22/ Feb/ 2022

မွန်ပြည်နယ်တွင် ကြက်ခြေနီက လူမှုကရုဏာလုပ်ငန်းများ ဆောင်ရွက်လျက်ရှိ

COVID-19 ရောဂါကူးစက်မှုနှုန်း မြင့်တက်လာသည်နှင့်အမျှ ကြက်ခြေနီစေတနာလုပ်အားရှင်များကလည်း ရောဂါကူးစက်မှုလျော့ချရေးနှင့် ကာကွယ်ရေးလုပ်ငန်းများတွင် ကူညီဆောင်ရွက်ပေးလျက်ရှိရာ မွန်ပြည်နယ်အတွင်းရှိ မြို့နယ်အသီးသီးမှ ကြက်ခြေနီစေတနာလုပ်အားရှင်များသည် COVID-19 ရောဂါပိုးရှိ/မရှိ စစ်ဆေးပေးခြင်း၊ ရောဂါပိုးတွေ့ရှိသူများအား သီးသန့်လူနာဆောင် (Isolation Ward)သို့ ပို့ဆောင်ပေးခြင်း၊ ပိုးသတ်ဆေးဖြန်းခြင်း၊ ကာကွယ်ရေးဆိုင်ရာ အသိပညာပေးခြင်း၊ စိတ်ပိုင်းဆိုင်ရာအားပေးကူညီခြင်းနှင့် ကာကွယ်ဆေးထိုးခြင်း စသည့်လုပ်ငန်းများကို ကူညီဆောင်ရွက်ပေးလျက်ရှိပါသည်။
၂၀၂၂ခုနှစ်၊ ဖေဖော်ဝါရီလ (၁၁)ရက်နေ့မှစတင်၍ ကျိုက်ထိုမြို့နယ်ကြက်ခြေနီအသင်းခွဲမှ ကြက်ခြေနီ စေတနာလုပ်အားရှင် (၁၄)ဦးတို့သည် သိမ်ဇရပ်မြို့နယ် အခြေခံပညာအထက်တန်းကျောင်းတွင် COVID-19 ရောဂါပိုး ရှိ/မရှိ စစ်ဆေးပေးခဲ့ပြီး ရောဂါပိုးတွေ့ ရှိသူများအား သီးသန့်လူနာဆောင် (Isolation Ward) သို့ ပို့ဆောင်ပေးခြင်း၊ ကျောင်းပတ်ဝန်းကျင်အား ပိုးသတ်ဆေးဖြန်းခြင်း၊ ရောဂါကာကွယ်ရေး အသိပညာပေးခြင်း လုပ်ငန်းများကိုဆောင်ရွက်လျက်ရှိပါသည်။
အလားတူ သထုံမြို့နယ်မှ ကြက်ခြေနီစေတနာလုပ်အားရှင် (၆)ဦးတို့သည်လည်း သထုံမြို့နယ် ကြာပန်းကျေးရွာမှ ဖျားနေသော သံဃာတော်များအား COVID-19 ရောဂါပိုးစစ်ဆေးရန် ခရိုင်ဆေးရုံသို့ ကြက်ခြေနီလူနာတင်ယာဉ်ဖြင့် ပို့ဆောင်ပေးခြင်း၊ ပိုးတွေ့သံဃာတော်များအား သီးသန့်လူနာဆောင် (Isolation Ward) သို့ပို့ဆောင်ပေးခြင်း၊ ပိုးသတ်ဆေးဖြန်းခြင်း၊ အသိပညာပေးခြင်းနှင့် ကာကွယ်ဆေးထိုးခြင်းလုပ်ငန်းများကို တာဝန်ရှိသူများနှင့် ပူးပေါင်းဆောင်ရွက်ခဲ့ပါသည်။
ထို့အပြင် ပေါင်မြို့နယ်ပြည်သူ့ဆေးရုံရှိ သီးသန့်လူနာဆောင်(Isolation Ward) တွင် ထားရှိသော ပိုးတွေ့လူနာများအတွက် နေရာထိုင်ခင်း၊ အစားအသောက်၊ ဆေးဝါး၊ အောက်ဆီဂျင်ရရှိရေးနှင့် စိတ်ပိုင်းဆိုင်ရာ အားပေးကူညီခြင်းတို့ကို မြို့နယ်မှ ကြက်ခြေနီစေတနာလုပ်အားရှင်(၁၂)ဦးက နေ့စဉ် ကူညီဆောင်ရွက်ပေးလျက်ရှိပါသည်။ ထို့အတူ ပေါင်မြို့နယ်ပြည်သူ့ဆေးရုံမှ COVID-19 လူနာများအား လိုအပ်ချက်အရ မော်လမြိုင်ပြည်သူ့ဆေးရုံကြီးသို့ ပို့ဆောင်ပေးခြင်းနှင့် သီးသန့်လူနာဆောင်(Isolation Ward)အတွင်း လိုအပ်သည့် အထွေထွေကိစ္စရပ်များကို ကူညီဆောင်ရွက်ပေးလျက်ရှိပါသည်။
သံဖြူဇရပ်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များကလည်း ဖေဖော်ဝါရီလ (၁၄)ရက်နေ့မှစ၍ သံဖြူဇရပ်မြို့နယ်ရှိ အခြေခံပညာအထက်ကျောင်း (၆) ကျောင်းတွင် COVID-19 ရောဂါကာကွယ်ရေးဆိုင်ရာ အသိပညာပေးဆွေးနွေးမှုများပြုလုပ်ခဲ့ပြီး မျက်နှာအကာ၊ လက်ဆေးဆပ်ပြာဆီနှင့် လက်သန့်ဆေးရည်များ ဖြန့်ဝေပေးခဲ့ပါသည်။
ထို့နောက် ဖေဖော်ဝါရီလ (၂၀)ရက်နေ့တွင် ကျိုက္ခမီမြို့မှ ကြက်ခြေနီစေတနာလုပ်အားရှင်(၂၀)ဦးတို့သည် ရပ်ကွက်နှင့်ကျောင်းများတွင် ပိုးသတ်ဆေးဖြန်းခြင်း၊ အသိပညာပေးခြင်း၊ စိတ်ပိုင်းဆိုင်ရာ အားပေးကူညီခြင်း၊ ရောဂါပိုးတွေ့ရှိသူနှင့် ထိတွေ့မှုရှိသူများအား ရောဂါပိုးစစ်ဆေးပေးခြင်း၊ ပို့တွေ့ရှိသူများအား ကြက်ခြေနီလူနာတင်ယာဉ်များဖြင့် သီးသန့်လူနာဆောင် (Isolation Ward) သို့ ပို့ဆောင်ကူညီပေးခဲ့သည်။ ထို့အတူ ကျိုက္ခမီဆေးရုံမှ လူနာများအား လိုအပ်ချက်အရ သံဖြူဇရပ်နှင့် မော်လမြိုင်ဆေးရုံများသို့ ပို့ဆောင်ပေးခြင်းနှင့် အခြားသော အထွေထွေကိစ္စရပ်များကို ကူညီဆောင်ရွက်ပေးလျက်ရှိပါသည်။
ထို့အပြင် မုဒုံမြို့နယ်မှ ကြက်ခြေနီစေတနာလုပ်အားရှင်များအတွက် ရှေးဦးပြုစုခြင်း (အခြေခံ) သင်တန်းကို ဖေဖော်ဝါရီလ (၁၈) ရက်နေ့မှ (၂၀) ရက်နေ့အထိ မုဒုံမြို့နယ်ကြက်ခြေနီအသင်းခွဲမှ တာဝန်ရှိသူများက ဖွင့်လှစ်ပို့ချပေးခဲ့ပါသည်။

Read More

  21/ Feb/ 2022

မူဆယ်တွင် ကြက်ခြေနီက COVID 19 ရောဂါကာကွယ်ရေး ဆက်လက်ဆောင်ရွက်

မူဆယ်မြို့နယ်တွင် COVID 19ရောဂါကူးစက်မှု မဖြစ်ပွားစေရေးအတွက် ကြက်ခြေနီစေတနာလုပ်အားရှင်များက မူဆယ်မြို့မဈေးနှင့် အနီးတဝိုက်ရှိ လမ်းသွားလမ်းလာများအား နှာခေါင်းစည်းဝတ်ဆင်ရန်နှိုးဆော်ခြင်း၊ နှာခေါင်းစည်းများ အခမဲ့ပေးဝေခြင်းနှင့် ကိုဗစ်ရောဂါကာကွယ်ရေးလိုက်နာဆောင်ရွက်ရမည့် အချက်အလက်များပါရှိသော လက်ကမ်းစာစောင်များဖြန့်ဝေပေးခြင်းတို့ကို ပြုလုပ်ခဲ့ကြပါသည်။ ထိုသို့ ပြုလုပ်ရာတွင် မူဆယ်ခရိုင်ကြက်ခြေနီကြီးကြပ်မှုကော်မတီနှင့် မူဆယ်မြို့နယ်ကြက်ခြေနီအသင်းခွဲများမှ စေတနာလုပ်အားရှင်များပူးပေါင်းကာ ဖေဖော်ဝါရီလ ၁၈ရက်နေ့မှ ၂၀ရက်နေ့အထိ ၃ရက်တာ ဆောင်ရွက်ခဲ့ကြခြင်းဖြစ်ပါသည်။  

Read More

  15/ Feb/ 2022

မီးလောင်မှုဖြစ်ပွားမှုကြောင့် ထိခိုက်ခံစားရသည့်အိမ်ထောင်စုများအား ကြက်ခြေနီက ထောက်ပံ့ကူညီ

အင်းစိန်၊ ဖေဖော်ဝါရီလ (၁၅)ရက်။
၂၀၂၂ခုနှစ်၊ ဖေဖော်ဝါရီလ (၁၂)ရက်နေ့က ရန်ကုန်တိုင်းဒေသကြီး၊ အင်းစိန်မြို့နယ်၊ မြို့သစ်(ဂ)ရပ်ကွက်၊ ပိတောက်လမ်းတွင် မီးလောင်မှုဖြစ်ပွားခဲ့ပြီး နေအိမ်(၁၅)လုံး မီးဘေးသင့်ခဲ့သဖြင့် အင်းစိန်မြို့နယ်ကြက်ခြေနီအသင်းခွဲမှ တာဝန်ရှိသူများနှင့် ကြက်ခြေနီစေတနာလုပ်အားရှင်များက သွားရောက်ကူညီထောက်ပံ့ပေးခဲ့ကြပါသည်။
ထိုသို့ကူညီရာတွင် ထိခိုက်ခံစားရသည့် အိမ်ထောင်စုများအတွက် မိသားစုသုံးပစ္စည်း(၁၅)စုံ၊ တစ်ကိုယ်ရည်သန့်ရှင်းရေးသုံးပစ္စည်း(၁၅)စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၁၅)စုံ၊ အိမ်ဆောက်အထောက်အကူပြုပစ္စည်း (၁၅)စုံတို့ကို ပေးအပ်ခဲ့ကြပြီး စိတ်ပိုင်းဆိုင်ရာအားပေးကူညီမှုများကို ပြုလုပ်ပေးခဲ့ကြပါသည်။

Read More

  14/ Feb/ 2022

တနင်္သာရီတိုင်းဒေသကြီးမှ ကြက်ခြေနီများ၏ COVID-19 ရောဂါကာကွယ်ရေးလှုပ်ရှားမှုများ

ထားဝယ်၊ ၂၀၂၂ခုနှစ်၊ ဖေဖော်ဝါရီလ(၁၄)ရက်။
COVID-19 ရောဂါကာကွယ်ရေးလုပ်ငန်းများဆောင်ရွက်ရာတွင် ကြက်ခြေနီစေတနာလုပ်အားရှင်များသည် ကျရာနေရာမှ ပါဝင်ကူညီ ဖြည့်ဆည်းပေးလျက် ရှိပါတယ်။
ယခုလို ဆောင်ရွက်ရာတွင် တနင်္သာရီတိုင်းဒေသကြီး တနင်္သာရီမြို့နယ်ကြက်ခြေနီတပ်ဖွဲ့မှ ကြက်ခြေနီစေတနာလုပ်အားရှင်များသည် မြို့နယ်ဆရာဝန်၊ တိုက်နယ်ဆရာဝန်များပါဝင်သည့် အဖွဲ့များနှင့် ပူးပေါင်းပြီး မောတောင်မြို့၌ COVID-19ရောဂါ ရှာဖွေစစ်ဆေးခြင်းများကို ပြုလုပ်ခဲ့တယ်လို့သိရပါတယ်။
ထားဝယ်မြို့နယ်နှင့် ရေဖြူမြို့နယ်နှင့် သရက်ချောင်းမြို့နယ်တို့မှ ကြက်ခြေနီစေတနာလုပ်အားရှင်များကလည်း အသိပညာပေးခြင်း ၊ နှာခေါင်းစည်းများ‌ ပေးဝေခြင်း၊ လက်ကမ်းစာစောင်များဖြန့်ဝေခြင်း ဗီနိုင်းကပ်ခြင်းများကို ဆောင်ရွက်လျက်ရှိပြီး ကလိန်အောင်မြို့အဝင် ကံပေါက်လမ်းဆုံရှိ စစ်ဆေးရေးဂိတ်တွင် ဌာနဆိုင်ရာများ၊ လူမှုရေးအသင်းအဖွဲ့များနှင်အတူ COVID-19ရောဂါ ရှာဖွေစစ်ဆေးခြင်း ဆောင်ရွက်ရာတွင် ပါဝင်ကူညီလျက်ရှိပါတယ်။
ထားဝယ်မြို့နယ်နှင့် ကော့သောင်းမြို့နယ်မှ ကြက်ခြေနီ‌စေတနာလုပ်အားရှင်များကလည်း ထားဝယ်လေဆိပ်နှင့် ကော့သောင်းလေဆိပ်တို့တွင် ခရီးသည်များအား ရောဂါကာကွယ်ရေး ဆောင်ရွက်ရာတွင် ပူးပေါင်းကူညီပေးလျက်ရှိပါတယ်။
COVID-19ရောဂါကာကွယ်ရေးလုပ်ငန်းများအပြင် အကြောင်းကြောင်းကြောင့် ထိခိုက်ဒဏ်ရာရသူများအား ရှေးဦးပြုစုခြင်း၊ ဆေးကုသမှုခံယူရန် လိုအပ်သူများကို ကြက်ခြေနီလူနာတင်ယာဉ်ဖြင့် ဆေးရုံ၊ ဆေးခန်းများသို့ ကူညီပို့ဆောင်ပေးနေကြတဲ့အကြောင်းကို ထားဝယ်မြို့က ဦးမြင့်နိုင်က သတင်းပေးပို့ထားတာဖြစ်ပါတယ်။

Read More

  21/ Nov/ 2021

မရပ်မနားရှေ့ဆက်သွားကြက်ခြေနီရဲ့စုပေါင်းအား

ကြက်ခြေနီစေတနာလုပ်အားရှင်များအနေနဲ့ မိမိတို့နေထိုင်ရာ ဒေသအသီးသီမှာရှိကြတဲ့ ပြည်သူများ လိုအပ်နေတဲ့ လူမှုကရုဏာအကူအညီတွေကို စဉ်‌ဆက်မပြတ်ဆောင်ရွက် အကူအညီပေးနေကြပါတယ်။
တနင်္သာရီတိုင်းဒေသကြီး မြို့နယ်တွေရဲ့ ကြက်ခြေနီလှုပ်ရှားမှုသတင်းတွေကို ထားဝယ်မြို့မှ ဦးမြင့်နိုင်က ယခုလိုပေးပို့ထားပါတယ်။
နိုဝင်ဘာလ(၉)ရက်နေ့မှ နိုဝင်ဘာလ(၁၉)ရက်နေ့အတွင်းမှာ ထားဝယ်မြို့နယ်မှ ကြက်ခြေနီစေတနာလုပ်အားရှင်တွေက ကြက်ခြေနီလူနာတင်ယာဉ်နဲ့ လူနာ(၄၁)ဦးကို ဆေးရုံတက်ဖို့၊ ဆေးရုံပြောင်းရွေ့ဖို့နဲ့ ဆေးရုံဆင်းဖို့ အတွက် ကူညီပေးခဲ့ကြပါတယ်။ ဒါ့အပြင် အောက်စီဂျင်အိုး ရှာဖွေပို့ဆောင်ပေးတာတွေလည်း ပြုလုပ်ပေးခဲ့ကြပါတယ်။
ထားဝယ်မြို့ လေယာဥ်ကွင်းမှာ ဆိုက်ရောက်ခရီးသည်များ စာရင်းသွင်းခြင်း၊ ကိုယ်အပူချိန်တိုင်းတာခြင်းနဲ့ အရေးပေါ်ဆေးရုံပို့ရန်လိုအပ်ပါက အသုံးပြုနိုင်ရန် ကြက်ခြေနီလူနာတင်ယာဥ်(၁)စီး၊ ကြက်ခြေနီ‌စေတနာလုပ်အားရှင်(၅)ဦးတို့ဖြင့် ကူညီဆောင်ရွက်ပေးလျက်ရှိပါတယ်။
ထားဝယ်ဆေးရုံကြီးမှာ အရေးပေါ်သွေး လိုအပ်နေတဲ့ လူနာ‌အတွက် (B)သွေး (၂)လုံးနဲ့ (O)သွေး(၁)လုံးကိုတော့ ကြက်ခြေနီစေတနာလုပ်အားရှင် ဦးဝေယံနိုင်၊ ဦးအောင်မင်းဖြိုးနှင့်ဒေါ်ဆုစန္ဒီထွေး တို့က လှူဒါန်းခဲ့ကြပါတယ်။
သရက်ချောင်းမြို့နယ်မှ ကြက်ခြေနီစေတနာလုပ်အားရှင်များကလည်း ဆီတောကျေးရွာ ကျောင်းမှာ COVID-19 ရောဂါကာကွယ်နိုင်ဖို့ ပိုးသတ်ဆေးဖြန်း‌ပေးခဲ့ပြီးနှာခေါင်းစည်း၊ လက်ဆေးဂျယ််၊ မျက်နှာအကာများကို လှူဒါန်းခဲ့ပါတယ်။
ပုလောမြို့နယ်ကြက်ခြေနီစေတနာလုပ်အားရှင်များကတော့ အထက(၁)ခန်းမ COVID-19ရောဂါကာကွယ်
ဆေးထိုးစုရပ်နဲ့ ပိန်းတောကျေးရွာသို့ ကာကွယ်ဆေးထိုးအဖွဲ့သွားရောက်ရာမှာ ပါဝင်ကူညီခဲ့ကြပါတယ်။

Read More

  17/ Nov/ 2021

၁၀၀)အား Abercrombie & Kent Myanmar က ဘိုကလေးမြို့နယ်ကြက်ခြေနီအသင်းခွဲသို့ လှူဒါန်း

ဘိုကလေး၊ နိုဝင်ဘာလ (၁၇)ရက်။
COVID-19 ရောဂါကာကွယ်ရေးနှင့် တုံ့ပြန်ဆောင်ရွက်ရေးလုပ်ငန်းများ ဆောင်ရွက်ရာတွင် အသုံးပြုနိုင်ရန်အတွက် Abercrombie & Kent Myanmar မှ PPE ဝတ်စုံ (၁၀၀)အား ၂၀၂၁ခုနှစ်၊ နိုဝင်ဘာလ ၁၆ရက်နေ့က ဘိုကလေးမြို့နယ်ကြက်ခြေနီအသင်းခွဲသို့ လာရောက်လှူဒါန်းခဲ့ကြရာ မြို့နယ်ကြက်ခြေနီတပ်ဖွဲ့မှူး ဦးသက်နိုင်က လက်ခံရယူပြီး ကျေးဇူးတင်စကားပြောကြားကာ ဂုဏ်ပြုမှတ်တမ်းလွှာအား ပြန်လည်ပေးအပ်ခဲ့ပါသည်။
ဘိုကလေးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် အခြားပြည်နယ်၊ တိုင်းဒေသကြီး အသီးသီးမှ ကြက်ခြေနီစေတနာလုပ်အားရှင်များနည်းတူ COVID-19 ရောဂါစတင်ဖြစ်ပွားချိန်မှစတင်ကာ ရပ်ရွာလူထုအား အသိပညာပေးခြင်းများဆောင်ရွက်ခဲ့ကြပြီး တုံ့ပြန်ကာကွယ်ရေးလုပ်ငန်းများတွင်လည်း တက်ကြွစွာပါဝင်ဆောင်ရွက်ခဲ့ကြပါသည်။
အသွားအလာကန့်သတ်စောင့်ကြည့်ရေးစခန်းများတွင် လိုအပ်သည်များ ကူညီဆောင်ရွက်ပေးခြင်း၊ ပိုးတွေ့လူနာများအား ကုသရေးစင်တာများသို့ ပို့ဆောင်ပေးခြင်း၊ ဆေးဖြန်းပေးခြင်း၊ လူအများသွားလာတတ်သောနေရာများတွင် နှာခေါင်းစည်းများနှင့် လက်သန့်စင်ဆေးရည်များအခမဲ့ ဖြန့်ဝေပေးခြင်း၊ ကာကွယ်ဆေးထိုးလုပ်ငန်းများတွင် ကူညီဆောင်ရွက်ပေးခြင်းတို့ကိုလည်း နေ့စဉ်ဆောင်ရွက်ကူညီပေးလျှက်ရှိကြပါသည်။
ယခုကဲ့သို့ ကြက်ခြေနီလှုပ်ရှားမှုအား ယုံကြည်စွာဖြင့် ရောဂါကာကွယ်ရေးနှင့် တုံ့ပြန်ဆောင်ရွက်ရေးအတွက် လိုအပ်သည့် PPEဝတ်စုံများအား လာရောက်လှူဒါန်းပေးကြသော Abercrombie & Kent Myanmar အား မြန်မာနိုင်ငံကြက်ခြေနီအသင်းမှ ကျေးဇူးအထူးတင်ရှိပါသည်။

Read More

  28/ Oct/ 2021

(၈၄) ကြိမ်မြောက် ကြက်ခြေနီဗဟိုကောင်စီအစည်းအဝေးဖွင့်ပွဲ ကျင်းပပြုလုပ်

နေပြည်တော်၊ အောက်တိုဘာလ (၂၈) ရက်၊ ၂၀၂၁ ခုနှစ်။
မြန်မာနိုင်ငံကြက်ခြေနီအသင်း (၈၄)ကြိမ်မြောက် ကြက်ခြေနီ ဗဟိုကောင်စီအစည်းအဝေး ဖွင့်ပွဲအခမ်းအနားကို ၂၀၂၁ ခုနှစ်၊ အောက်တိုဘာလ (၂၈) ရက်၊ နံနက်က Video Conferencing စနစ်ဖြင့် ကျင်းပပြုလုပ်ခဲ့ပါသည်။ အဆိုပါ ကြက်ခြေနီဗဟိုကောင်စီအစည်းအဝေး ဖွင့်ပွဲအခမ်းအနားသို့ ကျန်းမာရေးဝန်ကြီးဌာန၊ ဒုတိယဝန်ကြီး ပါမောက္ခဒေါက်တာအေးထွန်း၊ အသင်းဥက္ကဌဒေါက်တာ မောင်မောင်မြင့်၊ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့် / အချိန်ပိုင်း အလုပ်အမှုဆောင်များ၊ နှီးနွယ်ဝန်ကြီးဌာန များမှ ညွှန်ကြားရေးမှူးချုပ်များနှင့် ဖိတ်ကြားထားသူများ၊ ကြက်ခြေနီဗဟိုကောင်စီဝင် ပြည်နယ်နှင့် တိုင်းဒေသကြီး များမှ ကြီးကြပ်မှုကော်မတီဥက္ကဋ္ဌများနှင့် ကြက်ခြေနီတပ်ဖွဲ့မှူးများ၊ အပြည်ပြည်ဆိုင်ရာ ကြက်ခြေနီ ကော်မတီနှင့် အပြည်ပြည်ဆိုင်ရာ ကြက်ခြေနီနှင့် လခြမ်းနီ အသင်းများ ဖက်ဒရေးရှင်းမှ တာဝန်ရှိသူများ၊ မိတ်ဖက်အမျိုးသား အသင်းများမှ ဌာနေကိုယ်စားလှယ်များ၊ အသင်းမှ အထွေထွေအတွင်းရေးမှူး၊ ဒုတိယအထွေထွေ အတွင်းရေးမှူးများ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ တက်ရောက်ခဲ့ကြပါသည်။ အခမ်းအနား၌ ဒုတိယဝန်ကြီးက အဖွင့်မိန့်ခွန်းပြောကြားခဲ့ပြီး အသင်းဥက္ကဌက အသင်း၏ လုပ်ငန်းဆောင်ရွက် နေမှု အခြေအနေများကို ရှင်းလင်းတင်ပြခဲ့ကာ မှတ်တမ်းတင်ဓါတ်ပုံရိုက်ကူး၍ ဖွင့်ပွဲအခမ်းအနားကို ပြီးမြောက် အောင်မြင်ခဲ့ပါသည်။
မြန်မာနိုင်ငံကြက်ခြေနီအသင်း ဥပဒေ ၂၀၁၅ အရ ကြက်ခြေနီဗဟိုကောင်စီအစည်းအဝေးကို အနည်းဆုံး တစ်နှစ် တစ်ကြိမ် ကျင်းပပြုလုပ်ခြင်းဖြစ်ပြီး မြန်မာနိုင်ငံကြက်ခြေနီအသင်း၏ ၂၀၂၁ - ၂၀၂၅ မဟာဗျူဟာ လုပ်ငန်းစဉ်များနှင့် ပတ်သက်၍ ဆောင်ရွက်ရမည့် လုပ်ငန်းများ ကို တင်ပြဆွေးနွေး သွားကြမည် ဖြစ်ပါသည်။

Read More

  21/ Sep/ 2021

ရခိုင်ပြည်နယ်မှ ကြက်ခြေနီစေတနာလုပ်အားရှင်များ၏ လှုပ်ရှားဆောင်ရွက်မှုများ

၂၀၂၁ခုနှစ်၊ စက်တင်ဘာလ (၁၉)ရက်နေ့က ရခိုင်ပြည်နယ်၊ မြောက်ဦးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် မြောက်ဦးမြို့ရှိ တိုက်ပွဲရှောင်စခန်းများ၌ သွေးတိုး၊ ဆီးချို၊ သွေးချို‌ရောဂါ ကျန်းမာရေးအသိပညာပေးခြင်းကို ပြုလုပ်ခဲ့ကြပါသည်။
ထို့အတူ စက်တင်ဘာလ (၂၀)ရက်‌နေ့ကလည်း ပေါက်တောမြို့နယ်၊ ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် သဝင်ချောင်းကျေးရွာ၌ COVID-19 ရောဂါကျန်းမာရေးအသိပညာပေးခြင်းကို ပြုလုပ်ခဲ့ပြီး နှာခေါင်းစည်းများကို ပေးဝေခဲ့ကြပါသည်။
ထို့အပြင် ကျောက်တော်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ကျောက်တော်မြို့ မဟာကံကြီးရှင်ဘုရားရှေ့ နှင့် ဂစ္ဆပသီရိအဝေးပြေးကားဂိတ်တို့တွင် ခရီးသွားပြည်သူများအား COVID-19 ရောဂါကာကွယ်ရေးအတွက် နှာခေါင်းစည်း(၅၀၀)ခုကို ပေးဝေပေးခဲ့ပြီး လက်သန့်ဆေးရည်ဖြင့် လက်သန့်စင်နိုင်ရန် ကူညီဆောင်ရွက်ခဲ့ကြပါသည်။

Read More