ထို့ပြင် ၂၄နာရီ လူနာတင်ယာဉ်ဝန်ဆောင်မှုကိုလည်း အရှိန်အဟုန်မြှင့်လာကာ လူနာတင်ယာဉ်လိုအပ်သူတွေကို အချိန်နဲ့တပြေးညီကူညီပေးနေကြပြီး ရှေးဦးပြုစုခြင်းအကူအညီတွေကိုလည်း ကျွမ်းကျင်သူ ကြက်ခြေနီစေတနာလုပ်အားရှင်များက ကူညီပံ့ပိုးပေးလျက်ရှိကြပါတယ်။

COVID-19 ကာကွယ်ဆေးထိုးလုပ်ငန်းတွေမှာလည်း ဆေးထိုးရန်လာရောက်ကြသူတွေကို တွဲကူပေးခြင်း၊ စိတ်ပိုင်းဆိုင်ရာအားပေးကူညီခြင်း၊ စာရင်းမှတ်တမ်းများပေးသွင်းပေးခြင်းနဲ့ အခြားလိုအပ်တဲ့ အကူအညီတွေဆောင်ရွက်ပေးနေကြပါတယ်။

ကြက်ခြေနီ အခြေခံမူ(၇)ချက်နဲ့အညီ အများအကျိုးအတွက် တာဝန်ထမ်းဆောင်ပေးနေကြတဲ့ ကျွန်ုပ်တို့ရဲ့ ကြက်ခြေနီစေတနာလုပ်အားရှင်တွေက မြန်မာနိုင်ငံကြက်ခြေနီအသင်းရဲ့ ရည်ရွယ်ချက်ဖြစ်တဲ့ ရပ်ရွာလူထုခံစားနေရတဲ့ဆင်းရဲဒုက္ခလျော့ပါးသက်သာစေရန်အတွက် သာမန်အခြေအနေတွေမှာသာမကဘဲ အရေးပေါ်အခြေအနေတွေနဲ့ ဘေးအန္တရာယ်ကျရောက်လာတဲ့အချိန်တိုင်း အစောဆုံးတုံ့ပြန်ဆောင်ရွက်ပေးသူတွေအဖြစ် ကျရာနေရာကနေ တတ်စွမ်းသရွေ့ကူညီဆောင်ရွက်ပေးလျက်ရှိနေကြပါတယ်။

၂၀၂၂ ခုနှစ်၊ ဇွန်လ (၂၇) ရက်နေ့က ကရင်ပြည်နယ်၊ မြဝတီမြို့နယ် သောင်ရင်းမြစ်ကမ်းနှင့်ခွန်ဆာဝင်း သောင်ရင်းဘောကွင်းတို့တွင် သဘာဝဘေးအန္တရာယ်ကြိုတင်ကာကွယ်ရေး ရေဘေးအန္တရာယ်သဏ္ဍာန်တူဇာတ်တိုက်လေ့ကျင့်ခြင်းများကို ဆောင်ရွက်ခဲ့ကြပါသည်။

မြဝတီမြို့နယ်မှ ကြက်ခြေနီစေတနာလုပ်အားရှင်များ၊ လူမှုရေးအသင်းအဖွဲ့များ၊ ပရဟိတအဖွဲ့များ၊ မြဝတီမြို့ပေါ်မှပြည်သူများနှင့် သက်ဆိုင်ရာတာဝန်ရှိသူများက ဇာတ်တိုက်လေ့ကျင့်ခြင်းများကို ပါဝင်ဆောင်ရွက်ခဲ့ကြပါသည်။

ရေကြီးရေလျှံမှုအန္တရာယ်များနှင့်ကြုံတွေ့လာရပါက စနစ်တကျ တုန့်ပြန်ဆောင်ရွက်နိုင်ရန် အဆိုပါသဏ္ဍာန်တူလေ့ကျင့်ခြင်းများကို ပြုလုပ်ခဲ့ပြီး ရေဘေးအန္တရာယ်အသိပညာပေးနှိုးဆော်ခြင်း၊ ရေနစ်သူများအား ကူညီကယ်ဆယ်ခြင်းနှင့် ရှေးဦးပြုစုခြင်း၊ ကျန်းမာရေးဌာနသို့ ညွှန်းပို့ခြင်း၊ စာရင်းမှတ်တမ်းကောက်ယူခြင်း၊ ရေဘေးသင့်ပြည်သူများအား ယာယီကယ်ဆယ်ရေးစခန်းများဆီသို့ ပို့ဆောင်ကူညီခြင်းတို့ကို ဆောင်ရွက်ခဲ့ကြပါသည်။

ကရင်ပြည်နယ်၊ ဘားအံမြို့၊ ပြည်သူ့ဆေးရုံနှင့် တောင်ကုလေး ကုတင် (၁၀၀) ဆေးရုံတို့တွင် ဆေးကုသမှုခံယူနေသော လူနာ (၄) ဦး အရေးပေါ်လိုအပ်သည့် သွေးသန့် (၆) လုံးရရှိရေးအတွက် ဘားအံမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် များက သွေးလှူရှင်များနှင့် ကူညီချိတ်ဆက်ရှာဖွေပေးခဲ့ပါသည်။

၂၄နာရီလူနာတင်ယာဉ်ဝန်ဆောင်မှုများကို ကြက်ခြေနီစေတနာလုပ်အားရှင်များက နိုင်ငံတဝန်းတွင် မြို့နယ်ကြက်ခြေနီအသင်းခွဲများအလိုက် ဆောင်ရွက်ပေးလျက်ရှိနေကြပါသည်။ ထိုသို့ဆောင်ရွက်ပေးကြရာတွင် လူနာတင်ယာဉ်တစ်စီးတွင် ပါဝင်ရမည့် ပစ္စည်းကိရိယာအစုံအလင်ဖြင့် ကူညီပေးနေကြခြင်းဖြစ်ပြီး လိုအပ်ပါက ရှေးဦးပြုစုပေးနိုင်စေရန်အတွက် ရှေးဦးပြုစုခြင်းကျွမ်းကျင်သူများဖြင့် လှုပ်ရှားနေကြပါသည်။

ဇွန်လ(၃)ရက်နေ့က ထားဝယ်မြို့၊ ဥဿာရံရပ်ကွက်မှ ဆေးရုံဆင်းလူနာတစ်ဦးအား မယ်ဒီလန်းဆေးရုံမှတစ်ဆင့် နေအိမ်သို့လည်းကောင်း၊ ဇွန်လ(၄)ရက်နေ့ မွန်းလွဲ ၂နာရီခွဲခန့်က သရက်ချောင်းမြို့နယ်၊ ပဲကျေးရွာတွင် နေထိုင်သည့် လူနာတစ်ဦးအား ထားဝယ်ဆေးရုံကြီးမှ နေအိမ်သို့လည်းကောင်း၊ ညနေ ၄နာရီခွဲခန့်က လောင်းလုံးမြို့နယ်၊ ပန်းတင်အင်းကျေးရွာမှ CT Screen ရိုက်မည့်လူနာတစ်ဦးအား မြင့်မိုရ်ဦးဆေးရုံ မှ ထားဝယ်ဆေးရုံကြီး သို့ လည်းကောင်း၊ ည(၇)နာရီခန့်က ထားဝယ်မြို့၊ ဥသာရံရပ်ကွက်မှ အမောဖောက်လူနာတစ်ဦးအား နေအိမ်မှ ထားဝယ်ဆေးရုံကြီးသို့ လည်းကောင်း၊ ည(၈)နာရီခန့်က ထားဝယ်မြို့၊ ကရပ်ပြင်မြောက်ရပ်ကွက်မှ ဘယ်ဘက်ဒူးခေါင်းထိခိုက်ဒဏ်ရာရရှိသော လူနာတစ်ဦးအား ထားဝယ်ဆေးရုံကြီး OPD မှ ဖျားနာဆောင်သို့ လည်းကောင်း၊ ထို့နောက် ထားဝယ်မြို့၊ ညောင်ရမ်းတောင်ရပ်ကွက်မှ ဘယ်ဘက်နဖူးထိခိုက်ဒဏ်ရာရရှိသူ လူနာတစ်ဦးအား ထားဝယ်ဆေးရုံကြီး OPD မှ ဖျားနာဆောင် သို့ လည်းကောင်း၊ ည (8:10)နာရီအချိန်ခန့်တွင် ထားဝယ်မြို့ ညောင်ရမ်းတောင်ရပ် က ဘယ်နဖူးဒဏ်ရာရရှိသော သူ အား ထားဝယ်ဆေးရုံကြီး OPD မှ ဖျားနာဆောင် သို့ လည်းကောင်း၊ ဇွန်လ(၅)ရက်နေ့ နေ့လည် (၁၂)နာရီခွဲခန့်က ထားဝယ်မြို့၊ ကရင်ပြင်မြောက်ရပ်ကွက်မှ ဆေးရုံဆင်းလူနာတစ်ဦးအား ထားဝယ်ဆေးရုံကြီး မှ နေအိမ် သို့ လည်းကောင်း၊ မွန်းလွဲ (၁)နာရီခွဲခန့်က ရေဖြူမြို့နယ် (ဂ)ရပ်ကွက်မှ CT Screen ရိုက်မည့်လူနာတစ်ဦးအား ထားဝယ်ဆေးရုံကြီးမှ မယ်ဒီလန်းဆေးရုံသို့ လည်းကောင်း၊ ညနေ (၆)နာရီခွဲခန့်က လောင်းလုံးမြို့နယ်၊ မဲမော်ကျေးရွာမှ လေဖြတ်လူနာစ်ဦးအား နေအိမ်မှ မယ်ဒီလန်းဆေးရုံသို့ လည်းကောင်း၊ ည(၈)နာရီခန့်က ရေဖြူမြို့နယ်၊ ပိန်းရှောင်ကျေးရွာမှ ဗိုက်အောင့်လူနာတစ်ဦးအား ထားဝယ်ဆေးရုံကြီး OPD မှ ဖျားနာဆောင် သို့ လည်းကောင်း အသီးသီးပို့ဆောင်ကူညီပေးခဲ့ကြပါသည်။

အဆိုပါ ၂၄နာရီလူနာတင်ယာဉ်ဝန်ဆောင်မှုများကို “၂၄နာရီ’’ ဆိုသည့်အတိုင်း နံနက်၊ နေ့၊ ည အချိန်မရွေး၊ နေရာမရွေး ရပ်ရွာလူထု အကူအညီလိုအပ်တဲ့အခါတိုင်း အချိန်နဲ့တပြေးညီ ဆောင်ရွက်ပေးနိုင်ဖို့ ကျွန်ုပ်တို့ရဲ့ကြက်ခြေနီစေတနာလုပ်အားရှင်များက ဆက်လက် ကြိုးပမ်းအားထုတ်နေကြပါသည်။

ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့ကြက်ခြေနီအသင်းခွဲငယ် မှ ကြက်ခြေနီစေတနာလုပ်အားရှင်များသည် သွေးလွန်တုပ်ကွေးရောဂါ ကာကွယ်ရေးအတွက် မြို့ပေါ်ရပ်ကွက်များရှိ နေအိမ်များတွင် ဖုံး/သွန်/လဲ/စစ် လုပ်ငန်းများ ဆောင်ရွက်ခြင်း၊ အဘိတ်ဆေးခပ်ခြင်းများ၊ အဘိတ်ဆေးထုပ်များပေးဝေခြင်း နှင့် သွေးလွန်တုပ်ကွေးရောဂါ ကြိုတင်ကာကွယ်ရေးဆိုင်ရာ အသိပညာပေးခြင်းများကို ဇွန်လ(၁)ရက်နေ့ နှင့် (၅)ရက်နေ့က ပြုလုပ်ဆောင်ရွက်ခဲ့ကြပါသည်။

ထို့အပြင် ဇွန်လ(၆)ရက်နေ့က လှိုင်းဘွဲ့မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ရွှေဂွန်းကျေးရွာ၊ အောက်တောရပ် ရပ်ကွက်တွင် ဖုံး/သွန်/လဲ/စစ် ပြုလုပ်ခြင်းနှင့် အဘိတ်ဆေးခပ်ခြင်းများကို ပြုလုပ်ဆောင်ရွက်ခဲ့ကြပါသည်။

စမ်းချောင်း၊ ဇွန်လ(၈)ရက်။

၂၀၂၂ခုနှစ်၊ ဇွန်လ (၇)ရက်နေ့ ညပိုင်းတွင် ရန်ကုန်တိုင်းဒေသကြီး၊ စမ်းချောင်းမြို့နယ်မှ ဆီးချို လူနာ(၁)ဦးကို စမ်းချောင်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် (၄)ဦးတို့က မြို့နယ်ကြက်ခြေနီအသင်းခွဲမှ လူနာတင်ယာဉ်ဖြင့် ရန်ကုန်အနောက်ပိုင်းဆေးရုံသို့ ပို့ဆောင်ကူညီပေးခဲ့ပါသည်။