14/ Aug/ 2020
13/ Aug/ 2020
ကျောက်မဲ၊ ဩဂုတ် ၁၃
ရှမ်းပြည်နယ်၊ မြောက်ပိုင်း၊ ကျောက်မဲမြို့နယ်၊ နမ့်မန်းယာယီရွှေ့ပြောင်းကျေးရွာရှိ ရွာသူ/ရွာသားများအား မိုင်းနှင့် စစ်လက်နက်အကြွင်းအကျန်အန္တရာယ်အသိ ပညာပေးခြင်းကို ကျောက်မဲမြို့နယ်ကြက်ခြေနီအသင်းခွဲက ကျေးရွာအရောက်သွားရောက်လုပ်ဆောင်ခဲ့ပါသည်။
၂၀၂၀ပြည့်နှစ်၊ ဩဂုတ်လ ၁၃ရက်နေ့က ကျောက်မဲမြို့နယ်ကြက်ခြေနီအသင်းခွဲမှ မြို့နယ်တပ်ဖွဲ့မှူးဦးဖြိုးပြည့်ကျော်နှင့် ကြက်ခြေနီစေတနာလုပ်အားရှင် ၂ဦးတို့က ရွာသူ/ရွာသူများနှင့် ကလေးငယ်များ စုစုပေါင်း ၃၀ဦးခန့်အား မိုင်းအန္တရာယ်အသိပညာပေးခြင်းများဟောပြောခြင်းနှင့် ကလေးငယ်များအား ပုံစွဲစာအုပ်နှင့် ရောင်စုံဆေးခြယ်မှင် များပေးခြင်းတို့ကို ဆောင်ရွက်ခဲ့ပါသည်။
13/ Aug/ 2020
မိုးကုတ်၊ ဩဂုတ် ၁၃
မန္တလေးတိုင်းဒေသကြီး၊ မိုးကုတ်မြို့နယ်၊ဓာတ်တော် ပျားစွဲလူးတွင်းပြိုကျမှုကြောင့် ကျောက်ရှာဖွေနေသူ ၃ဦးမှာ ပိတ်မိမှုဖြစ်စဉ် ၂၀၂၀ပြည့်နှစ်၊ ဩဂုတ်လ ၁၁ရက်နေ့က ဖြစ်ပွားခဲ့သည်။
အဆိုပါဖြစ်စဉ်တွင် မိုးကုတ်မြို့နယ်ကြက်ခြေနီအသင်းခွဲမှ ဒုတိယတပ်ခွဲမှူးဦးကျော်ကျော်ထွန်းဦးဆောင်သော ကြက်ခြေနီစေတနာလုပ်အားရှင်ကျား၁၆ဦး၊ မ၄ဦးတို့က မြို့နယ်အုပ်ချုပ်ရေးမှူးဦးလှမျိုးဦး၊ ဌာနဆိုင်ရာများ၊မြို့နယ်မီးသတ်တပ်ဖွဲ့၊ Rescue တပ်ဖွဲ့၊ လူမှုကူညီရေး အသင်းအဖွဲ့များနှင့် ပူးပေါင်းကာ တွင်းအနက်ပေ ၁၃၀၀ထိဆင်းကာ ရှာဖွေကယ်ဆယ်မှုများပြုလုပ်ခဲ့သည်။
တွင်းပြိုကျမှုကြောင့် သေဆုံးခဲ့သူ၁ဦးရုပ်အလောင်းအား အပြင်သို့ ခက်ခက်ခဲခဲထုတ်ယူကာ မိုးကုတ်မြို့ပြည်သူ့ဆေးရုံသို့ မြတ်စေတနာလူမှုကူညီရေးအသင်း ကားဖြင့် ပို့ဆောင်ခဲ့သည်။
အလားတူ ဩဂုတ်လ ၁၂ရက်နေ့ တွင်းပြိုကျမှုဖြစ်စဉ်အတွင်း ၂ဦးသေဆုံး၊ တစ်ဦးပေါင်ကျိုး ဒဏ်ရာရရှိခဲ့ရာ မိုးကုတ်မြို့နယ် ကြက်ခြေနီအသင်းခွဲကကြက်ခြေနီစေတနာလုပ်အားရှင် များက ဆေးရုံသို့ ပို့ဆောင်ပေးခြင်းကို ဌာနဆိုင်ရာမှတာဝန်ရှိသူများ၊ မြို့နယ်မီးသတ်တပ်ဖွဲ့၊Rescue တပ်ဖွဲ့ လူမှုကူညီရေးအသင်းများနှင့် ပူးပေါင်းဆောင်ရွက်ခဲ့ပါသည်။
12/ Aug/ 2020
မိုးကောင်း၊ သြဂုတ် ၁၂
၂၀၂၀ပြည့်နှစ် ဩဂုတ်လ ၁၂ရက်နေ့က မိုးကောင်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ကချင်ပြည်နယ်၊ မိုးကောင်းမြို့နယ်ရှိ နန့်ရင်းရပ်ကွက်တွင် ရေဘေးအန္တရာယ်အသိပညာပေးခြင်းနှင့် အရေးပေါ်အခြေအနေများကြုံလာပါက လိုက်နာဆောင်ရွက်ရမည့်အချက်များအား အသိပညာပေးဟောပြောခြင်း၊ ကယ်ဆယ်ရေးလုပ်ငန်းများအား လက်တွေ့သရုပ်ပြသသည့် ရေဘေးအန္တရာယ်အသိပညာပေးဟောပြောပွဲနှင့် သဏ္ဍန်တူဇာတ်တိုက်လေ့ကျင်သရုပ်ပြပွဲကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြပါသည်။
12/ Aug/ 2020
ဖားကန့်၊ ဩဂုတ် ၁၂
၂၀၂၀ပြည့်နှစ် ဩဂုတ်လ ၁၁ရက်နေ့က ကချင်ပြည်နယ်၊ ဖားကန့်မြို့နယ်တွင် မိုးသည်းထန်စွာရွာသွန်းမှုကြောင့် ဖားကန့်မြို့ပေါ်ရှိ ရပ်ကွက်အချို့နှင့် လမ်းမကြီးပေါ်တွင် ရေဖုံးလွှမ်းခြင်းများဖြစ်ပွားခဲသဖြင့် ရွှံ့နွံနှင့်အမှိုက်များ ကျန်နေရစ်ခဲ့ရာ သန့်ရှင်းရေးလုပ်ငန်းများဆောင်ရွာရာတွင် ဖားကန့်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များမှ ဌာနဆိုင်ရာများမှတာဝန်ရှိသူများနှင့်အတူ ပူးပေါင်းကူညီဆောင်ရွက်ပေးခဲ့ကြသည်။
10/ Aug/ 2020
လွိုင်ကော်၊ ဩဂုတ် ၁၀
၂၀၂၀ပြည့်နှစ် ဩဂုတ်လ ၁၀ရက်နေ့က ကယားပြည်နယ်ပြည်သူ့ဆေးရုံကြီးတွင် အရေးပေါ်သွေးလိုအပ်နေသော လူနာတစ်ဦးအတွက် လွိုင်ကော်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်တစ်ဦးမှ သွေးတစ်လုံးလှူဒါန်းပေးခဲ့ကြောင်း သိရှိရပါသည်။
09/ Aug/ 2020
မုဒုံ၊ ဩဂုတ်လ ၉
မုဒုံမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များ ပြုလုပ်ထားသော ခြေနင်းလက်ဆေးစင်နှင့် ခြေနင်းအမှိုက်ပုံးများကို ကော့ခလွယ်ကျေးရွာရှိ အခြေခံပညာမူလတန်းလွန်ကျောင်းမှ ဆရာ/ဆရာမများနှင့် ကျောင်းသား/သူများ အသုံးပြုနိုင်ရန် မုဒုံမြို့နယ်ကြက်ခြေနီအသင်းခွဲမှ ဒုတိယမြို့နယ်တပ်ဖွဲ့မှူးဦးဆောင်သော ကြက်ခြေနီစေတနာ လုပ်အားရှင်များက ၂၀၂၀ပြည့်နှစ်၊ ဩဂုတ်လ ၉ရက်နေ့က သွားရောက်ထောက်ပံ့ခဲ့ပါသည်။
09/ Aug/ 2020
ညောင်တုန်း၊ ဩဂုတ် ၉
မြန်မာနိုင်ငံကြက်ခြေနီအသင်း Red Ready စီမံချက်နှင့် ဧရာဝတီတိုင်းဒေသကြီး ညောင်တုန်းမြို့နယ်ကြက်ခြေနီအသင်းခွဲတို့ ပူးပေါင်းဖွင့်လှစ်သော ရှေးဦးပြုစုခြင်း(အခြေခံအဆင့်) သင်တန်း ဆင်းပွဲအခမ်းအနားကို ၂၀၂၀ပြည့်နှစ်၊ ဩဂုတ်လ ၉ ရက်နေ့က ညောင်တုန်းမြို့ အထက(၂)၌ ကျင်းပခဲ့ရာ မြန်မာနိုင်ငံကြက်ခြေနီအသင်း ဥက္ကဌ ဒေါက်တာမောင်မောင်မြင့် တက်ရောက်ခဲ့ပါသည်။
အခမ်းအနားသို့ အသင်းဥက္ကဌ နှင့်အတူ အထွေထွေအတွင်းရေးမှူး ပါမောက္ခ ဒေါက်တာ ထင်ဇော်စိုး၊ တိုင်းဒေသကြီး ကြက်ခြေနီကြီးကြပ်မှုကော်မတီဥက္ကဌဦးမန်းကြည်ရွှင်၊ ရှေးဦးပြုစုခြင်းနှင့်ဘေးအန္တရာယ် ကင်းရှင်းရေးဌာန ဒုတိယညွှန်ကြားရေးမှူး ဦးမြတ်မင်းနိုင်၊ မအူပင်ခရိုင် ကြက်ခြေနီကြီးကြပ်မှုကော်မတီ ဥက္ကဌ ၊ ခရိုင်ကြက်ခြေနီ တပ်ဖွဲ့မှူး၊ မြို့နယ်ကြက်ခြေနီအသင်းခွဲ ဥက္ကဌ၊ မြို့နယ်ကြက်ခြေနီ တပ်ဖွဲ့မှူး၊ မြို့နယ်ပညာရေးမှူး၊ ဆရာ/ဆရာမများ၊ ဌာနဆိုင်ရာတာဝန်ရှိသူများ၊ ကြက်ခြေနီ စေတနာလုပ်အားရှင်များ၊ သင်တန်းသား/ သင်တန်းသူများ တက်ရောက် ခဲ့ကြပါသည်။
ရှေးဦးစွာ အသင်းဥက္ကဌ ဒေါက်တာမောင်မောင်မြင့်က သင်တန်းဆင်း အမှာစကားပြောကြားပါသည်။
ထို့နောက် မြိုနယ်ပညာရေးမှူး ဦအေးထွန်းက အမှာစကားပြောကြားခဲ့ပြီး မြို့နယ်ကြက်ခြေနီအသင်းခွဲ ဥက္ကဌ ဦးသန်းမြင့်က အသင်းခွဲ၏ ဆောင်ရွက်မှုများကို တင်ပြခဲ့ပါသည်။
ယင်းနောက် အသင်းဥက္ကဌက သင်တန်းတွင်ထူးချွန်ဆု ရရှိသူများအားလည်း
ကောင်း၊ တိုင်းဒေသကြီးကြက်ခြေနီ ကြီးကြပ်မှုကော်မတီဥက္ကဌက သင်တန်းဆင်း လက်မှတ်များအားလည်းကောင်း ပေးအပ်ချီးမြှင့် ခဲ့ကြပါသည်။
ထို့နောက် မြို့နယ်ကြက်ခြေနီအသင်းခွဲ အတွက် လူနာတင်ယာဉ်ဝယ်ယူရန် မြို့နယ်ကြက်ခြေနီတပ်ဖွဲ့မှူး ဦးဝင်းမြင့်က အလှူငွေကို လှူဒါန်းခဲ့ပါသည်။
အဆိုပါ ရှေးဦးပြုစုခြင်း(အခြေခံအဆင့်)သင်တန်းသို့ အလယ်တန်း/အထက်တန်း ဆရာ/ဆရာမ ၃၁ ဦး တက်ရောက်ခဲ့ကြပါသည်။
09/ Aug/ 2020
မရမ်းကုန်း၊ ဩဂုတ် ၉
ရန်ကုန်တိုင်းဒေသကြီး၊ မရမ်းကုန်းမြို့နယ်၊အမှတ်(၄)အခြေခံပညာအထက်တန်းကျောင်းတွင် သွေးလွန်တုပ်ကွေးရောဂါကာကွယ်ရေးအဖြစ် ခြင်များမခိုအောင်းနိုင်စေရန် မြက်ရိတ်စက်ဖြင့် ချုံနွယ်ရှင်းလင်းပေးခြင်း၊ ကျောင်းပတ်ဝန်းကျင်တွင် အမှိုက်များမရှိရန်ရှင်းလင်းခြင်း၊ ခြင်ဆေးဖြန်းခြင်းများအပြင် အသိပညာပေးဗွီနိုင်းများကပ်ခြင်းတို့ကို မရမ်းကုန်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များနှင့် ကျောင်းကြက်ခြေနီကျောင်းသူ/သားများ စုစုပေါင်းအင်အား(၂၀)ဦးဖြင့်၂၀၂၀ပြည့်နှစ်၊ ဩဂုတ်လ ၉ရက်က ဆောင်ရွက်ခဲ့ပါသည်။