နော်ဝေနိုင်ငံ အော်စလိုမြို့တွင် အောက်တိုဘာလ(၅)ရက်နေ့မှ အောက်တိုဘာလ(၈)ရက်နေ့အထိ ကျင်းပခဲ့သော Norwegian Red Cross’ 42. General Assembly သို့ မြန်မာနိုင်ငံကြက်ခြေနီအသင်းဥက္ကဌပါမောက္ခဒေါက်တာမျိုးညွန့်တက်ရောက်ခဲ့ပါသည်။ ညီလာခံအကြိုနေ့ အောက်တိုဘာလ(၄)ရက်နေ့တွင် အသင်းဥက္ကဌသည် မြန်မာနိုင်ငံကြက်ခြေနီအသင်းကိုယ်စား နိုင်ငံတကာနှင့်ချိတ်ဆက်နိုင်ရေးအတွက် နိုင်ငံတကာမှ ကိုယ်စားလှယ်များနှင့် တွေ့ဆုံကာအသင်း၏ ဆောင်ရွက်ချက်များကို ဝေမျှခဲ့ပြီး နော်ဝေနိုင်ငံကြက်ခြေနီအသင်းမှ တာဝန်ရှိသူများနှင့် တွေ့ဆုံခဲ့ပါသည်။ ထို့အတူ International Programs and Preparedness Director ဖြစ်သူ Mr. Jorgen Haldorsen နှင့် တွေ့ဆုံခဲ့ပြီး မြန်မာနိုင်ငံကြက်ခြေနီအသင်းနှင့် ဆက်လက်ပူးပေါင်းဆောင်ရွက်မည့် အစီအစဉ်များကိုဆွေးနွေးခဲ့ပါသည်။ ညီလာခံအတွင်း ကမ္ဘာလုံးဆိုင်ရာကြက်ခြေနီလှုပ်ရှားမှုများကို ဆွေးနွေးခြင်း၊ လုပ်ငန်းစဉ်များကို တင်ပြခြင်း၊ ပူးပေါင်းဆောင်ရွက်မှုဆိုင်ရာ ဆွေးနွေးခြင်းတို့ကို ပြုလုပ်ခဲ့ပြီး အရေးပေါ်တုန့်ပြန်ရေး သိုလှောင်ရုံကိုလေ့လာခဲ့ပါသည်။ ထို့အပြင် Ministry of Foreign Affair (MFA) NorCross Humanitarian ဌာနခွဲ ကိုယ်စားလှယ်များနှင့် အစည်းအဝေး၏ Panel Discussion တွင် မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်၊ Ethiopia Red Cross Society ဥက္ကဌ နှင့် Sudanese Red Cresent Society  အထွေထွေအတွင်း ရေးမှူးတို့က ပါဝင်ဆွေးနွေးခဲ့ရာတွင် အသင်းဥက္ကဌက မြန်မာနိုင်ငံတွင်လူသားချင်းစာနာထောက်ထားမှုဆိုင်ရာလိုအပ်ချက်များ၊ MFA အထောက်အပံ့အသုံးပြုမှုနှင့် လူသားချင်းစာနာထောက်ထားမှုဆိုင်ရာ တုန့်ပြန်ဆောင်ရွက်မှုများ ပိုမိုအားကောင်းလာစေရန် အရေးကြီးသောအချက်များကို အဓိကထား ဆွေးနွေးခဲ့ပါသည်။ အစည်းအဝေးကာလများအတွင်း အသင်းဥက္ကဌသည် နိုင်ငံတကာမှ ကိုယ်စားလှယ်များနှင့်အတူ ကြက်ခြေနီလှုပ်ရှားမှုများ ဆွေးနွေးရာတွင် တက်ကြွစွာ ပါဝင်ခဲ့ပြီး လူသားချင်းစာနာထောက်ထားမှုဆိုင်ရာ ဆက်စပ် အကြောင်းအရာများ ပူးပေါင်းဆောင်ရွက်မှုနှင့် သတင်းအချက်အလက်ဖလှယ်ခြင်းတို့ကို ဆောင်ရွက်ခဲ့ပါသည်။

ကမ္ဘောဒီးယားနိုင်ငံ ဖနွမ်းပင်မြို့တွင် ၂၀၂၃ ခုနှစ်၊ စက်တင်ဘာလ(၁၇)ရက်နေ့မှ စက်တင်ဘာလ(၂၂)ရက်နေ့အထိ ကျင်းပခဲ့သော 20thSouth – East Asia Leader Meeting နှင့် 2nd Southeast Asia RCRC Youth Forum အစည်းအဝေးများသို့ မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာ မျိုးညွန့် တက်ရောက်ခဲ့ပါသည်။ အစည်းအဝေးတွင် အသင်းဥက္ကဌက မြန်မာနိုင်ငံကြက်ခြေနီအသင်းမှ ဆောင်ရွက်နေသော လူမှုကရုဏာလုပ်ငန်းဆောင်ရွက်ချက်များကို အရှေ့တောင်အာရှ ကြက်ခြေနီလခြမ်းနီ အမျိုးသားအသင်းများအား ရှင်းလင်းတင်ပြခဲ့ပြီး အဆိုပါအစည်းအဝေးမှ လူငယ်ကြက်ခြေနီများ၏ လူငယ်နှီးနှောဖလှယ်ပွဲ ရလဒ် များ၊ ဆွေးနွေးချက်များကို အားပေးဆွေးနွေးနိုင်ခဲ့ခြင်း၊ ယဉ်ကျေးမှုမတူညီသည့် နိုင်ငံများအချင်းချင်း လိုက်လျောညီစွာ နေထိုင်နိုင်ခြင်းအတွက် လက်တွေ့လုပ်ဆောင်နိုင်ခြင်း၊ အမျိုးသားအသင်းခေါင်းဆောင်များမှ လူငယ်ကြက်ခြေနီလှုပ်ရှားမှု များကို တတ်စွမ်းသမျှ ကူညီထောက်ပံ့ပေးမည့် ကတိကဝတ် ရရှိခဲ့ခြင်းစသည့်အကျိုးကျေးဇူးများကိုရရှိခဲ့ပါသည်။ အဆိုပါအစည်းအဝေးများသို့ အသင်းဥက္ကဌ နှင့်အတူ ဒုတိယအထွေထွေအတွင်းရေးမှူး ဒေါက်တာဒေါ်ညိုညိုဝင့်နှင့် အဖွဲ့ဝင်(၂)ဦး၊ လူငယ်ကိုယ်စားလှယ်(၂)ဦး တို့ တက်ရောက်ခဲ့ကြပါသည်။

မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာမျိုးညွန့်နှင့် မြန်မာနိုင်ငံကြက်ခြေနီအသင်းမှ ကိုယ်စားလှယ်အဖွဲ့သည် မလေးရှားနိုင်ငံ ကွာလလမ်ပူမြို့တွင် ၂၀၂၃ ခုနှစ်၊ စက်တင်ဘာလ(၁၁)ရက်နေ့မှ စက်တင်ဘာလ(၁၅)ရက်နေ့အထိ ကျင်းပခဲ့သော 2023 Movement Induction course(MIC)သို့ တက်ရောက်ခဲ့ပါသည်။ အဆိုပါ MIC သို့ အသင်းဥက္ကဌနှင့်အတူ ဒုတိယဥက္ကဌ ဒေါက်တာဒေါ်တင်တင်လေး၊ အချိန်ပြည့်အလုပ်အမှုဆောင်များဖြစ်ကြသော ပါမောက္ခဒေါက်တာဒေါ်ရီရီတင်၊ ဒေါက်တာတင်မောင်လှိုင်၊ ဒေါက်တာစိုးလှိုင်နှင့် ဒုတိယအထွေထွေအတွင်းရေးမှူး ဒေါက်တာဒေါ်ညိုညိုဝင့် တို့ပါဝင် တက်ရောက်ခဲ့ပြီး မြန်မာနိုင်ငံကြက်ခြေနီအသင်းသို့ လှူဒါန်းထားသည့် ရန်ပုံငွေများကို အချိန်မီသုံးစွဲခြင်းနှင့် အစီရင်ခံခြင်း၊ အချိန်မီအသုံးပြုရေးအတွက် စီမံခန့်ခွဲမှုအဆင့်များ၊ နိုင်ငံတကာတွင် ရပ်တည်ခြင်းနှင့် အလုပ် အမှုဆောင် အဖွဲ့ဝင်များနှင့် အထွေထွေအတွင်းရေးမှူးရုံး၏ တာဝန်များ၊ ရန်ပုံငွေလိုအပ်ချက် များတိုးတက်ကောင်းမွန်စေရေးတို့ကိုဆွေးနွေးခဲ့ပါသည်။ ထို့အပြင် IFRC အာရှပစိဖိတ်ဒေသရုံးမှ တာဝန်ရှိသူများနှင့် ဆွေးနွေးခြင်း၊ ဘဏ္ဍာရေးစီမံခန့်ခွဲမှုတွင် လိုက်နာမှုရှိမရှိ စောစီးစွာ သိရှိနိုင်မည့် စနစ်တီထွင်ခြင်း၊ လူသားချင်းစာနာထောက်ထားမှုဆိုင်ရာ သံတမန်ရေးရာစသည့်လုပ်ငန်းစဉ်များကိုဆွေးနွေးခဲ့ပါသည်။ အသင်းဥက္ကဌနှင့် ကိုယ်စားလှယ်အဖွဲ့သည် Malaysia Red Cross Society ၏ လူငယ်လှုပ်ရှားမှုများ၊ကာကွယ်ဆေးထိုးခြင်းနှင့် ကျန်းမာရေး (Vaccination and Health Unit)၏ အောင်မြင်မှုများ၊ ရွှေ့ပြောင်းနေထိုင်ခြင်း၊ မိသားစုပြန်လည်ဆက်သွယ်ပေးရေး လုပ်ငန်းများကို လေ့လာကြည့်ရှုခဲ့ပါသည်။

မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်သည် အချိန်ပြည့်အလုပ်အမှုဆောင် ပါမောက္ခဒေါက်တာ ဒေါ်ရီရီတင်၊ ဘေးအန္တရာယ်ဆိုင်ရာစီမံခန့်ခွဲမှုဌာန ဒုတိယညွှန်ကြားရေးမှူး ဒေါ်မိုးသီတာဝင်းနှင့် အဖွဲ့ဝင်(၂)ဦး တို့နှင့်အတူ  နီပေါနိုင်ငံတွင် ၂၀၂၃ ခုနှစ်၊ ဇွန်လ(၁၃)ရက်နေ့မှ ဇွန်လ(၁၅)ရက်နေ့အထိ ကျင်းပခဲ့သော Dialogue  Platform on Anticipatory Humanitarian Action အစည်းအဝေးသို့တက်ရောက်ခဲ့ပါသည်။ ဘေးအန္တရာယ်ဆိုင်ရာစီမံခန့်ခွဲမှုဌာန ဒုတိယညွှန်ကြားရေးမှူးက “Anticipation for heatwaves in urban areas”ခေါင်းစဉ်ဖြင့် ဆွေးနွေးခဲ့ပြီး အစည်းအဝေး၏ Side Meeting တွင် အသင်းဥက္ကဌနှင့် အချိန်ပြည့်အလုပ်အမှုဆောင်တို့သည် IFRC မှ တာဝန်ရှိသူများနှင့်အတူ တက်ရောက်ခဲ့ပြီး မြန်မာနိုင်ငံကြက်ခြေနီအသင်းမှ ဆောင်ရွက်နေသည့် ဆိုင်ကလုန်းမုန်တိုင်း မိုခါ တုန့်ပြန်ဆောင်ရွက်ရေးလုပ်ငန်းများကိုတက်ကြွစွာဆွေးနွေးခဲ့ပါသည်။ အဆိုပါ Side Meeting သို့ အသင်းဥက္ကဌ ၊ အချိန်ပိုင်း အလုပ်အမှုဆောင်နှင့်အတူ  နီပေါနိုင်ငံ Head of IFRC country office ဖြစ်သူ Mr. Azmat Ulla ၊ External Relations and Liaison Manager (Country Delegation Nepal) ဖြစ်သူ Mr. Krishna Kumar K.C ၊ Country coordinator (Swiss Red Cross, Nepal)ဖြစ်သူ Mr. Kamal Baral ၊ Health Program Manager (Canadian Red Cross, Nepal) ဖြစ်သူ Mr.Ramesh Neupane တို့လည်း တက်ရောက်ခဲ့ပါသည်။ အစည်းအဝေးကာလအတွင်း အသင်းဥက္ကဌနှင့် အဖွဲ့သည် Nepal Red Cross အတွင်းရှိ Nepal Blood Bankကိုလည်းကြည့်ရှုလေ့လာခဲ့ပါသည်။  

မြန်မာနိုင်ငံကြက်ခြေနီအသင်းက ဘေးအန္တရာယ်ကျရောက်သူများအား အခြေခံလိုအပ်လျှက်ရှိသော ထောက်ပံ့ပစ္စည်းများကို ကူညီထောက်ပံ့ပေးလျှက်ရှိရာ မကွေးတိုင်းဒေသကြီး၊ ဆင်ဖြူကျွန်းမြို့နယ်မှ စလင်းချောင်းရေလျှံမှုကြောင့် ရေဘေးသင့်အိမ်ထောင်စု (၁၄၀) စုအား တစ်ကိုယ်ရည်သန့်ရှင်းရေးသုံးပစ္စည်းများ၊ မီးဖိုချောင်သုံးပစ္စည်းများ၊ တစ်ကိုယ်ရည်သန့်ရှင်းရေးသုံးပစ္စည်းများ၊ တာပေါ်လင်စများ၊ စောင်များနှင့် သောက်ရေခွက်များကို မကွေးတိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ ပါမောက္ခဒေါက်တာဒေါ်ချောခင်နှင့် ကြက်ခြေနီစေတနာလုပ်အားရှင်များက ဇွန်လ (၁၃) ရက်နေ့က သွားရောက်ပေးအပ်ခဲ့သည်။