| RMS

ကရင်ပြည်နယ်တွင် နေရပ်စွန့်ခွာပြည်သူများအား ကြက်ခြေနီက ဆက်လက်ကူညီထောက်ပံ့

  18/ Feb/ 2022

ယမန်နေ့ ဖေဖော်ဝါရီလ (၁၇)ရက်နေ့မှာ ကရင်ပြည်နယ်ကြက်ခြေနီကြီးကြပ်မှုကော်မတီက တာဝန်ရှိသူတွေနဲ့ မြဝတီမြို့နယ်ကြက်ခြေနီအသင်းခွဲက ကြက်ခြေနီစေတနာလုပ်အားရှင်တွေဟာ မြန်မာနိုင်ငံကြက်ခြေနီ အသင်းနှင့် အပြည်ပြည်ဆိုင်ရာကြက်ခြေနီကော်မတီတို့မှ ပေးပို့ထောက်ပံ့လာတဲ့ အသုံးအဆောင်ပစ္စည်းတွေကို မင်းလက်ပံကျေးရွာအုပ်စု ဖလူးကြီး၊ဖလူးလေးကျေးရွာများမှ နေရပ်စွန့်ခွာပြည်သူများအတွက် သွားရောက် ဖြန့်ဝေ ပေးခဲ့ကြပါတယ်။

ထိုသို့ ဘုရားကုန်းယာယီနေရပ်စွန့်ခွာစခန်း သို့ သွားရောက်ဖြန့်ဝေပေးရာမှာ အိမ်ထောင်စု (၁၅၀)စုအတွက် တစ်ကိုယ်ရည်သန့်ရှင်းရေးသုံးပစ္စည်း (၁၅၀)စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၆၆)စုံ၊ ခြင်ထောင် (၁၅၀)ထည်၊ စောင် (၁၅၀)ထည်၊ တာပေါ်လင် (၁၅၀)ချပ်၊ ပလပ်စတစ်ဖျာ (၁၅၀)ချပ်၊ ရေပုံး (၁၅၀)လုံး၊ ပါးစပ်နှင့် နှာခေါင်းစည်း (၁၅၀)ဗူး၊ လက်သန့်စင်ဆေးရည် (၁၅၀)ဗူး၊ COVID 19 Prevention Kit (၅၀)စုံ တို့ကို ထောက်ပံ့ ပေးနိုင်ခဲ့တဲ့အပြင် နေရပ်စွန့်ခွာပြည်သူတွေကို စိတ်ပိုင်းဆိုင်ရာအားပေးကူညီမှုများနှင့်အတူ မိုင်းအန္တရာယ်နဲ့ COVID-19 ရောဂါကာကွယ်ရေး အသိပညာပေးခြင်းများကိုလည်း ပြုလုပ်ပေးခဲ့ကြပါတယ်။

ပြီးခဲ့တဲ့ ဇန်နဝါရီလဆန်းပိုင်းကလည်း မြဝတီမြို့နယ်၊ မယ်ထော်သလေး၊ အင်ကြင်းမြိုင်၊ (၅)ဘတ်ဂိတ်နဲ့ (၁၀)ဘတ်ဂိတ် နေရပ်စွန့်ခွာစခန်းတွေက နေရပ်စွန့်ခွာပြည်သူပေါင်း (၁,၁၆၁)ဦး အိမ်ထောင်စု(၃၀၇)စုအတွက် မြန်မာနိုင်ငံကြက်ခြေနီအသင်းနဲ့ အပြည်ပြည်ဆိုင်ရာကြက်ခြေနီကော်မတီတို့က ပေးပို့ထောက်ပံ့တဲ့ အသုံးအဆောင် ပစ္စည်းတွေဖြစ်တဲ့ ခြင်ထောင်(၃၁၈)လုံး၊ စောင်(၂၀၆)ထည်၊ ပလပ်စတစ်ဖျာ (၂၀၆)ချပ်၊ တစ်ကိုယ်ရည် သန့်ရှင်းရေးသုံး ပစ္စည်း (၂၀၆)စုံ၊ ဂျယ်ရီကန် (၂၀၆)ခု၊ တာပေါ်လင် (၄,၁၂၀)စ၊ နိုင်လွန်ကြိုး (၄,၁၂၀)ခွေ၊ ရေသန့် ဆေးပြား (၁၁,၇၀၀)၊ နှာခေါင်းစည်း (၂၀၆)ဗူး၊ လက်သန့်စင်ဆေးရည် (၁၈၁)ဗူး၊ ဓါတ်ဆား (၁၃၀)၊ ရေစစ် (၂၄၆)လုံး တို့ကို ပထမအကြိမ် ထောက်ပံ့ပေးခဲ့ပြီး မဲထော်သလေးကျေးရွာမှာ အခြေခံစားသောက်ကုန် ဆန် (၇၂၀)ပြည်နှင့် သောက်သုံးရေအတွက်မီးစက်ဖြင့်ရေတင်နိုင်ရန် ဓါတ်ဆီ (၈၀)လီတာတို့ကိုလည်း ပြည်နယ်ကြက်ခြေနီကြီးကြပ်မှု ကော်မတီက သွားရောက်ထောက်ပံ့ခဲ့ကြပါတယ်။

“ကြက်ခြေနီက အထောက်အပံ့ပေးတဲ့အတွက် ကျေးဇူးအများကြီးတင်ပါတယ်၊ ဒါမျိုးက ကောင်းကောင်း မွန်မွန် မရခဲ့ဘူး၊ အခုလို ခြင်ထောင်၊ စောင်၊ မိုးကာနဲ့ တခြားအသုံးအဆောင်တွေလာပေးလို့ ကျေးဇူးတင်မိပါတယ်၊ ဒါတွေက ကျန်းမာရေးအတွက်လည်း အထောက်အကူတစ်ကယ်ဖြစ်တယ်လေ” လို့ ယာယီနေရပ်စွန့်ခွာစခန်းမှ ပြည်သူတစ်ဦးက ပြောပါတယ်။

“ကျွန်တော်အနေနဲ့ ကြက်ခြေနီတွေကို တစ်ကယ်ကိုပဲ ကျေးဇူးတင်မိတာပါ၊ သူတို့လုပ်နေတဲ့ အလုပ် တွေကိုလည်း ဂုဏ်ယူမိတယ်၊ ဝမ်းလည်းသာပါတယ်၊ သူတို့ရှိနေလို့ ကျွန်တော်တို့အခုလို အကူအညီရတာ၊ ကျွန်တော်တို့ ဒီဘက်မှာက ငှက်ဖျားပေါပြီး ဆေးဝါးနဲ့အစားအသောက်မဖူလုံတာတွေလည်း ဖြစ်နေကြတာလေ” ဟုလည်း ထပ်မံပြောကြားခဲ့ပါတယ်။

ကြက်ခြေနီစေတနာ့လုပ်အားရှင်တွေဟာ ရပ်ရွာလူထု ဆင်းရဲဒုက္ခနဲ့ကြုံတွေ့ရချိန်တိုင်းမှာ တတ်စွမ်း သရွေ့ ကူညီထောက်ပံ့ပေးနိုင်ဖို့ ကြိုးပမ်းနေကြတာဖြစ်ပြီး နိုင်ငံတဝန်း နေရာအနှံ့အပြားမှာ လူမှုကရုဏာ အကူအညီတွေကို အခြေခံမူ (၇)ချက်နဲ့အညီ ဆောင်ရွက်ပေးနေကြတာကို မြင်တွေ့ရမှာလည်းဖြစ်ပါတယ်။