| RMS

ကမ္ဘာ့လူသားချင်းစာနာထောက်ထားမှုနေ့ ဂုဏ်ပြုဆောင်းပါး

  18/ Aug/ 2022

မြန်မာနိုင်ငံကြက်ခြေနီအသင်း(MRCS) နှင့် ကမ္ဘာ့စားနပ်ရိက္ခာအဖွဲ့ (WFP) တို့ပူးပေါင်းပြီး ရှမ်းပြည်နယ် (တောင် ပိုင်း)သို့ ရောက်ရှိနေသည့် နေရပ်စွန့်ခွာပြည်သူများအတွက် အရေးပေါ်လိုအပ်သည့် ဆန်၊ ဆီ၊ ဆား၊ ပဲ စသည့် အခြေခံစားနပ်ရိက္ခာနှင့် ကိုယ်ဝန်ဆောင်/နို့တိုက်မိခင်နှင့် (၅) နှစ်အောက်ကလေးအတွက် အဟာရထုတ်များကို ယခုနှစ်အတွင်း ဖြန့်ဝေခဲ့တာ သုံးကြိမ်ရှိခဲ့ပါပြီ။ ယခုလို ဖြန့်ဝေနိုင်ဖို့အတွက် အသင်းဌာနချုပ်၊​ ဘေးအန္တရာယ် ဆိုင်ရာစီမံခန့်ခွဲမှုဌာနတွင် ဒုတိယညွှန်ကြားရေးမှူးအဖြစ် တာဝန်ထမ်းဆောင်နေသည့် ဒေါ်မိုးသီတာဝင်း ဦး ဆောင်သော ဝန်ထမ်းများနှင့် ကြက်ခြေနီစေတနာလုပ်အားရှင်များက အင်တိုက်အားတိုက် ကြိုးပမ်းဆောင်ရွက် ခဲ့ကြပါတယ်။

“ကျွန်မ ဝန်ထမ်းတာဝန်မထမ်းဆောင်ခင်က မကွေးတိုင်းဒေသကြီးမှာ ကြက်ခြေနီစေတနာလုပ် အားရှင်အဖြစ် (၂၁)နှစ် ကြာလုပ်ကိုင်ခဲ့ပါတယ်။ ၁၉၈၄ ခုနှစ်၊ စတုတ္တတန်းဖြေဆိုပြီး နွေရာသီ ရှေးဦးပြုစုခြင်း သင်တန်းပြီးတော့ ကျောင်းကြက်ခြေနီအဖွဲ့ဝင်အဖြစ် စတင်ခဲ့တာပါ။ ၁၉၉၅ ခုနှစ်မှာ မကွေးတက္ကသိုလ် ကိုယ်စားပြု ထူးချွန်ကြက်ခြေနီနှင့် ၂၀၀၅ ခုနှစ်မှာ မကွေးတိုင်း ကိုယ်စားပြုထူးချွန်ကြက်ခြေနီအဖြစ် ရွေးချယ်ခံခဲ့ရပါတယ်။” လို့

ဒေါ်မိုးသီတာဝင်းက သူမရဲ့ ကြက်ခြေနီဘဝ အစကို ယခုလို အားတက်သရောပြောခဲ့ပါတယ်။

အခုတော့ ရှမ်းပြည်နယ် (တောင်ပိုင်း) ရှိ တောင်ကြီး၊ ညောင်ရွှေ၊ ပင်းတယမြို့နယ်များသို့ ရောက်ရှိနေတဲ့ နေရပ် စွန့်ခွာအိမ်ထောင်စု (၄,၃၇၀) ကို အခြေခံစားနပ်ရိက္ခာနှင့် အာဟာရထုတ်များကို ဖြန့်ဝေပေးလျက်ရှိပါတယ်။ မနှစ်က စပြီး ရန်ကုန်မှာ နှစ်ကြိမ်၊ မန္တလေးမှာ နှစ်ကြိမ်နဲ့ ယခုတစ်ကြိမ် အပါအဝင်ဆိုရင် ရှမ်းတောင်မှာ သုံးကြိမ်ရှိပါပြီ။ ဒီလို ဆောင်ရွက်ရာမှာ ကိုဗစ်-၁၉ ကန့်သတ်ချက်တွေ နဲ့ လမ်းခရီးလုံခြုံရေး အခက်အခဲတွေ၊ ရာသီဥတု အခြေအနေတွေစတဲ့ အခက်အခဲတွေနဲ့တော့ ရှိပါတယ်။ လူတိုင်းက ကြက်ခြေနီကို ကျေးဇူးတင်ကြတယ်လေ။ ခုလို ခက်ခဲနေတဲ့အချိန်တွေမှာ ဒီလို ထောက်ပံ့မှုတွေက အရမ်းအသုံးဝင်တာပေါ့။

“အခုလို အကူအညီလိုအပ်နေတဲ့ ပြည်သူတွေကို ကူညီရတာ အရမ်းကိုကြည်နူးရပါတယ်။ ရပ်ရွာလူထုအတွက် လူသားချင်းစာနာထောက်ထားမှု ဆိုင်ရာ အထောက်အပံ့တွေကို အစွမ်းရှိသလောက် ဆောင်ရွက်သွားမှာပါ။ အဓိကကတော့ ရာသီ ဥတုပြောင်းလဲခြင်းကြောင့် သဘာဝပတ်ဝန်းကျင် ပျက်စီးမှုတွေကို ထိထိရောက်ရောက် အသိပညာပေးခြင်းတာတွေ အပြင် ကလေးသူငယ်နှင့် အမျိုးသမီးများ ကာကွယ်စောင့်ရှောက်ရေးလုပ်ငန်းတွေ၊ အကြောင်းအမျိုးအမျိုးကြောင့် မိသားစုနဲ့ ခွဲခွာပြီး အလုပ်လုပ်ရင်း အခက်အခဲ ဖြစ်နေတဲ့သူတွေကို ကူညီတာတွေနဲ့ အသက်မွေးဝမ်းကျောင်းဆိုင်ရာ နည်းပညာအထောက်အပံ့ပေးတာတွေ လုပ်ချင်ပါတယ်။”

လို့ သူမက ဆက်လက်ပြောကြား ပါတယ်။
#WorldHumanitarianDay