ကြက်ခြေနီစေတနာစေတနာလုပ်အားရှင်များသည် ရပ်ရွာလူထု ဆင်းရဲဒုက္ခနည်းပါးသက်သာစေရန် ကူညီဆောင်ရွက်ပေးလျက်ရှိနေကြပြီး ဘေးအန္တရာယ်ဆိုင်ရာအရေးပေါ်အခြေအနေများတွင် ရှေ့ဆုံးမှ ကူညီပေးနေကြသူများဖြစ်ပါသည်။

မန္တလေးတိုင်းဒေသကြီး ၊ ပြင်ဦးလွင်ခရိုင် ၊ စဥ့်ကူးမြို့နယ်သို့ ရောက်ရှိလာသော နေရပ်စွန့်ခွာ အိမ်ထောင်စု (၄၈)စု တို့အတွက် မြန်မာနိုင်ငံကြက်ခြေနီအသင်းမှ ထောက်ပံ့သော အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၄၈)စုံ၊ တစ်ကိုယ်ရည်သန့်ရှင်းရေးသုံးပစ္စည်း(၄၈)စုံ၊ စောင်(၄၈)ထည်၊ ခြင်ထောင်(၄၈)လုံး၊ တစ်ကိုယ်ရည်သန့်ရှင်းရေးသုံးပစ္စည်း(တစ်ပတ်စာ) (၄၈)စုံ၊ ပါးစပ်နှာခေါင်းစည်းနှင့် လက်သန့်ဆေးရည်များကို မန္တလေးတိုင်းဒေသကြီး ကြက်ခြေနီ ကြီးကြပ်မှုကော်မတီ ဥက္ကဌ ဒေါက်တာသိန်းထွန်းဆောင်၊ အတွင်းရေးမှူး ဦးကျော်ကျော်နှင့် ကြက်ခြေနီစေတနာလုပ်အားရှင်များက မေလ(၃)ရက်နေ့တွင် သွားရောက် ထောက်ပံ့ပေးအပ်ခဲ့ပါသည်။

ရန်ကုန်၊ မေလ (၃)ရက်။

မြန်မာနိုင်ငံကြက်ခြေနီအသင်း၊ ကျန်းမာရေးဌာနနှင့် လူသားအရင်းအမြစ်ဌာနတို့မှ ပြုလုပ်သည့် လုပ်ငန်းခွင်မိတ်ဆက်သင်တန်း(၄/၂၀၂၂) ဖွင့်ပွဲကို ယနေ့ မေလ (၃)ရက်၊ အင်္ဂါနေ့ နံနက် ၁၀ နာရီတွင် Online Video Conferencing (Zoom) စနစ်ဖြင့် ကျင်းပပြုလုပ်ခဲ့ပါသည်။

အခမ်းအနားအဖွင့်အမှာစကားကို ဒုတိယအထွေထွေအတွင်းရေးမှူး ဒေါက်တာတင်ထွန်းအောင်မှ ယခုသင်တန်းတက်ရောက်လာသည့် ဝန်ထမ်းသစ်များကို ကြိုဆိုပါကြောင်း၊ သင်တန်းတွင် သင်ကြားမည့်ဘာသာရပ်များကို စိတ်ပါဝင်စားစွာတက်ရောက်ဆွေးနွေးခြင်းဖြင့် လုပ်ငန်းများဆောင်ရွက်ရာတွင် ပိုမိုမြန်ဆန်စေရန်အတွက် အထောက်အကူပြုပါကြောင်း ပြောကြားခဲ့ပြီး မြန်မာနိုင်ငံတဝန်းလုံးတွင် ကိုဗစ်၁၉ရောဂါ တုန့်ပြန်ဆောင်ရွက်ရေးလုပ်ငန်းများနှင့် လူမှုကရုဏာလုပ်ငန်းများကို အားသွန်ခွန်စိုက် ဆောင်ရွက်နေကြသော ကြက်ခြေနီစေတနာလုပ်အားရှင်များနှင့် ဝန်ထမ်းများအားလုံးအတွက် အားပေးဂုဏ်ပြုလက်ခုပ်တီးခဲ့ကြပါသည်။

အခမ်းအနားကို လူသားအရင်းအမြစ်ဌာန ညွှန်ကြားရေးမှူးဒေါ်ချမ်းမင်းဦး၊ သင်တန်းနည်းပြများနှင့် သင်တန်းသား/သူ (၃၄)ဦးတို့ တက်ရောက်ခဲ့ကြသည်။ အဆိုပါသင်တန်းကို မေလ (၃)ရက်နေ့မှ (၆)ရက်နေ့အထိ (၄)ရက်တာ ကျင်းပပြုလုပ်သွားမည်ဖြစ်ပါသည်။