ချစ်ခင်အားထားရပါသော ကြက်ခြေနီစေတနာလုပ်အားရှင်များ၊ ကြက်ခြေနီအသင်းဝင်တပ်ဖွဲ့ဝင်များ ခင်ဗျာ –

ဒီနေ့ဟာ မင်္ဂလာရှိလှတဲ့ ၂၀၂၄ ခုနှစ် နှစ်သစ်ကို စတင်မည့် နေ့ရက်ကောင်းဖြစ်ပါတယ်။ နှစ်ဟောင်းကုန်လို့ နှစ်သစ်ကူးပြောင်းတဲ့ ဒီလိုမင်္ဂလာရှိတဲ့ နှစ်သစ်ရဲ့ ပထမဆုံးနေ့မှာ ကျက်သရေ မင်္ဂလာအပေါင်းနဲ့ ပြည်စုံကာ ကိုယ်စိတ်နှစ်ပါး ရွှင်လန်းချမ်းမြေ့ပါစေကြောင်း ဆုမွန်ကောင်းတောင်းရင်း ဦးစွာပထမ နှုတ်ခွန်းဆက်သလိုက် ပါတယ်။

ယနေ့ ကမ္ဘာ့နိုင်ငံအသီးသီးမှာ ထောင်ပေါင်းများစွာသော ကြက်ခြေနီစေတနာလုပ်အားရှင်များဟာ အကြောင်း အမျိုးမျိုးကြောင့် ဘေးအန္တရာယ်အမျိုးမျိုး၊ ပဋိပက္ခအမျိုးမျိုးနဲ့ ကပ်ရောဂါဆိုးတွေကြောင့် ထိခိုက်ခံစားရသူ တွေအတွက် လူသားချင်းစာနာထောက်ထားမှုအကူအညီများကို တတ်စွမ်းသမျှ လက်လှမ်းမီသရွေ့ ကူညီ ဆောင်ရွက်ပေးနေကြတဲ့အတွက် ဝမ်းမြောက်ဂုဏ်ယူမိသလို တစ်ဖက်မှာလည်း အချို့သော ကြက်ခြေနီ စေတနာလုပ်အားရှင်တွေ ကိုယ်တိုင်ပင်လျှင် အကူအညီပေးရင်း ဘေးအန္တရာယ်ခံစားခဲ့ကြရတာကို တွေ့မြင် ကြားသိ ခဲ့ရတဲ့အတွက်လည်း စိတ်နှလုံး မချမ်းမြေ့ဖြစ်ခဲ့ရပါတယ်။

နိုင်ငံအတွင်းမှာလည်း ဒေသအသီးသီးက ကြက်ခြေနီစေတနာလုပ်အားရှင်များက ကျရာအခန်းကဏ္ဍမှာ ပါဝင် ကူညီလုပ်ဆောင်ပေးနေကြတဲ့အတွက် အထူးပင်ကျေးဇူးတင်ဂုဏ်ယူရပါတယ်။ အသင်းအနေဖြင့်လည်း ကိုယ့် ကြက်ခြေနီစေတနာလုပ်အားရှင်တွေရဲ့လိုအပ်ချက်အားလုံးကို မဖြည့်ဆည်းပေးနိုင်သော်လည်း လက်လှမ်းမီသ၍ ထောက်ပံ့ပေးနိုင်အောင် ဆောင်ရွက်ပေးလျက်ရှိပါတယ်။ ဆက်လက်ပြီးလည်း ကျွန်တော်တို့ရဲ့ ကြက်ခြေနီ စေတနာလုပ်အားရှင်တွေရဲ့ စွမ်းဆောင်ရည် ပိုမိုကောင်းမွန်စေမည့် သင်တန်းများ၊ နည်းပညာများ၊ ရှေးဦးပြုစု ခြင်းဆိုင်ရာ အထောက်အကူပစ္စည်းများကိုလည်း ပံ့ပိုးနိုင်ဖို့ ကြိုးစားလုပ်ဆောင်သွားမှာ ဖြစ်ပါတယ်။ ကြက်ခြေနီစေတနာလုပ်အားရှင်များအနေဖြင့် ဒေသအလိုက် မိမိတို့ အခန်းကဏ္ဍ အသီးသီးမှာ ရပ်ရွာလူထု အတွင်း တတ်နိုင်သည့်ဘက်က ပူးပေါင်းပါဝင်ဆောင်ရွက်ရင်း အရေးကြီးဆုံးဖြစ်တဲ့ ရပ်ရွာလူထု ဘေးဒဏ် ကြံ့ကြံ့ခံ နိုင်စွမ်းမြင့်မားရေးအတွက် ဝိုင်ဝန်းကြိုးစား လုပ်ဆောင်ပေးကြပါလို့ တိုက်တွန်းလိုပါတယ်။

ချစ်ခင်လေးစားအပ်ပါတဲ့ ကြက်ခြေနီစေတနာလုပ်အားရှင်များ၊ ကြက်ခြေနီတပ်ဖွဲ့ဝင်၊ အသင်းဝင်များနဲ့ မိဘ ပြည်သူအပေါင်းတို့ ခင်ဗျာ –

ယခုလို နှစ်သစ်မင်္ဂလာအခါသမယမှာ ကြက်ခြေနီနှင့် အများပြည်သူ အတူလက်တွဲကာ ပိုမိုကျန်းမာကြံ့ခိုင် သော လူမှုဘဝ ပတ်ဝန်းကျင်မှာနေထိုင်ရင်း ထပ်မံကြုံတွေ့လာနိုင်သည့် ဘေးဒုက္ခအန္တရာယ်များအတွက် ကြို တင်ပြင်ဆင်မှုနှင့် ထိရောက်တဲ့ တုံ့ပြန်နိုင်မှုတို့အပေါ် တာဝန်သိမှု၊ တာဝန်ယူမှု အပြည့်ဖြင့် အသင်း၏ ဂုဏ် သိက္ခာနှင့် ပုံရိပ်ကို ထိန်းသိမ်းကာ ကြက်ခြေနီအခြေခံမူ(၇)ချက်နဲ့အညီ မွန်မြတ်လှတဲ့ လူမှုကရုဏာခရီးလမ်း ကို မည်သို့သော စိန်ခေါ်မှု၊ အခက်အခဲများ ကြုံတွေ့စေကာမူ ကျွန်တော်တို့အားလုံး အတူတကွ ဖြေရှင်း ကျော်လွှား ကြရအောင်ပါ။

တဆက်တည်းမှာပဲ မြန်မာနိုင်ငံကြက်ခြေနီအသင်းမှ ရပ်ရွာလူထုအတွက် ဆောင်ရွက်နေတဲ့ ဘေးအန္တရာယ် တုံ့ပြန်ရေးလုပ်ငန်းတွေ အတွက် လူအား၊ ငွေအား၊ ပစ္စည်းအားဖြင့် တတ်စွမ်းသရွေ့ ပံ့ပိုးကူညီပေးနေကြတဲ့ ပြည်တွင်းက အလှူရှင်များ၊ နိုင်ငံတကာက အလှူရှင်များ၊ အပြည်ပြည်ဆိုင်ရာ ကြက်ခြေနီ ကော်မတီ၊ အပြည် ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်းနှင့် မိတ်ဖက်ကြက်ခြေနီအသင်းများ အားလုံး ကို မြန်မာနိုင်ငံကြက်ခြေနီ အသင်းနှင့် ရပ်ရွာလူထုကိုယ်စား အထူးပင် ကျေးဇူးတင်ရှိပါတယ်။

၂၀၂၄ ခုနှစ် နှစ်သစ်မှစကာ ကြက်ခြေနီ အခြေခံမူ(၇)ချက်နှင့်အညီ ပြည်သူလူထုအတွက် လူသားချင်း စာနာ ထောက်ထားမှု လုပ်ငန်းများကို ကျွန်ုပ်တို့အတူ ဆောင်ရွက်ရင်း အသင်း၏ ဂုဏ်သိက္ခာနှင့် ပုံရိပ်ကို ဆက်လက် ထိန်းသိမ်းကြပါစို့လို့ ဆန္ဒပြုရင်း နှစ်သစ်အခါသမယမှာ ကျန်းမာပျော်ရွှင် လိုရာဆန္ဒ ပြည့်ဝကြပါစေလို့ ဆုတောင်း မေတ္တာပို့သလိုက်ပါတယ်။

ပါမောက္ခဒေါက်တာမျိုးညွန့်

ဥက္ကဌ

မြန်မာနိုင်ငံကြက်ခြေနီအသင်း