| RMS

၂ဝ၂ဝ ပန်းတိုင်များနှင့်မဟာဗျူဟာ

၂၁ ရာစုတွင် လူမှုကရုဏာဆိုင်ရာ အခြေအနေပြောင်းလဲလာခြင်းနှင့်အတူ မြန်မာနိုင်ငံကြက်ခြေနီ အသင်းသည် ၂၀၂၀ မဟာဗျူဟာတွင် လူထုအခြေပြု ဘေးဒဏ်ကြံ့ကြံ့ခံနိုင်ရေးလုပ်ငန်းများကို ပိုမိုအလေးထားဆောင်ရွက်လာခဲ့သည်။ အရည်အချင်းပြည့်ဝသော စေတနာလုပ်အားရှင်များသည် ရပ်ရွာလူထုအား ၎င်းတို့ဒေသတွင်ဖြစ်ပွားလေ့ရှိသည့် ဘေးအန္တရာယ်များနှင့် ၎င်းတို့၏ အားသာချက် များကို သတ်မှတ်သိရှိနိုင်စေရန် အကူအညီပေးသည်။ ထို့နောက် ရပ်ရွာလူထုအနေဖြင့် ရင်ဆိုင် ရသည့် အခက်အခဲများကို ၎င်းတို့ကိုယ်တိုင် ဖြေရှင်းနိုင်ရန်အတွက် လိုအပ်သော ကျွမ်းကျင်မှုများ ရရှိ လာစေရန် ကူညီပံ့ပိုးပေးသည်။ ကြက်ခြေနီအသင်းက ဆောင်ရွက်သည့် စီမံကိန်းတိုင်းသည် ရေရှည် တည်တံ့ရေးနှင့် ဘေးဒဏ်ကြံ့ကြံ့ခံနိုင်ရေးကို အလေးထား ဆောင်ရွက်လျက် ရှိသည်။
မြန်မာနိုင်ငံကြက်ခြေနီအသင်း၏ ၂၀၂၀ မဟာဗျူဟာ ရည်မှန်းချက် အကျဉ်းချုပ်မှာ အောက်ပါအတိုင်း ဖြစ်ပါသည်။

မဟာဗျူဟာ ရည်မှန်းချက်များနှင့် လုပ်ဆောင်ရန်အချက်များ

မဟာဗျူဟာ ပန်းတိုင် ၁

ပိုမိုကျန်းမာလုံခြုံစေပြီး ဘေးအန္တရာယ်ကျရောက်လွယ်မှု လျော့ပါးစေခြင်းဖြင့် ရပ်ရွာလူထုများ၏ ဘေးဒဏ်ကြံ့ကြံ့ခံနိုင်စွမ်းကို မြှင့်တင်ပေးရန်

  • အရေးပေါ်ကျန်းမာရေး အခြေအနေများ၊ သဘာဝဘေးအန္တရာယ်များ၊ ပဋိပက္ခများနှင့် အခြားသော မငြိမ်မသက်ဖြစ်မှုအခြေအနေများကြောင့် ထိခိုက်ဆုံးရှုံးမှုကို လျော့ပါးစေရန်နှင့် ရာသီဥတုပြောင်းလဲ ခြင်းကြောင့် ထိခိုက်ဆုံးရှုံးနိုင်မှုများကို လျှော့ချရန်အတွက် ရပ်ရွာလူထု၏ စွမ်းဆောင်ရည်ကို တိုးမြှင့်ရန်။
  • အသင်းအဆင့်တိုင်းတွင်ထိရောက်သော ဘေးအန္တရာယ် ကြိုတင်ပြင်ဆင်ရေးနှင့် တုံ့ပြန်ရေးဆိုင်ရာ စွမ်းရည်များ ရရှိစေရန်။
  • လေ့ကျင့်ထားသော ဝန်ထမ်းများ၊ စေတနာလုပ်အားရှင်များနှင့် အဓိကပါဝင်ပတ်သက်သူများ၏ အကူအညီဖြင့် ကျန်းမာရေး၊ ရေနှင့် ပတ်ဝန်းကျင်သန့်ရှင်းရေးဆိုင်ရာ လိုအပ်ချက်များကို ဖော်ထုတ် ဖြေရှင်းနိုင်သော ရပ်ရွာလူထု၏ စွမ်းရည်ကို တိုးမြှင့်လာစေရန်။
  • သဘာဝဘေးအန္တရာယ်များနှင့် နေ့စဉ်ကြုံတေ့ွရသော အရေးပေါ်အခြေအနေများတွင် ထိရောက် အကျိုးရှိပြီး ရေရှည်တည်တံ့နိုင်သော ရှေးဦးပြုစုခြင်းနှင့် အန္တရာယ် ကင်းရှင်းရေး လုပ်ငန်းများ ဆောင်ရွက်နိုင်ရန် လေ့ကျင့်ထားသည့် ဝန်ထမ်းများ၊ စေတနာလုပ်အားရှင်များနှင့် ရပ်ရွာလူထု၏ အရည်အသွေးကို တိုးမြှင့်ပေးရန်။
  • နိုင်ငံ၏ တိုးမြင့်လာသော သွေးသန့် လိုအပ်ချက်ကို ဖြည့်ဆည်းနိုင်ရန်အတွက် စေတနာသွေးသန့် သွေးလှူဒါန်းမှုအစီအစဉ်ကို ပိုမိုအားကောင်းလာစေရန်။
  • ကြံ့ကြံ့ခံနိုင်သော ရပ်ရွာလူထုများ ဖြစ်လာစေရန်အတွက် စံသတ်မှတ်ထားသော နည်းလမ်းတစ်ခု အဖြစ် ရပ်ရွာလူထုအခြေပြု နည်းလမ်းကို ရေးဆွဲလိုက်နာကျင့်သုံးရန်။

မဟာဗျူဟာပန်းတိုင် ၂

ကြက်ခြေနီအခြေခံမူများ၊ လူမှုကရုဏာလုပ်ငန်းဆိုင်ရာ တန်ဖိုးထားမှုများ၊ အပြည်ပြည်ဆိုင်ရာ လူသားချင်း စာနာထောက်ထားမှုဥပဒေတို့အပေါ် ပိုမိုလေးစားတန်ဖိုးထားလာအောင် ဆောင်ရွက်ပြီး ငြိမ်းချမ်းသော လူ့ဘောင်ယဉ်ကျေးမှု ဖြစ်ထွန်းလာအောင် ဆောင်ရွက်ခြင်း

  • အသင်းဝင်များ၊ ဝန်ထမ်းများ၊ လူငယ်များ၊ စေတနာလုပ်အားရှင်များ အစရှိသည့် အဆင့်တိုင်းက လူသားချင်း စာနာထောက်ထားမှုဆိုင်ရာ လူမှုဆက်ဆံရေးကို ဆောင်ရွက်နိုင်ရန်အတွက် စွမ်းရည်မြှင့်တင်ပေးခြင်းဖြင့် ဘေးအန္တရာယ်ကျရောက်လွယ်သူများကို ကူညီထောက်ပံ့နိုင်ရန်။
  • နိုင်ငံအတွင်း ကြက်ခြေနီ၏ အခန်းကဏ္ဍ၊ အခြေခံမူများ၊ အမှတ်အသား၊ လူမှုကရုဏာ တန်ဖိုးနှင့် အပြည်ပြည်ဆိုင်ရာလူသားချင်းစာနာထောက်ထားမှုဥပဒေပြန့်ပွားရေးအတွက် တိုးမြှင့်ဆောင်ရွက်ရန်။
  • အရေးပေါ်နှင့် သာမန်အချိန်အချိန်များတွင် ထိရောက်သော ပြန်ကြားဆက်သွယ်ရေး၊ သတင်းအချက်အလက် ရယူမျှဝေရေးနှင့် အစီရင်ခံရေး လုပ်ငန်းများ အဆင်ပြေချောမွေ့စေရန် အသင်းအဆင့်တိုင်း၏ ပြန်ကြားဆက်သွယ်ရေး၊ သတင်းအချက်အလက်နှင့် နည်းပညာဆိုင်ရာ စွမ်းရည်များ အားဖြည့်မြှင့်တင်ရန်။
  • လူမှုအသိုင်းအဝိုင်းများတွင် လူတိုင်းပါဝင်ဆောင်ရွက်ခွင့် ရရှိလာစေရေးနှင့် ထိခိုက်နစ်နာခြင်း မရှိသော ငြိမ်းချမ်းသည့် ပတ်ဝန်းကျင် ထူထောင်နိုင်ရေးအတွက် ကူညီဆောင်ရွက်ပေးခြင်းဖြင့် ကြံ့ကြံ့ခံနိုင်စွမ်းရှိသည့် ရပ်ရွာလူထု ဖြစ်လာစေရန်။
  • • လူမှုကရုဏာလုပ်ငန်းများတွင် ကျား/မ မတူကွဲပြားမှုနှင့် ကွဲပြားခြားနားမှု၊ ထိခိုက်နစ်နာစေမှု လျော့ပါးရေး၊ စိတ်ပိုင်းလူမှုပိုင်းဆိုင်ရာ အားပေးကူညီမှု၊ လူတိုင်းပါဝင်ဆောင်ရွက်ခွင့်ရှိမှုနှင့် ရပ်ရွာလူထုနှင့်အတူ လက်တွဲဆောင်ရွက်မှု စသည်တို့ကို ကဏ္ဍစုံနှင့် ဆက်စပ်သည့် ကိစ္စရပ်များ (Cross-Cutting Issues) အဖြစ် ဆောင်ရွက်ရန်။

မဟာဗျူဟာပန်းတိုင် ၃

အသင်း၏အဆင့်တိုင်းတွင် ခိုင်မာသော စွမ်းရည်နှင့် အရင်းအမြစ်များကို ထိရောက်စွာ အသုံးပြု လာနိုင်စေရန်

  • အသင်းဥပဒေနှင့်အညီ အရန်အင်အားအခန်းကဏ္ဍကို အားဖြည့်ဆောင်ရွက်နေစဉ် အသင်းအဆင့် တိုင်း ပိုမိုဖွံ့ဖြိုးတိုးတက်လာအောင် ဆောင်ရွက်ရန်။
  • လူမှုကရုဏာဆိုင်ရာ လိုအပ်ချက်များကို ဖြည့်ဆည်းတုံ့ပြန်နိုင်ရန်အတွက် တိုင်းဒေသကြီး/ ပြည်နယ် နှင့် အသင်းခွဲများ၏ စွမ်းဆောင်ရည် တိုးတက်မြင့်မားလာရန်။
  • လူမှုကရုဏာအကူအညီများအတွက် ကျွမ်းကျင်စေတနာလုပ်အားရှင်များကို စည်းရုံးလေ့ကျင့် ထိန်းသိမ်းသွားရန်။
  • အသင်း၏ လုပ်ငန်းများတွင် ပါဝင်သော ဝန်ထမ်းများနှင့် စေတနာလုပ်အားရှင်များ၏ စွမ်းရည်၊ စွမ်းဆောင်နိုင်မှုနှင့် အကာအကွယ်ပေးနိုင်မှုများကို တိုးမြှင့်ရန်။
  • ကွဲပြားခြားနားသော အရည်အချင်း၊ ကျွမ်းကျင်မှုနှင့် အတွေ့အကြုံရှိသော စေတနာလုပ်အားရှင် များနှင့် အသင်းဝင်များ၏ တက်ကြွစွာပါဝင်မှုကို အားပေးရန်။
  • လူငယ်များကို လူမှုကရုဏာလုပ်ငန်းများတွင် တက်ကြွစွာ ပိုမိုပါဝင်လာစေရေးနှင့် ဦးဆောင်လာစေ ရေး အခွင့်အလမ်းပေးရန်။
  • အသင်းအဆင့်တိုင်းတွင် အမှီအခိုကင်းစွာ ရေရှည်တည်တံ့၍ လုံလောက်သည့် ကိုယ်ပိုင်ရန်ပုံငွေ ရရှိရေးအတွက် အရင်းအမြစ်များ စုစည်းအသုံးချနိုင်သော စွမ်းရည်ကို တိုးမြှင့်ရန်။
  • တာဝန်ခံနိုင်မှု၊ စွမ်းဆောင်နိုင်မှုနှင့် ထိရောက်မှုများ တိုးမြှင့်နိုင်ရေးအတွက် အစီအစဉ်ရေးဆွဲခြင်း၊ စောင့်ကြည့်လေ့လာခြင်း၊ အကဲဖြတ်ဆန်းစစ်ခြင်းနှင့် အစီရင်ခံခြင်းဆိုင်ရာ စွမ်းရည်များ (PMER) ကို ပိုမိုအားဖြည့်ရန်။
  • ဘေးဒုက္ခကျရောက်လွယ်သူများအတွက် ထောက်ပံ့ပေးသော ရန်ပုံငွေများကို ပွင့်လင်းမြင်သာမှု၊ တာဝန်ခံနိုင်မှုတို့ဖြင့် ထိရောက်စွာသုံးစွဲပြီး ပံ့ပိုးမှု အချိန်မီပေးခြင်းဖြင့် အဆင့်တိုင်းတွင် ဘဏ္ဍာရေးစီမံ ခန့်ခွဲမှုစနစ်နှင့် စွမ်းရည်ပိုမိုအားကောင်းလာစေရန်။
  • အရည်အချင်းပြည့်မီ၍ တာဝန်ခံဆောင်ရွက်သည့် ဝန်ထမ်းများ ရေရှည်တည်တံ့နိုင်ရေးအတွက် လူသားအရင်းအမြစ် စီမံခန့်ခွဲမှုစနစ်နှင့် လုပ်ထုံးလုပ်နည်းများကို ပိုမိုအားဖြည့်ပေးရန်။
  • ကြက်ခြေနီလှုပ်ရှားမှုများအတွင်း ပါဝင်ကူညီဆောင်ရွက်ပေးရန်အတွက် အသင်း၏ စွမ်းဆောင်ရည် ကို ပိုမိုခိုင်မာစေရန်။
  • သဘောတူညီထားသော ပူးပေါင်းးဆောင်ရွက်မှုမူဘောင်အားဖြင့် ပိုမိုထိရောက်သော ညှိနှိုင်း ဆောင်ရွက်မှုစနစ်ကို လက်ခံဆောင်ရွက်ရန်။