ရန်ကုန်၊ ဇူလိုင် ၉ မြန်မာနိုင်ငံကြက်ခြေနီအသင်း ရှေးဦးပြုစုခြင်းနှင့် အန္တရာယ်ကင်းရှင်းရေးဌာနမှ ပြုလုပ်သည့် Psychosocial Support , Protection ,Gender and Inclusion Training သင်တန်းဖွင့်ပွဲကို ၂၀၂၀ ပြည့်နှစ်၊ ဇူလိုင်လ ၉ ရက်နေ့ နံနက်(၉း၃၀)နာရီက အသင်းရန်ကုန်ရုံးခွဲ၌ ပြုလုပ်ခဲ့ရာ အထွေထွေအတွင်းရေးမှူး ပါမောက္ခဒေါက်တာထင်ဇော်စိုးက အဖွင့်အမှာစကားပြောကြားခဲ့ပါသည်။ သင်တန်းဖွင့်ပွဲသို့ အထွေထွေအတွင်းရေးမှူးနှင့်အတူ ဒုတိအထွေထွေ အတွင်းရေးမှူးဒေါက်တာဒေါ်ညိုညိုဝင့်၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ ဝန်ထမ်းများတက်ရောက်ကြပါသည်။ အဆိုပါသင်တန်းကို တစ်နေ့တာသင်ကြားပို့ချခြင်းဖြစ်ပြီး သင်တန်းသို့ ဝန်ထမ်း (၄၄) ဦးတက်ရောက်ခဲ့ကြပါသည်။

လွိုင်ကော်၊ ဇူလိုင် ၉ လွိုင်ကော်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ၂၀၂၀ပြည့်နှစ် ဇူလိုင်လ၉ရက်နေ့က ကယားပြည်နယ်၊ လွိုင်ကော်မြို့ရှိ ပညာရေးကောလိပ်အတွင်း ဖွင့်ထားသော အသွားအလာကန့်သတ်စောင့်ကြည့်ရေးစခန်းတွင် ပိုးသတ်ဆေးဖြန်းပေးခြင်း၊ COVID-19ရောဂါကာကွယ်ရေးအသိပညာပေးခြင်းတို့ကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်း ဆောင်ရွက်ခဲ့ကြပါသည်။

ရန်ကုန်၊ ဇူလိုင် ၇

မြန်မာနိုင်ငံကြက်ခြေနီအသင်းမှ COVID-19ရောဂါကာကွယ်ရေးလုပ်ငန်းများအပါအဝင် အသင်းက ဆောင်ရွက်နေသည့် ကြက်ခြေနီလှုပ်ရှားမှုများ နှင့်ပတ်သက်၍ ပြည်နယ်နှင့်တိုင်းဒေသကြီး ကြက်ခြေနီကြီးကြပ်မှုကော်မတီများနှင့် ညှိနှိုင်းဆွေးနွေးခြင်းကို Video Conferencing ဖြင့် ၂၀၂၀ပြည့်နှစ်၊ ဇူလိုင်လ ၇ ရက်နေ့ နေ့လည်ပိုင်းတွင် အသင်းရန်ကုန်ရုံးခွဲ၌ ပြုလုပ်ခဲ့ပါသည်။

ညှိနှိုင်းဆွေးနွေးပွဲသို့ အသင်းဒုတိယဥက္ကဌဒေါက်တာဒေါ်အမယာမော်နိုင်၊ အချိန်ပြည့်အလုပ်အမှုဆောင် ပါမောက္ခဒေါက်တာဒေါ်မြသူ၊ အလုပ်အမှုဆောင်အဖွဲ့ဝင်များ၊ အထွေထွေအတွင်းရေးမှူး‌ပါမောက္ခဒေါက်တာထင်ဇော်စိုး၊ ဒုတိယအထွေထွေအတွင်းရေးမှူးဒေါက်တာဒေါ်ညိုညိုဝင့်နှင့်ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ ပြည်နယ်နှင့်တိုင်းဒေသကြီးများမှ ကြက်ခြေနီကြီးကြပ်မှုကော်မတီဥက္ကဌများ၊ တပ်ဖွဲ့မှူးများနှင့် အုပ်ချုပ်ရေးအထောက်အကူပြုအရာရှိများ တက်ရောက်ဆွေနွေးခဲ့ပါသည်။

ဆွေး‌နွေးပွဲတွင် ပြည်နယ်နှင့်တိုင်းဒေသကြီး အသီးသီးက COVID-19 ရောဂါကာကွယ်ရေး အပါအဝင် ဒေသအတွင်း ကြက်ခြေနီလှုပ်ရှားမှု ဆောင်ရွက်ချက် အခြေအနေများကို တင်ပြဆွေးနွေးခဲ့ကြပြီး အသင်းဌာနချုပ်ဘက်မှလည်း လိုအပ်သော ထောက်ပံ့မည့် အစီအစဉ်များအတွက် ဆောင်ရွက်နေမှု အခြေအနေများနှင့်ပတ်သက်၍ အပြန်အလှန်ဆွေး‌နွေးခဲ့ကြပါသည်။

မြစ်ကြီးနား၊ ဇူလိုင် ၇

၂၀၂၀ပြည့်နှစ်၊ ဇူလိုင်လ ၂ရက်နေ့က ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါးကျေးရွာတွင် ဖြစ်ပွားခဲ့သော မြေစာပုံပြိုကျမှုဖြစ်စဉ်တွင် ထိခိုက်ဒဏ်ရာရရှိပြီး မြစ်ကြီးနားပြည်သူ့ဆေးရုံသို့ တက်ရောက်ကုသမှုခံယူနေသည့်လူနာ(၅)ဦးအား မြန်မာနိုင်ငံကြက်ခြေနီအသင်းက ထောက်ပံ့သည့် ငွေကျပ်(၁)သိန်းစီနှင့် အမျိုးသားတစ်ကိုယ်ရည်သန့်ရှင်းရေးသုံးပစ္စည်း၊ တစ်ကိုယ်ရည်သန့်ရှင်းရေး သုံးပစ္စည်း (တပတ်စာ)တို့ကို ဇူလိုင်လ ၆ရက်နေ့က မြစ်ကြီးနားခရိုင်ကြက်ခြေနီတပ်ဖွဲ့မှူးဦးအောင်ကျော်လင်းဦးဆောင်သည့်အဖွဲ့က သွားရောက်ထောက်ပံ့ပေးအပ်ခဲ့ပြီး စိတ်ပိုင်းလူမှုပိုင်းဆိုင်ရာအားပေးကူညီမှုများ ပြုလုပ်ပေးခဲ့ပါသည်။

ရန်ကုန်၊ ဇူလိုင် ၇ မြန်မာနိုင်ငံကြက်ခြေနီအသင်းမှဆောင်ရွက်လျှက်ရှိသော COVID-19 ရောဂါကာကွယ်ရေးလုပ်ငန်းများတွင် အသုံးပြုရန်အတွက် ပြည်တွင်း/ပြည်ပမှအလှူရှင်များ လှူဒါန်းထားသည့် ရောဂါကာကွယ်ရေးပစ္စည်း များအား ပြည်နယ်/တိုင်း ဒေသကြီးရှိ မြို့နယ်ကြက်ခြေနီအသင်းခွဲများသို့ စဥ်ဆက်မပြတ်ဆက်လက်ဖြန့်ဝေပေးပို့လျှက်ရှိပါသည်။ ၂၀၂၀ပြည်နှစ်၊ ဇူလိုင်လ ၄ ရက်နှင့် ၅ ရက်နေ့များတွင် ဦးဝင်းဆန်းဦး Operation Manager (COVID-19 ရောဂါကာကွယ်ရေးနှင့်တုန့်ပြန်ရေး ) နှင့်တာဝန်ရှိသူများသည် အလှူရှင်များလှူဒါန်းထားသည့် COVID-19ရောဂါကာကွယ်ရေးအသုံးအဆောင်ပစ္စည်းများဖြစ်သော ခွဲစိတ်ခန်းသုံးနှာခေါင်းစည်းများ (Surgical Mask) ၊ N 95 Mask၊ မျက်နှာကာ (Face Shield)၊ PPE ၊ လက်သန့်စင်ဆေးရည် (Hand Gel)၊ လက်ကိုင် စကားပြောစက် (Hand Speaker)၊ မျက်မှန် (Goggle)၊ Sprayer၊ Apron အစရှိသည်တို့ကို ပဲခူးတိုင်းဒေသကြီးရှိ သာယာဝတီ၊ အုတ်ဖို၊ မင်းလှ၊ မိုးညို၊ လက်ပံတန်း၊ ကြို့ပင်ကောက်၊ ဇီးကုန်း၊ နတ္တလင်း၊ ပေါင်းတည်၊ သဲကုန်း၊ ရွှေတောင်၊ ပြည်၊ ပန်းတောင်း၊ ပေါက်ခေါင်းမြို့နယ်များမှ ကြက်ခြေနီအသင်းခွဲများသို့ သွားရောက်ပေးပို့ဖြန့်ဝေခဲ့ပါသည်။

၂၀၂၀ပြည့်နှစ်၊ ဇူလိုင်လ ၂ရက်နေ့က ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါးကျေးရွာတွင် ဖြစ်ပွားခဲ့သော မြေစာပုံပြိုကျမှုဖြစ်စဉ်တွင် ရေမဆေးကျောက် ရှာဖွေသူများ ရေလှိုင်း နှင့်အတူ မျောပါပျောက်ဆုံးခဲ့ရာ ၂၀၂၀ ပြည့်နှစ်၊ ဇူလိုင်၃ရက်နံနက် ၉နာရီအချိန်ထိ ရုပ်အလောင်း ၁၆၃ လောင်း နှင့် ထိခိုက်ဒဏ်ရာရရှိသူ ၄၃ ဦး ရှိပြီဖြစ်ကြောင်း သိရပါသည်။

အဆိုပါ ဖြစ်စဉ်တွင် ကချင်ပြည်နယ်ကြက်ခြေနီကြီးကြပ်မှုကော်မတီ၏ ကြီးကြပ်မှုဖြင့် ဖားကန့်မြို့နယ် ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် ၅၅ ဦးတို့က ရှာဖွေကယ်ဆယ်ရေးနှင့် ထိခိုက် ဒဏ်ရာရရှိသူများကို ရှေးဦးပြုစုပြီး ဖားကန့်နှင့် မြစ်ကြီးနားဆေးရုံများသို့ ပို့ဆောင်ခြင်းများကို ဌာနဆိုင်ရာများ၊ လူမှုရေးအဖွဲ့အစည်းများနှင့် အတူ ဆက်လက်ပြီး အနီးကပ်ပူးပေါင်း ဆောင်ရွက်လျက် ရှိသည်။

ရှာဖွေကယ်ဆယ်ရေးဆောင်ရွက်ရာတွင် လက်လုပ်ဖောင်နှင့် လှေများကိုသာ အားထားအသုံးပြုလျက် ရှိပြီး လက်ရှိအချိန်တွင် မိုးရွာသွန်းမှု ရပ်ဆိုင်းနေသော်လည်း နောက်ထပ်ဖြစ်ပေါ်လာနိုင်သည့် မြေပြိုမှု များနှင့် ကမ်းပါးပဲ့ကျမှုများဖြစ်ပေါ်နိုင်သဖြင့် ရှာဖွေကယ်ဆယ်ရေးလုပ်ဆောင်ရာတွင် အထူးဂရုစိုက် ဆောင်ရွက်လျက်ရှိပါသည်။

အသင်းဌာနချုပ်အနေဖြင့်လည်း ထိခိုက်ဒဏ်ရာရရှိသူ ၄၃ ဦးအတွက် အမျိုးသားသုံး တစ်ကိုယ် ရေသန့် ရှင်းရေးသုံးပစ္စည်းများနှင့် အသက်ဆုံးရှုံးခဲ့သည့် မိသားစုဝင်များကို လူမှုကရုဏာအကူအညီများပေးနိုင် ရန် စီစဉ်ဆောင်ရွက်လျက်ရှိပါသည်။

လူမှုကရုဏာလုပ်ငန်းဆိုင်ရာပြန်ကြားဆက်သွယ်ရေးဌာန

မကွေး၊ ဇွန် ၂၆

၂၀၂၀ပြည့်နှစ်၊ဇွန်လ၂၆ ရက်နေ့ကမကွေးတိုင်းဒေသကြီးရေစကြိုမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် ၇ ဦးတို့သည်မြို့နယ်စည်ပင်သာယာရေးကော်မတီနှင့်ပူးပေါင်းကာ COVID-19ရောဂါကာကွယ်ရေးအတွက် ယာယီဈေးအတွင်းလက်သန့်ဆေးရည်များပေးဝေခြင်း၊ နှာခေါင်းစည်းများစနစ်တကျအသုံးပြုရေးအသိပညာပေးခြင်းနှင့်အခြေခံလူတန်းစားများအားငွေကြေးထောက်ပံမှုလုပ်ငန်းများတွင်ကူညီပေးခြင်းတို့ကိုဆောင်ရွက်ခဲ့ကြပါသည်။