ဒီဇင်ဘာလ ၉ ရက်နေ့က ကျေးသီးမြို့နယ်မှ ကြက်ခြေနီတပ်ဖွဲ့မှူး ဦးစိုင်းနောင့်နှင့် ကြက်ခြေနီစေတနာလုပ်အားရှင်များက ဌာနဆိုင်ရာများမှ တာဝန်ရှိသူများနှင့် ပူးပေါင်း၍ ကိုဗစ်-၁၉ ရောဂါကာကွယ်ရေးအတွက် ကျေးသီးမြို့နယ်စည်ပင်သာယာဈေးနှင့် မြို့ဝင်ဂိတ်များတွင် နှာခေါင်းစည်းများနှင့် ရေမလိုလက်သန့်ဆေးရည်များကိုအခမဲ့ပေးဝေခဲ့ကြသည်။

ဒီဇင်ဘာလ ၉ ရက်နေ့က ရပ်စောက်မြို့နယ်မှ ကြက်ခြေနီတပ်ဖွဲ့မှူး ဦးကျော်မြင့်သိန်းနှင့် ကြက်ခြေနီစေတနာလုပ်အားရှင်များက မြို့နယ်အထွေထွေအုပ်ချုပ်ရေးဦးစီးဌာနမှ တာဝန်ရှိသူများနှင့် ပူးပေါင်း၍ ကိုဗစ်-၁၉ ရောဂါကာကွယ်ရေးအတွက် ရပ်စောက်မြို့၊ မြို့ဦးရပ်ကွက်အုပ်ချုပ်ရေးမှူးရုံးရှေ့တွင် နှာခေါင်းစည်းများ အခမဲ့ဖြန့်ဝေခြင်းနှင့် ရေမလိုလက်သန့်ဆေးများပေးဝေခြင်းတို့ကို ဆောင်ရွက်ခဲ့ကြသည်။

မန္တလေးတိုင်းဒေသကြီး ပြည်သူ့ကျန်းမာရေးနှင့်ကုသ‌ေရးဦးစီးဌာန၏ ညွှန်ကြားချက်အရ မန္တလေးခရိုင်အတွင်း ပိုးတွေ့လူနာများသော မြို့နယ်များသို့ COVID-19ရောဂါကာကွယ်ရေး ညွှန်ကြားချက်များကိုမြို့နယ်ကြက်ခြေနီအသင်းခွဲများမှ ကြက်ခြေနီစေတနာလုပ်အားရှင်များက အသံချဲ့စက်ဖြင့် လှည့်လည်ကာ အသိပေးနှိုးဆော်လျက်ရှိပါတယ်။

ခရမ်းမြို့နယ်ကကြက်ခြေနီစေတနာလုပ်အားရှင်များကလည်း ရန်ကုန်တိုင်းဒေသကြီး၊ ခရမ်းမြို့နယ်မှာရှိတဲ့ အသွားအလာကန့်သတ်စောင့်ကြည့်ရေးစခန်းတွေမှာ ကျန်းမာရေးဝန်ထမ်းတွေနဲ့အတူ ပူပေါင်းကူညီပေးနေကြပြီး မြို့အဝင်အထွက်ဂိတ်တွေနဲ့ မြို့တွင်းလူအများသွားလာနိုင်တဲ့နေရာတွေမှာ ရောဂါကာကွယ်ရေးအသိပညာပေးတာတွေ၊ နှာခေါင်းစည်းအခမဲ့ပေးဝေတာတွေကို ဆောင်ရွက်နေကြပါတယ်။ ထို့အပြင် ဒီဇင်ဘာလ ၈ရက်နေ့က ကွမ်းလျှားရှည်ကျေးရွာက ပိုးတွေ့လူနာနေအိမ်အနီးဝန်းကျင်ကို ပိုးသတ်ဆေးဖျန်းရာမှာလည်း ကူညီဆောင်ရွက်ပေးခဲ့ကြပါတယ်။

ဒီဇင်ဘာလ ၈ရက်နေ့က မိုင်းယောင်းမြို့နယ်ကြက်ခြေနီစေတနာလုပ်အားရှင်တွေဟာ Facility Quarantine Center ကို ရောက်ရှိလာသူများရဲ့ နှာခေါင်းနဲ့အာခေါင်တို့ဖတ်ယူပြီး သက်ဆိုင်ရာဌာများသို့ စစ်ဆေးရန်ပို့ဆောင်ပေးရာတွင် ကျန်းမာရေးဝန်ထမ်းများကို ကူညီဆောင်ရွက်ပေးခဲ့ကြပါတယ်။

ဒီဇင်ဘာလ ၈ ရက်နေ့က မန္တလေးတိုင်းဒေသကြီးပြည်သူ့ကျန်းမာရေးနှင့်ကုသရေးဦးစီးဌာနမှူးရုံးမှာ တိုင်းဒေသကြီးကျန်းမာရေးဦးစီးဌာနမှူး ဒေါက်တာသန်းသန်းမြင့်နဲ့ တိုင်း‌ေဒသကြီးကြက်ခြေနီတပ်ဖွဲ့တိုင်းတပ်ဖွဲ့မှူး၊ မန္တလေးခရိုင်မှမြို့နယ်ကြက်ခြေနီတပ်ဖွဲ့မှူးများ တွေ့ဆုံကာ COVID-19 ရောဂါကာကွယ်ရေးနှင့်ပတ်သက်ပြီး ဆွေးနွေးခဲ့ကြတယ်လို့ သိရပါတယ်။ မန္တလေးခရိုင်အတွင်း COVID-19ရောဂါကူးစက်မှု လျော့နည်း‌ကျဆင်း‌ေစရေးနှင့် ကာကွယ်ရေးလုပ်ငန်းများ ပိုမိုအရှိန်မြှင့်လုပ်ဆောင်နိုင်ရန်၊ ကြက်ခြေနီ‌ေစတနာလုပ်အားရှင်များမှ မြို့နယ်နှင့် ရပ်ကွက်များအတွင်း လှုံ့ဆော်ရေးလုပ်ငန်းများ ဆောင်ရွက်ရန် ဆွေးနွေးခဲ့ကြပါတယ်။ မြို့နယ်များအလိုက် COVID-19ရောဂါကာကွယ်ရေးလုပ်ငန်းများကို ပိုမိုအရှိန်အဟုန်မြှင့် ဆောင်ရွက်ရာတွင် မြို့နယ်ကြက်ခြေနီတပ်ဖွဲ့မှူးများ ဦးဆောင်‌ေသာ မြို့နယ်များမှ ကြက်ခြေနီစေတနာလုပ်အားရှင်များက အဆက်မပြတ် ပူးပေါင်းကူညီဆောင်ရွက်နေကြပါတယ်။

ချောင်းဆုံမြို့နယ်မှ ကြက်ခြေနီစေတနာလုပ်အားရှင်များက ချောင်းဆုံမြို့နယ်၊ ကွမ်သဲကျေးရွာရှိ အသွားအလာကန့်သတ်စောင့်ကြည့်ရေးစခန်းတွင် အသွားအလာကန့်သတ်စောင့်ကြည့်မှုခံယူနေကြသူများအား စိတ်ပိုင်းဆိုင်ရာအားပေးကူညီပေးခြင်း၊ အစားအသောက်များပေးဝေခြင်း၊ ရောဂါကာကွယ်ရေးအတွက် ကျန်းမာရေးစောင့်ရှောက်မှုပေးခြင်း၊ လိုက်နာဆောင်ရွက်ရမည်များအား အသိပေးနှိုးဆော်ခြင်းနှင့် ပတ်ဝန်းကျင်သန့်ရှင်းရေးတို့ကို နေ့စဉ်ဆောင်ရွက်ပေးလျက်ရှိကြပါသည်။ ထို့အပြင် အသွားအလာကန့်သတ်စောင့်ကြည့်မှုခံယူပြီး သတ်မှတ်ရက်ပြည့်မြောက်၍ နေအိမ်သို့ပြန်ရာတွင် အခက်အခဲ ရှိသူများအား ချောင်းဆုံမြို့နယ်ကြက်ခြေနီအသင်းခွဲမှ လူနာတင်ယာဥ်ဖြင့် ၎င်းတို့၏နေအိမ်သို့ အခမဲ့ပို့ဆောင်ပေးခဲ့ကြသည်။

မိုင်းခတ်မြို့နယ်ကကြက်ခြေနီစေတနာလုပ်အားရှင်တွေကတော့ ဒီဇင်ဘာလ၇ရက်နေ့မှာ ရှမ်းပြည်နယ်အရှေ့ပိုင်း၊ မိုင်းခတ်မြို့မဈေးကို ဈေးဝယ်လာရောက်ကြတဲ့ မိဘပြည်သူများအတွက် နှာခေါင်းစည်းများအခမဲ့ပေးဝေခဲ့ကာ အပြင်ထွက်တဲ့အခါတိုင်းနှာခေါင်းစည်းဝတ်ဆင်အသုံးပြုဖို့ လိုအပ်ကြောင်းကို ဌာနဆိုင်ရာများမှတာဝန်ရှိသူများနဲ့အတူ ပူးပေါင်း နှိုးဆော်ခဲ့ကြပါတယ်။

၂၀၂၀ပြည့်နှစ် ဒီဇင်ဘာလ ၇ရက်နေ့က ရမ်းဗြဲမြို့နယ်၊ ပေါက်တောမြို့နယ်နှင့် မြောက်ဦးမြို့နယ်များ မှ ကြက်ခြေနီစေတနာလုပ်အားရှင်များသည်သက်ဆိုင်ရာမြို့နယ်အသီးသီးတွင် ရောဂါကာကွယ်ရေးအသိပညာပေးခြင်း၊ နှာခေါင်းစည်းဝတ်ဆင်ရန်နှိုးဆော်ခြင်း၊ နှာခေါင်းစည်းများအခမဲ့ပေးဝေခြင်းတို့ကို ဆောင်ရွက်ခဲ့ကြသည်။ ထို့ပြင် မောင်တောမြို့မှ ကြက်ခြေနီစေတနာ့လုပ်ရှင်များကလည်း မောင်တောမြို့နယ်ရှိ နယ်ခြားစောင့်ရဲတပ်ရင်း အမှတ်(၅)တွင် ကိုဗစ် ရောဂါကာကွယ်ရေးအတွက် ပိုးသတ်ဆေးဖြန်းခြင်းလုပ်ငန်းများကို မိတ်ဖက်လူမှုရေးအသင်းအဖွဲ့များ၊ ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။