မန္တလေး၊ ဇူလိုင် ၁၉

မန္တလေးတိုင်းဒေသကြီးတွင် ဒုတ္ထဝတီမြစ်ရေနှင့် ဧရာဝတီမြစ်ရေ တက်လာသဖြင့် ကမ်းအနီးနေထိုင်ကြသူများနှင့် ရေတက်လာသဖြင့် ရွှေပြောင်း နေထိုင်ကြသူများအား ၂၀၂၀ပြည်နှစ်၊ ဇူလိုင်လ ၁၉ ရက်နေ့က
တံတားဦးမြို့နယ်၊ အမရပူရမြို့နယ်၊ မဟာအောင်မြေမြို့နယ်၊ ချမ်းအေးသာစံမြို့နယ်၊ အောင်မြေသာစံမြို့နယ်ကြက်ခြေနီအသင်းခွဲများမှ
ကျန်းမာရေးစောင့်ရှောက်မှုစခန်းများဖွင့်လှစ်ထားရှိကာ ကူညီဆောင်ရွက်ပေးလျှက်ရှိပါသည်။

ရန်ကုန်၊ ဇူလိုင် ၂၀

၂၀၂၀ ပြည့်နှစ်၊ ဇူလိုင်လ ၁၉ ရက်နေ့က ဖြစ်ပွားခဲ့သော မန္တလေးတိုင်းဒေသကြီး၊ အမရပူရမြို့နယ်၊ ရွှေဂဲရေဆိုးထုတ် ရေတံခါးအနီး တာရိုးကျိုးပေါက်မှုတွင် လက်ရှိအချိန်ထိ ယာယီကယ်ဆယ်ရေးစခန်း (၁၄) ခု ဖွင့်လှစ်ထားရှိပြီး ရွှေ့ပြောင်းပေးထားသည့် လူဉီးရေမှာ ခန့်မှန်း ၄,၀၀၀ ကျော် ရှိပြီဖြစ်ပါသည်။

ဇူလိုင်လ ၂၀ ရက်နေ့က မန္တလေးတိုင်းဒေသကြီးကြက်ခြေနီကြီးကြပ်မှုကော်မတီ ဥက္ကဌ ပါမောက္ခဒေါက်တာခင်သီလွင်၊ ဒုတိယဥက္ကဌပါမောက္ခဒေါက်တာပြုံးပြုံးသန်း၊ ဒုတိယတိုင်းဒေသကြီးကြက်ခြေနီတပ်ဖွဲ့မှူး ဦးကျော်ကျော်၊ အတွင်းရေးမှူး ဦးစိုးလှိုင်ဝင်းနှင့် ကြက်ခြေနီစေတနာလုပ်အားရှင်များသည် နိုင်ငံတော် ဒုတိယသမ္မတ ဦးဟင်နရီဗန်ထီးယူနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးတို့နှင့် အတူလိုက်ပါပြီး ဘေးလွတ်ရာသို့ရွေ့ပြောင်းထားသည့် ဦးလင်းဘုရား ကယ်ဆယ်ရေးစခန်းရှိ အိမ်ထောင်စု (၁၅၁) စု နှင့် ရန်အောင်မြင်ဘုရားကယ်ဆယ်ရေးစခန်းရှိ အိမ်ထောင်စု (၁၁၅) စုတို့အတွက် တစ်ကိုယ်ရည်သန့်ရှင်းရေးသုံးပစ္စည်း (၂၆၆) ပုံးအား ထောက်ပံ့ပေးအပ်ခဲ့ပါသည်။

မြန်မာနိုင်ငံကြက်ခြေနီအသင်းမှ ကြက်ခြေနီစေတနာလုပ်အားရှင်များသည် ပြည်သူများ ဘေးလွတ်ရာသို့ ကူညီရွှေ့ပြောင်းခြင်းနှင့် ကျန်းမာရေးစောင့်ရှောက်မှုများကို ပေးအပ်လျက်ရှိသလို အသင်းဌာနချုပ်အနေ ဖြင့်လည်း အရေးပေါ်ကူညီထောက်ပံ့ပစ္စည်းများကို ဆက်လက်ထောက်ပံ့ပေးနိုင်ရန် ဆောင်ရွက်လျက်ရှိပါသည်။

ရန်ကုန်၊ ဇူလိုင် ၂၀

၂၀၂၀ ပြည့်နှစ်၊ ဇူလိုင်လ ၁၉ ရက်နေ့က ဖြစ်ပွားခဲ့သော မန္တလေးတိုင်းဒေသကြီး၊ အမရပူရမြို့နယ်၊ ရွှေဂဲရေဆိုးထုတ် ရေတံခါးအနီး တာရိုးကျိုးပေါက်မှုတွင် လက်ရှိအချိန်ထိ ယာယီကယ်ဆယ်ရေးစခန်း (၁၄) ခု ဖွင့်လှစ်ထားရှိပြီး ရွှေ့ပြောင်းပေးထားသည့် လူဉီးရေမှာ ခန့်မှန်း ၄,၀၀၀ ကျော် ရှိပြီဖြစ်ပါသည်။

မြန်မာနိုင်ငံကြက်ခြေနီအသင်းမှ ကြက်ခြေနီစေတနာလုပ်အားရှင်များက ပြည်သူများ ဘေးလွတ်ရာသို့ ကူညီရွှေ့ပြောင်းခြင်းနှင့် ကျန်းမာရေးစောင့်ရှောက်မှုများကို ပေးအပ်လျက်ရှိသလို အသင်းဌာနချုပ်အနေ ဖြင့်လည်း အရေးပေါ်ကူညီထောက်ပံ့ပစ္စည်များဖြစ်သည့် မီသားစု တစ်ကိုယ်ရည်သန့်ရှင်းရေးသုံးပစ္စည်း (၁,၄၀၀) ပုံး၊ အသက်ကယ်ဘောကွင်း (၁၀) ခုနှင့် ခေါက်ထမ်းစင် (၄) ခုတို့အား ပင်မသိုလှောင်ရုံ (သန်လျင်)မှ မန္တလေးတိုင်း ဒေသကြီးသို့ ပို့ဆောင်ရန် ဇူလိုင်လ ၂၀ ရက်နေ့က ပြင်ဆင်ဆောင်ရွက်လျက်ရှိပါသည်။

ကချင်ပြည်နယ်၊ ဇူလိုင် ၂၀ ကြိုတင်အသိပေးခြင်းသည် ဘေးအန္တရာယ်ကာကွယ်ရေးတွင် အရေးကြီးဆုံးသော အပိုင်းဖြစ်ပါသည်။ မုတ်သုံရာသီတွင် ရေကြီးမှု၊မြေပြိုမှုများ နှစ်စဉ်ဖြစ်ပွားလျက်ရှိရာ ကချင်ပြည်နယ်ကြက်ခြေနီကြီးကြပ်မှုကော်မတီ၏ လမ်းညွှန်မှုဖြင့် ၂၀၂၀ပြည့်နှစ် ဇူလိုင်လ ၁၄ရက်နေ့က ဗန်းမော်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ကချင်ပြည်နယ်၊ ဗန်းမော်မြို့နယ်အတွင်းရှိ မံပင်ကျေးရွာနှင့် ကုန်းခါးကျေးရွာများတွင် မြစ်ရေကြီးခြင်းသတင်းထုတ်ပြန်ချက်များကို ရပ်ရွာအတွင်းလိုက်လံအသိပေးကြေညာခြင်းများ ဆောင်ရွက်ခဲ့ကြသည်။ အလားတူ ဇူလိုင်လ ၂၀ရက်နေ့ကလည်း ကာမိုင်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များမှ ရေကြီးနိုင်မှုအန္တရာယ်ကြိုတင်သတိပေးချက်များကို ကာမိုင်းမြို့နယ်အတွင်းလိုက်လံအသိပေးကြေညာခဲ့ကြပါသည်။

ရန်ကုန်၊ ဇူလိုင် ၁၉

၂၀၂၀ပြည့်နှစ်၊ ၇၃နှစ်မြောက်အာဇာနည်နေ့အခမ်းအနားကို ယနေ့နံနက် ၈နာရီတွင် ရန်ကုန်မြို့၊ ဗဟန်းမြို့နယ်ရှိ အာဇာနည်ဗိမာန်၌ ကျင်းပရာ မြန်မာနိုင်ငံကြက်ခြေနီအသင်းဥက္ကဌဒေါက်တာမောင်မောင်မြင့်နှင့် အချိန်ပြည့်အလုပ်အမှုဆောင် ဒေါက်တာတင်ညွန့်တို့တက်ရောက် ဂါရဝပြု လွမ်းသူ့ပန်းခွေ ချခဲ့ပါသည်။ ထို့အပြင် ရန်ကုန်တိုင်းဒေသကြီးကြက်ခြေနီကြီးကြပ်မှုကော်မတီ၏ ဦးဆောင်မှုဖြင့် ကြက်ခြေနီစေတနာလုပ်အားရှင် ၁၅၅ဦးတို့က နံနက် ၅နာရီမှ ညနေ ၅နာရီအချိန်ထိ အာဇာနည်ဗိမာန်နှင့် ဝန်ကြီးများရုံးသို့ လာရောက်ကြသည့် ပြည်သူများအတွက် လူနာတင်ယာဉ် ၆ စီးဖြင့် ရှေးဦးပြုစုခြင်းပေးခြင်းနှင့် လိုအပ်သည့် ကျန်းမာရေးစောင့်ရှောက်မှုများကို ကူညီပေးခဲ့ကြပါသည်။

ရန်ကုန်၊ ဇူလိုင် ၁၅

၂၀၂၀ပြည့်နှစ် ဇူလိုင်လ၁၄ရက်နေ့က မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲမှုဌာနမှ ကျင်းပသည့် ရပ်ရွာလူထုအခြေပြုဘေးအန္တရာယ်ဖြစ်နိုင်ခြေလျော့ပါးရေး(နည်းပြသင်တန်း) Community Based Disaster Risk Reduction Training ကို ဇူလိုင် ၁၄ရက်မှ ၁၆ ရက်အထိ Online (Zoom Meeting) မှ တစ်ဆင့်ပြုလုပ်လျက်ရှိပါသည်။
အဆိုပါသင်တန်းကို ဘေးအန္တရာယ်ဆိုင်ရာစီမံခန့်ခွဲမှုဌာနမှ ဒုတိယညွှန်ကြားရေးမှူးဒေါ်မိုးသီတာဝင်း ဦးဆောင်ပြုလုပ်လျက်ရှိပြီး ကချင်ပြည်နယ်အတွင်းရှိ မြစ်ကြီးနား၊ မိုးမောက်၊ ဗန်းမော်၊ မိုးကောင်းမြို့နယ်များမှ ကြက်ခြေနီစေတနာလုပ်အားရှင် ၂၈ဦးတက်ရောက်သင်ကြားလျက်ရှိပါသည်။
သင်တန်းရည်ရွယ်ချက်မှာ ကချင်ပြည်နယ်အတွင်းရှိ ရပ်ရွာလူထု ဘေးဒဏ်ကြံ့ကြံ့ခံနိုင်စွမ်းမြင့်မားရေးအ တွက် ဘေးအန္တရာယ်ကြိုတင်ပြင်ဆင်မှုလုပ်ငန်းများကို ရပ်ရွာအတွင်း ကြက်ခြေနီစေတနာလုပ်အားရှင်များမှ ဦးဆောင်အကောင်အထည်ဖော်နိုင်ရန် အသင်းမှ သင်ကြားပေးခြင်းဖြစ်သည်။

ရန်ကုန်၊ ဇူလိုင် ၁၄

၂၀၂၀ပြည့်နှစ် ဇူလိုင်လ၁၄ရက်နေ့က မြန်မာနိုင်ငံကြက်ခြေနီအသင်းမှ ကျင်းပသည့် ကြက်ခြေနီအသိပညာဖြန့်ဝေသူသင်တန်းပြန်လည်သုံးသပ်ခြင်း အစည်းအဝေးကို Online (Zoom Meeting) မှ ပြုလုပ်ခဲ့ပါသည်။
အစည်းအဝေးတွင် သက်ဆိုင်ရာမြို့နယ် အတွင်း ကြက်ခြေနီအသိပညာ ပြန်လည်ဖြန့်ဝေနေမှု၊ လက်တွေ့လုပ်ဆောင်ရာတွင် ကြုံတွေ့နေရသော အခက်အခဲများ၊ ကြက်ခြေနီလှုပ်ရှားမှုများအကြောင်း အများပြည်သူပိုမိုသိရှိနိုင်စေရန် ဆောင်ရွက်နေမှု၊ ကြက်ခြေနီအမှတ်အသားကို မှန်မှန်ကန်ကန် အသုံးပြုနိုင်ရေးအတွက် ဆောင်ရွက်နေမှုအခြေအနေများ၊ ကြက်ခြေနီအသိပညာဖြန့်ဝေသူသင်တန်းမှ ရရှိခဲ့သောအချက်အလက်များနှင့် အကျိုးသက်ရောက်မှုများအား အပြန်အလှန်ဆွေးနွေးခဲ့ကြပါသည်။
အစည်းအဝေးကို လူမှုကရုဏာလုပ်ငန်းဆိုင်ရာပြန်ကြားဆက်သွယ်ရေးဌာနမှ ညွှန်ကြားရေးမှူး ဒေါ်ရွှေစင်ကျော်စိုးနှင့် ဝန်ထမ်းများ၊ အပြည်ပြည်ဆိုင်ရာကြက်ခြေနီကော်မတီမှ တာဝန်ရှိသူများ၊ ရှမ်းပြည်နယ်ကြက်ခြေနီကြီးကြပ်မှုကော်မတီဥက္ကဌ ဒေါက်တာဦးလှအေးနှင့် ပြည်နယ်ကြက်ခြေနီတပ်ဖွဲ့မှူး ဦးအေးချမ်း၊ အထောက်အကူပြုအရာရှိ ဦးအောင်ကျော်မျိုးနှင့် တောင်ကြီးမြို့နယ်ကြက်ခြေနီတပ်ဖွဲ့မှူးဒေါ်ခင်မှီ၊ ပင်လောင်းမြို့နယ်ကြက်ခြေနီတပ်ခွဲမှူး ဦးထွန်းထွန်းလွင်နှင့် ဒေါ်နန်းအေးအေးလှိုင်၊ ဖယ်ခုံမြို့နယ်ကြက်ခြေနီအသင်းခွဲဥက္ကဌ ဒေါ်ရင်ရင်ရွှေနှင့် အမှုဆောင်အဖွဲ့ဝင် ဦးစောဖိလစ် တို့ တက်ရောက်ခဲ့ကြသည်။

ဘားအံ၊ ဇူလိုင် ၁၀

မြန်မာနိုင်ငံကြက်ခြေနီအသင်းဥက္ကဌဒေါက်တာမောင်မောင်မြင့်နှင့် အဖွဲ့ဝင်များသည် ၂၀၂၀ပြည့်နှစ်၊ ဇူလိုင်လ ၁၀ရက်နေ့ နေ့လည် ၂ နာရီက ကရင်ပြည်နယ်အစိုးရအဖွဲ့ဝင်၊ ပြည်နယ်စီမံကိန်း၊ ဘဏ္ဍာရေးနှင့် စည်ပင်သာယာရေးဝန်ကြီးဦးသန်းနိုင်နှင့် ပြည်နယ်လူမှုဝန်ကြီးဦးဘိုဘိုဝေမောင်တို့အား ပြည်နယ်အစိုးရအဖွဲ့ရုံးဧည့်ခန်းမဆောင်(၂)တွင် တွေ့ဆုံခဲ့ပါသည်။

ထိုသို့တွေ့ဆုံရာတွင် အသင်းဥက္ကဌမှ မြန်မာနိုင်ငံကြက်ခြေနီအသင်း၏ လူမှုကရုဏာလုပ်ငန်းများဆောင်ရွက်နေမှု အခြေအနေများ၊ ကရင်ပြည်နယ်အတွင်း COVID-19 ရောဂါကာကွယ်ရေးလုပ်ငန်းဆောင်ရွက်ချက်များကို တင်ပြခဲ့သည်။

ယင်းနောက် ပြည်နယ်စီမံကိန်း၊ ဘဏ္ဍာရေးနှင့် စည်ပင်သာယာရေးဝန်ကြီးမှ ကြက်ခြေနီစေတနာလုပ်အားရှင်များ၏ ဆောင်ရွက်မှုအခြေအနေများကို အသိအမှတ်ပြုပါကြောင်းနှင့် လိုအပ်သည်များကို ပြည်နယ်အစိုးရအဖွဲ့နှင့် ဆက်သွယ်ပြီးဆောင်ရွက်နိုင်ကြောင်းပြောကြားခဲ့ပြီး ပြည်နယ်အတွင်း လူမှုကရုဏာလုပ်ငန်းများ အဆင်ပြေချော့မွေ့စွာလုပ်ကိုင်နိုင်ရေးအတွက် ပြန်လည်ဆွေးနွေးခဲ့ပါသည်။

တွေ့ဆုံပွဲသို့ အသင်းဥက္ကဌနှင့်အတူ အချိန်ပြည့်အလုပ်အမှုဆောင်ဒေါက်တာတင်ညွှန့်၊ ဒုတိယအထွေထွေအတွင်းရေးမှူးဒေါက်တာဒေါ်ညိုညိုဝင့်၊ ပြည်နယ်ကြက်ခြေနီကြီးကြပ်မှုကော်မတီ ဥက္ကဌ ဦးခွန်ကျော်ဝင်းနှင့် ပြည်နယ်ကြက်ခြေနီတပ်ဖွဲ့မှူး ဦးမြင့်နိုင်၊ ဌာနချူပ် ဘေးအန္တရာယ်ဆိုင်ရာစီမံခန့်ခွဲမှုဌာန ညွှန်ကြားရေးမှူးဒေါ်စန်းစန်းမော်နှင့် တာဝန်ရှိသူများတက်ရောက်ခဲ့ပါသည်။

ဘားအံ၊ ဇူလိုင် ၁၀

မြန်မာနိုင်ငံကြက်ခြေနီအသင်းဥက္ကဌဒေါက်တာမောင်မောင်မြင့်နှင့် အဖွဲ့ဝင်များသည် ကရင်ပြည်နယ်၊ ဘားအံမြို့ ရှိ မြန်မာနိုင်ငံကြက်ခြေနီအသင်းနှင့် အပြည်ပြည်ဆိုင်ရာကြက်ခြေနီကော်မတီတို့ပူး ပေါင်းဆောင်ရွက်လျက်ရှိသည့် ဘားအံခြေတုလက်တုပြန်လည်သန်စွမ်းရေးဌာနသို့ ၂၀၂၀ပြည့်နှစ်၊ ဇူလိုင်လ ၁၀ ရက်ကရောက်ရှိခဲ့ပါသည်။

ထိုသို့သွားရောက်ရာတွင် အသင်းဥက္ကဌနှင့်အတူ အချိန်ပြည့်အလုပ်အမှုဆောင် ဒေါက်တာတင်ညွန့်၊ ဒုတိယအထွေထွေအတွင်းရေးမှူးဒေါက်တာဒေါ်ညိုညိုဝင့်၊ ပြည်နယ်ကြက်ခြေနီကြီးကြပ်မှုကော်မတီ ဥက္ကဌ ဦးခွန်ကျော်ဝင်းနှင့် ပြည်နယ်ကြက်ခြေနီတပ်ဖွဲ့မှူး ဦးမြင့်နိုင်၊ ၊ ဘေးအန္တရာယ်ဆိုင်ရာစီမံခန့်ခွဲမှုဌာန ညွှန်ကြားရေးမှူးဒေါ်စန်းစန်းမော်နှင့် တာဝန်ရှိသူများက ဌာနအတွင်း ဆောင်ရွက်နေမှုအခြေအနေများကို ကြည့်ရှု့လေ့လာပြီး အသင်းဥက္ကဌက လိုအပ်သည်များကို မှာကြားခဲ့ပါသည်။