| RMS

ကယားပြည်နယ်ရှိ တိုက်ပွဲရှောင်စခန်းများတွင် နေရပ်စွန့်ခွာပြည်သူများအား ကြက်ခြေနီက ကျန်းမာရေးအသိပညာပေးခြင်းနှင့် လိုအပ်သောစားသုံးကုန်ပစ္စည်းများထောက်ပံ့ကူညီ

  12/ Jul/ 2021

၂၀၂၁ ခုနှစ်၊ ဇူလိုင်လ ၁၂ ရက်
လတ်တလောဖြစ်ပွားလျှက်ရှိသော အခြေအနေများကြောင့် လွိုင်ကော်မြို့နယ်၊ ဒီးမော့ဆိုမြို့နယ်နှင့် ဖရူဆိုမြို့နယ်များရှိ တိုက်ပွဲရှောင်စခန်းများတွင် နေရပ်စွန့်ခွာပြည်သူများအား ကျန်းမာရေးစောင့်ရှောက်မှုပေးခြင်း၊ အခြေခံစားသောက်ကုန်များနှင့် ကယ်ဆယ်ရေးပစ္စည်းများထောက်ပံ့ခြင်း၊ ရှေးဦးပြုစုပေးခြင်း၊ လူနာတင်ယာဉ်ဝန်ဆောင်မှုပေးခြင်း၊ HIV နှင့် TB ဆေးသောက်နေရသူများအတွက် ဆေးရရှိအောင် ဆောင်ရွက်ပေးခြင်းနှင့် မိုင်းအန္တရာယ်အသိပညာပေးခြင်းတို့ကို ကယားပြည်နယ်မှ ကြက်ခြေနီစေတနာလုပ်အားရှင်များက တတ်အားသရွေ့ကူညီ‌ဆောင်ရွက်ပေးနေကြပါသည်။
ထို့အပြင် ကိုဗစ်-၁၉ ကူးစက်မှုများနှုန်းမြင့်လာလျက်ရှိသောကြောင့် နေရပ်စွန့်ခွာပြည်သူများအတွက် နှာခေါင်းစည်းများ၊ လက်သန့်ဆေးရည်များနှင့် အပူချိန်တိုင်းပစ္စည်းများ ထောက်ပံ့ပေးပြီး အပူချိန်တိုင်းပေးခြင်း၊ ကိုဗစ်-၁၉ ရောဂါစစ်ဆေးရာတွင် ကူညီခြင်းနှင့် ပိုးတွေ့ရှိသူများအား သက်ဆိုင်ရာဆေးကုသရာနေရာသို့ ပို့ဆောင်ပေးခြင်းတို့ကိုလည်း ကူညီဆောင်ရွက်ပေးလျှက်ရှိပါသည်။
ထို့ကဲ့သို့ကူညီနိုင်ရန် ၂၀၂၁ ခုနှစ် မေလမှစ၍ ကယားပြည်နယ်မှ ကြက်ခြေနီစေတနာလုပ်အားရှင်များက ကူညီရေးအဖွဲ့ (၃) ဖွဲ့ခွဲထားပြီး ယနေ့အထိ ဆက်လက်ကူညီဆောင်ရွက်လျှက်ရှိပါသည်။