Myanmar Red Cross Movement | Myanmar Red Cross Society (MRCS)

17/ Apr/ 2024

Myanmar New Year's Message by Professor Dr. Myo Nyunt, President of the Myanmar Red Cross Society

၁၃၈၆ ခုနှစ် မြန်မာနှစ်သစ် အခါသမယတွင် မြန်မာနိုင်ငံတစ်ဝှမ်းက ကြက်ခြေနီအသင်းဝင်များ၊ တပ်ဖွဲ့ဝင်များ၊ စေတနာလုပ်အားရှင်များနှင့် လေးစားအပ်ပါသော မြန်မာပြည်သူပြည်သားများ အားလုံး စိတ်၏ချမ်းသာခြင်း ကိုယ်၏ကျန်းမာခြင်းနဲ့ ပြည့်စုံပါစေကြောင်း နှုတ်ခွန်းဆက်ရင်း ပျော်ရွှင်စရာ နှစ်သစ်အတွက် ဆုမွန်ကောင်းတောင်းအပ်ပါတယ်။ ယခုလိုနှစ်သစ်ကို စတင်လိုက်သည်နှင့် ပြည်သူပြည်သားများ အားလုံး ဘေးအန္တရာယ် လျော့ပါး သက်သာစေရန် ကျွန်ုပ်တို့၏ ကျွမ်းကျင်မှု၊ စာနာစိတ်ကို အရင်းခံကာ ကြက်ခြေနီရဲ့ လူသားချင်း စာနာထောက်ထားမှု လုပ်ဆောင်ချက်များကို စွမ်းနိုင်သမျှတတ်အားသရွေ့ လုပ်ဆောင်သွားမည် ဖြစ်ကြောင်း ကတိကဝတ်ပြုအပ်ပါတယ်။ ကြက်ခြေနီရဲ့ လူသားချင်းစာနာထောက်ထားမှု လုပ်ငန်းတွေမှာ နေ့နေ့ ညည မအားမလပ် ပါဝင်ဆောင်ရွက်နေကြတဲ့ ကျွန်ုပ်တို့၏ ကြက်ခြေနီစေတနာလုပ်အားရှင်များနှင့် ဝန်ထမ်းများကိုလည်း မယိမ်းယိုင်သော မေတ္တာ ကရုဏာတရားနှင့် ကြက်ခြေနီရဲ့ မွန်မြတ်သော အခြေခံမူများကို ခိုင်မြဲစွာ လိုက်နာပြီး အများအတွက်သာမက မိမိတို့ ကိုယ်တိုင်လည်း ဘေးအန္တရာယ်ကင်းစွာဖြင့် ပြည်သူလူထု၏ လိုအပ်ချက်များကို ဖြည့်ဆည်းပေးဖို့ ကြိုးပမ်းအားထုတ်ပေးကြပါလို့ တွန်းအားပေး တိုက်တွန်းအပ် ပါတယ်။ ဒီလို မင်္ဂလာ ရှိလှတဲ့ နှစ်သစ်ရဲ့ ပထမဦးဆုံးနေ့မှာ လူသားများအားလုံး ဘေးအန္တရာယ် အပေါင်းမှကင်းဝေးကာ ကျန်းမာခြင်း၊ ချမ်းသာခြင်းနှင့် ငြိမ်းချမ်းခြင်းများ ရရှိကြပါစေကြောင်း ဆုမွန်ကောင်းတောင်းမေတ္တာပို့သလိုက်ပါတယ်။ ပါမောက္ခဒေါက်တာမျိုးညွန့် ဥက္ကဌ မြန်မာနိုင်ငံကြက်ခြေနီအသင်း

26/ Mar/ 2024

Myanmar Red Cross Society have provided humanitarian assistance to most needed communities in Mindut Township

တကယ်လိုအပ်တဲ့နေရာကရပ်ရွာလူထုထံ ထိရောက်တဲ့ လူသားချင်းစာနာထောက်ထားမှု အကူအညီတွေပေးနိုင်ဖို့အတွက် ကျွန်ုပ်တို့မြန်မာနိုင်ငံကြက်ခြေနီအသင်းက ကြက်ခြေနီအခြေခံမူတွေနဲ့အညီအစဥ်အမြဲ ကြိုးစား ဆောင်ရွက်လျက်ရှိပါတယ်။

ချင်းပြည်နယ်၊ မင်းတပ်မြို့နယ်၊ ဘောင်ထဲကျေးရွာ၊ ဘော(၃)ရွာ၊ မြို့ဦးဘုန်းတော်ကြီးကျောင်း၊ မက်သဒစ် ဘုရားကျောင်း၊ စိချဲ့ဘုရားကျောင်း၊ ရွှေနှလုံးတော်ဘုရားကျောင်းတို့တွင် ရောက်ရှိနေသော အကြောင်းအမျိုးမျိုးကြောင့် ထိခိုက်ခံစားရသည့် အိမ်ထောင်စု (၁၁၅)စုအတွက် လိုအပ်နေတဲ့အသုံးအဆောင်ပစ္စည်းတွေကို ပြီးခဲ့တဲ့ မတ်လ(၂၁)ရက်နေ့က အဆိုပါအိမ်ထောင်စု များထံ လက်ဝယ်အရောက် အသင်းဌာနချုပ်မှ တာဝန်ရှိသူများနဲ့ ဒေသခံကြက်ခြေနီစေတနာလုပ်အားရှင်များက ဆက်လက်ထောက်ပံ့ ကူညီပေးခဲ့ပါတယ်။

ထောက်ပံ့ကူညီရာမှာ အမျိုးသမီးတစ်ကိုယ်ရည်သုံးပစ္စည်း (၁၁၁)အိတ်၊ အမျိုးသားတစ်ကိုယ်ရည်သုံးပစ္စည်း (၁၁၀)အိတ်၊ ကလေးမီးဖွားသန့်စင်သုံးပစ္စည်း (၁၀)အိတ်၊ ကလေးများအတွက်စိတ်ပိုင်းဆိုင်ရာ ပံ့ပိုးခြင်း အိတ်(၅၆) အိတ်၊ မွေးကင်းစကလေးသုံးပစ္စည်း(၄၀) အိတ်၊ ကလေးဝတ်အင်္ကျီထုပ်(၆၀)ထုပ်၊ ခြင်ထောင်(၁၁၅)၊ စောင်(၁၁၅) ထည်၊ တာပေါ်လင်(၈၃)စ၊ ဆီ(၁လီတာဘူး)(၂၃၀)ဘူး၊ ဆား(၁၁၅)ထုပ်၊ ငါးခြောက်အထုပ်ငယ်(၁၁၅)ထုပ်၊ ပဲ(၁၅၅)ထုပ် တို့ကိုထောက်ပံ့ကူညီခဲ့တာဖြစ်ပါတယ်။

မြန်မာနိုင်ငံကြက်ခြေနီအသင်းအနေဖြင့် မင်းတပ်မြို့နယ်အတွင်း မတ်လ(၂၀)ရက်နေ့မှ (၂၁)ရက်နေ့အထိ အိမ်ထောင်စုပေါင်း(၂၈၃)စုမှ လူဦးရေ(၁၂၆၆)ဦးအတွက် ထောက်ပံ့ကူညီနိုင်ခဲ့ပါတယ်။ ဒီလိုကူညီခဲ့တာက လိုအပ်ချက်တွေအတွက် အပြည့်အဝမဟုတ်သည့်တိုင် သူတို့အတွက်များစွာ အထောက်အကူဖြစ်စေခဲ့ပါတယ်။

ဒါ့အပြင်အကူအညီလိုအပ်တဲ့နေရာတွေအထိအကူအညီတွေ ဆက်လက်ပေးနိုင်ဖို့ကိုလည်း စီစဥ်ဆောင်ရွက်လျက်ရှိပါတယ်။

24/ Mar/ 2024

Myanmar Red Cross Society have provided humanitarian assistance to most needed communities in Mindut Township

တကယ်လိုအပ်တဲ့နေရာကရပ်ရွာလူထုထံ ထိရောက်တဲ့ လူသားချင်းစာနာထောက်ထားမှု အကူအညီတွေပေးနိုင်ဖို့အတွက် ကျွန်ုပ်တို့ မြန်မာနိုင်ငံကြက်ခြေနီအသင်းက ကြက်ခြေနီအခြေခံမူတွေနဲ့အညီ အစဥ်အမြဲကြိုးစားဆောင်ရွက်လျက်ရှိပါတယ်။

ချင်းပြည်နယ်၊ မင်းတပ်မြို့နယ်၊ ပန်းအော့ကျေးရွာ၊ ဖွီကျေးရွာ၊ တောင်ပုလုဘုန်းတော်ကြီးကျောင်းနှင့် Baptist Church တို့မှာရောက်ရှိနေကြတဲ့ အကြောင်းအမျိုးမျိုးကြောင့်ထိခိုက်ခံစားရသည့်အိမ်ထောင်စု (၁၆၈)စုအတွက် လိုအပ်နေတဲ့ အသုံးအဆောင်ပစ္စည်းတွေကို ပြီးခဲ့တဲ့ မတ်လ(၂၀)ရက်နေ့က အဆိုပါအိမ်ထောင်စုများ လက်ဝယ်အရောက် အသင်းဌာနချုပ်မှ တာဝန်ရှိသူများနဲ့ ဒေသခံကြက်ခြေနီစေတနာလုပ်အားရှင်များက သွားရောက်ထောက်ပံ့ကူညီပေးခဲ့ပါတယ်။

ထောက်ပံ့ကူညီရာမှာ အမျိုးသမီးတစ်ကိုယ်ရည်သုံးပစ္စည်း (၁၃၉)အိတ်၊ အမျိုးသားတစ်ကိုယ်ရည်သုံးပစ္စည်း (၁၃၈)အိတ်၊ ကလေးမီးဖွားသန့်စင်သုံးပစ္စည်း (၅)အိတ်၊ ကလေးများအတွက်စိတ်ပိုင်းဆိုင်ရာပံ့ပိုးခြင်းအိတ်(၆၄)အိတ်၊ မွေးကင်းစကလေးသုံးပစ္စည်း(၅၂) အိတ်၊ ကလေးဝတ်အင်္ကျီထုပ်(၆၆)ထုပ်၊ ခြင်ထောင် (၁၆၈)၊ စောင်(၁၆၈)ထည်၊ တာပေါ်လင်(၁၀၇)စ၊ ဆီ(၁လီတာဘူး)၃၃၆ဘူး၊ ဆား(၁၆၈)ထုပ်၊ ငါးခြောက်အထုပ်ငယ်(၁၆၈)ထုပ်၊ ပဲ(၁၆၈)ထုပ် တို့ကိုထောက်ပံ့ကူညီခဲ့တာဖြစ်ပါတယ်။

ဒီလိုကူညီခဲ့တာက သူတို့လိုအပ်ချက်အတွက် အပြည့်အဝမဟုတ်သည့်တိုင်သူတို့အတွက်များစွာ အထောက်အကူ ဖြစ်စေခဲ့ပါတယ်။

ယခုလိုမျိုး လိုအပ်တဲ့နေရာတွေအထိသွားရောက်ပြီး ထိရောက်တဲ့ အကူအညီတွေ ဆက်လက်ပေးနိုင်ဖို့အတွက် လည်း စီစဥ်ဆောင်ရွက်လျက်ရှိပါတယ်။

16/ Feb/ 2024

Professor Dr. Myo Nyunt, the President of the Myanmar Red Cross Society (MRCS), engaged in discussions regarding the humanitarian activities of the Red Cross in Myitkyina, Kachin State, 16th February 2024

မြစ်ကြီးနား၊ ၂၀၂၄ခုနှစ်၊ ဖေဖော်ဝါရီလ(၁၆)ရက်။

မြန်မာနိုင်ငံကြက်ခြေနီအသင်းဥက္ကဌပါမောက္ခဒေါက်တာမျိုးညွန့်သည် ဖေဖော်ဝါရီလ(၁၆)ရက်နေ့ နံနက်ပိုင်းကမြစ်ကြီးနားမြို့ရှိ ကချင်ပြည်နယ် ကြက်ခြေနီကြီးကြပ်မှုကော်မတီရုံးတွင် ပြည်နယ်/ခရိုင် ကြက်ခြေနီကြီးကြပ်မှုကော်မတီဝင်များ၊ မြို့နယ်ကြက်ခြေနီအသင်းခွဲအမှု ဆောင်များ၊ မြို့နယ်ကြက်ခြေနီတပ်ဖွဲ့မှူးများနှင့် ကြက်ခြေနီစေတနာလုပ်အားရှင်များအား တွေ့ဆုံခဲ့ပြီး ပြည်နယ်အတွင်း လူမှုကရုဏာလုပ်ငန်းများ ဆောင်ရွက်နေမှုများနှင့်ပတ်သက်ပြီး ဆွေးနွေးခဲ့ပါသည်။

ထိုသို့တွေ့ဆုံရာတွင် ကချင်ပြည်နယ်ကြက်ခြေနီကြီးကြပ်မှုကော်မတီဥက္ကဌ ဦးဘရန်ဒီးက ပြည်နယ်အတွင်းဆောင်ရွက်လျက်ရှိသည့် ကြက်ခြေနီလူမှုကရုဏာလုပ်ငန်းများကို ရှင်းလင်းတင်ပြခဲ့ပြီး အသင်းအချိန်ပြည့်အလုပ်အမှု ဆောင်ပါမောက္ခဒေါက်တာတင်မောင်လှိုင်နှင့်ဒုတိယအထွေထွေအတွင်းရေးမှူးဒေါက်တာဒေါ်ညိုညိုဝင့်တို့က ဖြည့်စွက်ဆွေးနွေးခဲ့ရာ အသင်းဥက္ကဌ ပါမောက္ခဒေါက်တာမျိုးညွန့်က လုပ်ငန်းလိုအပ်ချက်များကို လမ်းညွှန်ခဲ့ပါသည်။

အဆိုပါ တွေ့ဆုံပွဲသို့ အသင်းဥက္ကဌနှင့်အတူ အချိန်ပြည့်အလုပ်အမှုဆောင်၊ ဒုတိယအထွေထွေအတွင်းရေးမှူးတို့တက်ရောက်ခဲ့ပြီး၊ ကချင်ပြည်နယ်ကြက်ခြေနီကြီးကြပ်မှုကော်မတီဥက္ကဌနှင့်ကော်မတီဝင်များ၊ မြစ်ကြီးနား ၊ မိုးညှင်းခရိုင်များမှ ခရိုင်ကြက်ခြေနီကြီး ကြပ်မှုကော်မတီဥက္ကဌများ၊ ဒုတိယဥက္ကဌများနှင့်ကော်မတီဝင်များ၊ မိုးညှင်း၊ မိုးကောင်း၊ ဖားကန့် ၊ ချီဖွေမြို့နယ်များမှ မြို့နယ်ကြက်ခြေနီအသင်းခွဲဥက္ကဌများ၊ ဒုတိယဥက္ကဌများနှင့်အမှုဆောင်များ၊ မြို့နယ်ကြက်ခြေနီတပ်ဖွဲ့မှူးများနှင့် တာဝန်ရှိသူများ၊ ပြည်နယ်မှ ကြက်ခြေနီလူငယ်ခေါင်းဆောင်များ တက်ရောက်ခဲ့ပါသည်။

ထို့နောက် မြစ်ကြီးနားမြို့နယ်ကြက်ခြေနီအသင်းခွဲသို့ ပြည်နယ်ကြက်ခြေနီကြီးကြပ်မှုကော်မတီပိုင် ကြက်ခြေနီလူနာတင်ယာဉ် လွှဲပြောင်းပေးအပ်ပွဲကို ကျင်းပရာ ပြည်နယ်ကြက်ခြေနီကြီးကြပ်မှု ကော်မတီဥက္ကဌက မြို့နယ်ကြက်ခြေနီအသင်းခွဲဥက္ကဌနှင့် မြို့နယ်ကြက်ခြေနီ တပ်ဖွဲ့မှူးထံသို့ ကြက်ခြေနီလူနာတင်ယာဥ်ကို လွှဲပြောင်းပေးအပ်ခဲ့ပါသည်။

03/ Feb/ 2024

အိတ်ဖွင့်တင်ဒါခေါ်ယူခြင်း

၁။ မြန်မာနိုင်ငံကြက်ခြေနီအသင်း၏ လူမှုကရုဏာလုပ်ငန်းများတွင် အထောက်အပံ့ပေးရန်အတွက် လိုအပ်သော အီလက်ထရောနစ်ပစ္စည်းများကို ၀ယ်ယူနိုင်ရန် အိတ်ဖွင့်တင်ဒါ တင်သွင်းရန် ဖိတ်ခေါ်အပ်ပါသည်။ ၂။ တင်ဒါပုံစံများထုတ်ယူရမည့်အချိန်နှင့်နေ့ရက် - (၅.၂.၂၀၂၄)ရက်၊ နံနက်(၁၀)နာရီမှ ညနေ(၄)နာရီအထိ တင်ဒါပုံစံများနောက်ဆုံးထုတ်ယူရမည့်အချိန်နှင့်နေ့ရက် - (၁၃.၂.၂၀၂၄)ရက်၊ နံနက်(၁၀)နာရီမှ ညနေ(၄)နာရီအထိ တင်ဒါပုံစံများနောက်ဆုံးတင်သွင်းရမည်အချိန်နှင့်နေ့ရက် - (၂၀.၂.၂၀၂၄)ရက်၊ နံနက်(၁၀)နာရီမှ ညနေ(၄)နာရီအထိ တင်ဒါပုံစံများကို ထုတ်ယူရမည့်နေရာ - မြန်မာနိုင်ငံကြက်ခြေနီအသင်း၊ ရန်ကုန်ရုံး၊ ထောက်ပံ့ပို့ဆောင်ရေးနှင့်၀ယ်ယူဖြည့်တင်းရေးဆိုင်ရာစီမံခန့်ခွဲမှုဌာန၊ အမှတ်-၄၂၊ ကမ်းနားလမ်း၊ စတုတ္ထအထပ်၊ ဗိုလ်တထောင်မြို့နယ်၊ ရန်ကုန်မြို့။ ၃။ တင်ဒါစည်းမျဉ်း စည်းကမ်းချက်များနှင့် လုပ်ငန်းများအသေးစိတ်ကို သိရှိရန် ဖုန်းအမှတ် - ၀၁ ၈၃၉၂၀၂၈၊ ၈၃၉၂၀၂၉၊ ၈၃၉၂၀၃၀ (လိုင်းခွဲ-၁၁၉)၊ ဦးကြည်သာအောင်ခြိမ့် - ၀၉ ၈၉၅၃၈၅၇၇၀ သို့ ရုံးချိန်အတွင်း စုံစမ်းနိုင်ပါသည်။ ဝယ်ယူရေးနှင့် ထုခွဲရောင်းချရေးကော်မတီ မြန်မာနိုင်ငံကြက်ခြေနီအသင်း

25/ Jan/ 2024

The Myanmar Red Cross Society has provided financial support to the communities affected by flooding in the Magway Region. This support was provided through a collaborative effort involving the Myanmar Red Cross Society, the International Federation of Red Cross and Red Crescent Societies, and the German Red Cross Society. They transferred over 360 million kyats to 1800 households.

19/ Jan/ 2024

အိတ်ဖွင့်တင်ဒါခေါ်ယူခြင်း

၁။ မြန်မာနိုင်ငံကြက်ခြေနီအသင်းသည် အသင်း၏ Core Structure ပြန်လည်သုံးသပ် ပြင်ဆင်ခြင်းဆိုင်ရာအတိုင်ပင်ခံ (Consultancy Service for Revision of Core Structure of Myanmar Red Cross Society) ငှားရမ်းဆောင်ရွက်ရန်အတွက် အိတ်ဖွင့်တင်ဒါ တင်သွင်းရန် ဖိတ်ခေါ်အပ်ပါသည်။

၂။ တင်ဒါပုံစံများ ထုတ်ယူရမည့်နေ့ရက်နှင့်အချိန် - ၁၂-၁-၂၀၂၄ (ရုံးချိန်အတွင်း)

တင်ဒါပုံစံများနောက်ဆုံးတင်သွင်းရမည့်နေ့ရက်နှင့်အချိန် - ၂၆-၁-၂၀၂၄ (ရုံးချိန်အတွင်း)

တင်ဒါပုံစံများ ထုတ်ယူရမည့်နေရာ - မြန်မာနိုင်ငံကြက်ခြေနီအသင်း (ရန်ကုန်ရုံးခွဲ)၊ အမှတ်(၄၂)၊ စတုတ္ထအထပ်၊ ကမ်းနားလမ်း၊ ဗိုလ်တထောင်မြို့နယ်၊ ရန်ကုန်မြို့။

ဦးသန်းဇော်၊ ဒုတိယ ညွှန်ကြားရေးမှူး

ဖုန်းနံပါတ် - ၀၁ ၈၃၉၂၈~၃၀ (လိုင်းခွဲ-၁၁၉)၊ ၀၉ ၄၂၀၀ ၉၇ ၄၀၉

Email: mrcslogistics@redcross.org.mm

၃။ တင်ဒါစည်းမျဉ်းစည်းကမ်းချက်များနှင့် လုပ်ငန်းအသေးစိတ်အား သိရှိလိုပါက အထက်ပါ ဖုန်းနံပါတ်များသို့ ရုံးချိန်အတွင်း စုံစမ်းမေးမြန်းနိုင်ပါသည်။

ဝယ်ယူရေးနှင့်ထုခွဲရောင်းချရေးကော်မတီ

မြန်မာနိုင်ငံကြက်ခြေနီအသင်း

16/ Jan/ 2024

Prof. Dr. Myo Nyunt, the President of the Myanmar Red Cross Society, attended the opening ceremony of communication training for Red Cross Volunteers from the Ayeyarwaddy Region

ရန်ကုန်၊ ၂၀၂၄ခုနှစ်၊ ဇန်နဝါရီလ(၁၆)ရက်။

မြန်မာနိုင်ငံကြက်ခြေနီအသင်းနှင့် အပြည်ပြည်ဆိုင်ရာကြက်ခြေနီနှင့်လခြမ်းနီအသင်းများ ဖက်ဒရေးရှင်းတို့ ပူးပေါင်းဖွင့်လှစ်သော ဧရာဝတီတိုင်းဒေသကြီးမှ ကြက်ခြေနီစေတနာလုပ်အားရှင်များအတွက် ပြုလုပ်သည့် လူမှုကရုဏာလုပ်ငန်းဆိုင်ရာ ပြန်ကြားဆက်သွယ်ရေးသင်တန်းဖွင့်ပွဲကို ဇန်နဝါရီလ(၁၆)ရက်နေ့ နံနက်ပိုင်းက ရန်ကုန်မြို့တွင် ကျင်းပခဲ့ရာ မြန်မာနိုင်ငံကြက်ခြေနီအသင်းဥက္ကဋ္ဌ ပါမောက္ခဒေါက်တာမျိုးညွန့် တက်ရောက်ခဲ့ပါသည်။

သင်တန်းဖွင့်ပွဲတွင် အသင်းဥက္ကဋ္ဌ ပါမောက္ခဒေါက်တာမျိုးညွန့်က အမှာစကားပြောကြားခဲ့ပြီး အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်းမှ Head of Delegation Ms. Nadia Khoury က နှုတ်ခွန်းဆက်စကား ပြောကြားခဲ့ပါသည်။

သင်တန်းဖွင့်ပွဲသို့ အသင်းဥက္ကဌနှင့်အတူ အချိန်ပြည့်အလုပ်အမှုဆောင်များဖြစ်ကြသော ပါမောက္ခဒေါက်တာဒေါ်မြသူနှင့် ပါမောက္ခဒေါက်တာဒေါ်ရီရီတင်၊ အချိန်ပိုင်းအလုပ်အမှုဆောင် ဦးကျော်မိုးကြည်၊ အထွေထွေအတွင်းရေးမှူး ပါမောက္ခဒေါက်တာထင်ဇော်စိုး၊ ဒုတိယအထွေထွေအတွင်းရေးမှူး ဒေါက်တာဒေါ်ညိုညိုဝင့်၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများ ဖက်ဒရေးရှင်း၊ အပြည်ပြည်ဆိုင်ရာကြက်ခြေနီကော်မတီနှင့် နော်ဝေနိုင်ငံကြက်ခြေနီအသင်းတို့မှ တာဝန်ရှိသူများ၊ အသင်းဌာနချုပ်မှ ညွှန်ကြားရေးမှူးများ၊ ဒုတိယညွှန်ကြားရေးမှူး၊ ဌာနမှူးနှင့် တာဝန်ရှိသူများ၊ သင်တန်းသား/သူများ တက်ရောက်ခဲ့ပါသည်။

ဇန်နဝါရီလ(၁၆)ရက်နေ့မှ ဇန်နဝါရီလ(၁၈)ရက်နေ့အထိ (၃)ရက်တာ ပြုလုပ်လျက်ရှိသော အဆိုပါသင်တန်းသို့ ဧရာဝတီတိုင်းဒေသကြီးရှိ မြို့နယ်များမှ ကြက်ခြေနီစေတနာလုပ်အားရှင်(၂၀)ဦး တက်ရောက်လျက်ရှိပါသည်။

ပြောင်းလဲလာသည့် ခေတ်စနစ်နဲ့အညီ အသင်း၏ ပြန်ကြားဆက်သွယ်ရေး အခန်း ကဏ္ဍနှင့် ကြက်ခြေနီစေတနာလုပ်အားရှင်များ၏ အရည်အသွေး မြှင့်တင်စေရန်၊ နိုင်ငံတစ်ဝန်း ဆောင်ရွက်လျက်ရှိသည့် လူမှုကရုဏာလုပ်ငန်းများကို အပြုသဘော ဆောင်သော ပြန်ကြားဆက်သွယ်ရေး အခန်းကဏ္ဍ တိုးမြှင့်စေရန်၊ ကြက်ခြေနီပုံရိပ်ကောင်းများရရှိစေရန်အတွက်အသင်းဌာနချုပ်နှင့် မြို့နယ်အဆင့်၊ ခရိုင်အဆင့်နှင့် ပြည်နယ်/တိုင်းဒေသကြီး အဆင့်များအကြား အချင်းချင်း ချိတ်ဆက်ကာ ပြန်ကြားဆက်သွယ်ရေး လုပ်ငန်းများကို ပီပြင်စွာ ဆောင်ရွက်နိုင်စေရန်၊အပြုသဘောဆောင်သည့် သတင်းအချက်အလက်များကို ပြန်ကြားဆက်သွယ်ခြင်းဖြင့် အလှူရှင်များ၊ အသင်းဝင်များ တိုးပွားလာစေရန်နှင့် ပူးပေါင်း ပါဝင်လာစေရန် ပြန်ကြားဆက်သွယ်ရေးနည်းလမ်းများမှတဆင့် တစ်ဖက် တစ်လမ်းမှပံ့ပိုးကူညီနိုင်စေရန် စသည့် ရည်ရွယ်ချက်များဖြင့် သင်တန်းကို ဖွင့်လှစ်ခြင်းဖြစ်ပါသည်။

လူမှုကရုဏာလုပ်ငန်းဆိုင်ရာပြန်ကြားဆက်သွယ်ရေးသင်တန်းကိုမွန်ပြည်နယ်၊ မန္တလေးတိုင်းဒေသကြီး၊ ရခိုင်ပြည်နယ်၊ မကွေးတိုင်းဒေသကြီး၊ရှမ်းပြည်နယ်(အရှေ့ပိုင်း)၊ ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးတို့မှ ကြက်ခြေနီစေတနာလုပ်အားရှင်များအတွက် ဖွင့်လှစ်ခဲ့ပြီး ကျန် တိုင်းဒေသကြီးနှင့် ပြည်နယ်များမှ ကြက်ခြေနီစေတနာလုပ်အားရှင်များအတွက်လည်း ဆက်လက် ဖွင့်လှစ်နိုင်ရန် ဆောင်ရွက်လျက်ရှိပါသည်။

13/ Jan/ 2024

Professor Dr. Myo Nyunt, the president of the Myanmar Red Cross Society, attended the ceremony for the delivery of supporting items.

တောင်ကြီး၊ ၂၀၂၄ခုနှစ်၊ဇန်နဝါရီလ(၁၃)ရက်။

မြန်မာနိုင်ငံကြက်ခြေနီအသင်းမှ ရှမ်းပြည်နယ်(တောင်ပိုင်း)ကြက်ခြေနီကြီးကြပ်မှုကော်မတီသို့ ထောက်ပံ့ပစ္စည်းများ ပေးအပ်ပွဲကိုဇန်နဝါရီလ(၁၃)ရက်နေ့ နံနက်ပိုင်းက တောင်ကြီးမြို့ရှိ ပြည်နယ်ကြက်ခြေနီကြီးကြပ်မှုကော်မတီရုံးတွင် ကျင်းပခဲ့ရာ မြန်မာနိုင်ငံကြက်ခြေနီ အသင်းဥက္ကဋ္ဌ ပါမောက္ခဒေါက်တာမျိုးညွန့်တက်ရောက်ခဲ့ပါသည်။

အခမ်းအနားတွင် အသင်းဥက္ကဋ္ဌ ပါမောက္ခဒေါက်တာမျိုးညွန့်က အမှာစကားပြောကြားခဲ့ပြီး ရှမ်းပြည်နယ်(တောင်ပိုင်း) ကြက်ခြေနီကြီးကြပ်မှုကော်မတီ ဥက္ကဋ္ဌ ဦးညီညီက ပြည်နယ်ကြက်ခြေနီ ကြီးကြပ်မှုကော်မတီ၏ ဆောင်ရွက်ချက်များကို ရှင်းလင်းတင်ပြရာ အသင်းဥက္ကဋ္ဌ က လိုအပ်သည့် လမ်းညွှန်မှုများ ပေးခဲ့ပါသည်။

ထို့နောက်အသင်းဥက္ကဋ္ဌ ပါမောက္ခဒေါက်တာမျိုးညွန့်နှင့် ဒုတိယဥက္ကဋ္ဌ ဒေါက်တာဒေါ်တင်တင်လေးတို့က ရပ်စောက်၊ ဆီဆိုင်၊ နမ့်စန်၊ လဲချားမြို့နယ်ကြက်ခြေနီအသင်းခွဲများနှင့် အောင်ပန်းမြို့ကြက်ခြေနီ အသင်းခွဲငယ်တို့အတွက် Ambulance Stretcher Trolley များကို လည်းကောင်း၊ ပြည်နယ်ကြက်ခြေနီကြီးကြပ်မှုကော်မတီနှင့် တောင်ကြီး၊ ရပ်စောက်၊ ဟိုပုံး၊ လဲချားမြို့နယ် ကြက်ခြေနီအသင်းခွဲများအတွက် အရေးပေါ် လူနာတင်ယာဉ်ဝတ်စုံများကို လည်းကောင်း ထောက်ပံ့ပေးအပ်ခဲ့ပြီး ရှမ်းပြည်နယ်(တောင်ပိုင်း)မိုင်းရှူးမြို့နယ်ကြက်ခြေနီအသင်းခွဲ အတွက် (၁၆၀ပေx ၆၀ပေ) မြေကွက် လှူဒါန်းသည့် ဦးစိုင်းဆိုင်လင်မိန်းအား ဂုဏ်ပြုမှတ်တမ်းလွှာကို ပေးအပ်ခဲ့ပါ သည်။ ယင်းနောက် ပြည်နယ်ကြက်ခြေနီကြီးကြပ်မှုကော်မတီ ဒုတိယဥက္ကဋ္ဌ ဒေါက်တာမြင့်သိန်းက ကျေးဇူးတင်စကား ပြောကြားခဲ့ပါသည်။

ထို့နောက် အသင်းချုပ်ဥက္ကဋ္ဌ ပါမောက္ခဒေါက်တာမျိုးညွန့်သည်ရှမ်းပြည်နယ်(မြောက်ပိုင်း) ကွမ်းလုံမြို့နယ်မှ ကြက်ခြေနီစေတနာလုပ်အားရှင်များနှင့် တွေ့ဆုံပြီး အားပေးစကား ပြောကြား ခဲ့ပါသည်။

အဆိုပါအခမ်းအနားသို့ အသင်းဥက္ကဋ္ဌနှင့်အတူ ဒုတိယဥက္ကဋ္ဌ ဒေါက်တာဒေါ်တင်တင်လေး၊ အချိန်ပိုင်အလုပ်အမှုဆောင်ပါမောက္ခဒေါက်တာဒေါ်မာလာဝင်းနှင့် တာဝန်ရှိသူများ၊ ရှမ်းပြည်နယ်(တောင်ပိုင်း) ကြက်ခြေနီကြီးကြပ်မှုကော်မတီ ဥက္ကဋ္ဌနှင့် ကော်မတီဝင်များ၊ တောင်ကြီးခရိုင်ကြက်ခြေနီကြီးကြပ်မှု ကော်မတီ ဥက္ကဋ္ဌ၊ တောင်ကြီး၊ ရပ်စောက်၊ ဟိုပုံး၊ နမ့်စန်၊ လဲချားနှင့် မိုင်းရှူးမြို့နယ် ကြက်ခြေနီတပ်ဖွဲ့မှူးများ၊ အောင်ပန်းမြို့ကြက်ခြေနီ အသင်းခွဲငယ်မှ ကြက်ခြေနီစေတနာလုပ်အားရှင်များ၊ ရှမ်းပြည်နယ်(မြောက်ပိုင်း) ကွမ်းလုံမြို့နယ်မှ ကြက်ခြေနီစေတနာလုပ်အားရှင်များ၊ မိုင်းရှူးမြို့နယ်ကြက်ခြေနီအသင်းခွဲအတွက် Oxygen Plant တည်ဆောက်ရန် မြေနေရာ လှူဒါန်းသည့် အလှူရှင်များ တက်ရောက်ခဲ့ပါသည်။