ဆိုင်ကလုန်းမုန်တိုင်းမိုခါကြောင့် ရခိုင်ပြည်နယ်နှင့် မကွေးတိုင်းဒေသကြီး မြို့နယ်အချို့တွင် ထိခိုက်ခံစားရမှုများရှိခဲ့ပါသည်။ မကွေးတိုင်းတွင် စလင်းချောင်းရေကြီးရေလျှံမှုဖြစ်ပွားကာ ဆင်ဖြူကျွန်းမြို့နှင့် အနီးတဝိုက်ရှိကျေးရွာများ ထိခိုက်ပျက်စီးမှုများဖြစ်ခဲ့ရပါသည်။
လတ်တလောတွင် မကွေးတိုင်းဒေသကြီး၊ ဆင်ဖြူကျွန်းမြို့ရှိ ရပ်ကွက်(၃)ခုတွင် ထိခိုက်ခံစားရသောအိမ်ထောင်စုများမှ အကူအညီအရေးပေါ်လိုအပ်သော အိမ်ထောင်စု(၈၇)စုအား အရေးပေါ်ကယ်ဆယ်ရေးသုံးပစ္စည်းများဖြစ်သည့် တစ်ကိုယ်ရည်သန့်ရှင်းရေးသုံးပစ္စည်း(တစ်လစာ)၊ မိသားစုသုံးပစ္စည်း၊ အိမ်ဆောက်အထောက်အကူပြုပစ္စည်း၊ ရေပုံးတို့ကို မေလ (၁၆) ရက်နေ့က သွားရောက် ထောက်ပံ့ကူညီမှုများပြုလုပ်ခဲ့ကြသည်။
ဆက်လက်ပြီး ထိခိုက်ခံစားရသောအိမ်ထောင်စုများအား အထိရောက်ဆုံးသောအကူအညီများပေးအပ်နိုင်ရန်ကြိုးစားဆာင်ရွက်လျက်ရှိပါသည်။
မြန်မာနိုင်ငံကြက်ခြေနီအသင်းသည် သဘာဝဘေးအန္တရာယ်များဖြစ်သည့် ရေကြီးခြင်း၊ မီးလောင်ခြင်း၊ မြေပြိုခြင်း၊ မုန်တိုင်းကျရောက်ခြင်း၊ ကမ္ဘာ့ကပ်ရောဂါ ကိုဗစ်-၁၉ ရောဂါ ကာကွယ်ခြင်းများ၊ ပဋိပက္ခများ၊ တိုက်ပွဲများနှင့် အကြောင်းအမျိုးမျိုးကြောင့် နေရပ်စွန့်ခွာခဲ့ရသူများနှင့် ထိခိုက်ခံစားရသူများအား ခွဲခြားခြင်းမရှိ လူသားချင်း စာနာ ထောက်ထားသည့် စိတ်ဓါတ်ဖြင့် ကြက်ခြေနီအခြေခံမူ(၇)ချက်နှင့်အညီ ကူညီ ထောက်ပံ့ ပေးလျှက်ရှိပါသည်။
