နေအိမ်အရောက် ကူညီပို့ဆောင် ပေးခဲ့ကြပါတယ်။