| RMS

ကြက်ခြေနီက စစ်ကိုင်းတိုင်းဒေသကြီး မြို့နယ်(၄) မြို့နယ်ရှိ ယာယီခိုလှုံရေးစခန်းများနှင့် ကျေးရွာမှ ပြည်သူများအား လူသားချင်းစာနာထောက်ထားမှု အကူအညီများပေး

  12/ May/ 2022

ရန်ကုန်၊ မေလ(၁၂)ရက်။

မြန်မာနိုင်ငံကြက်ခြေနီအသင်းသည် နိုင်ငံတစ်ဝန်း အကူအညီလိုအပ်သူများအတွက် လူမှုကရုဏာ အကူအညီများ‌ ပေးရာတွင် ကြက်ခြေနီအခြေခံမူများနှင့်အညီ ကူညီလျက်ရှိရာ ပြီးခဲ့သည့် ဧပြီလ (၂၃) ရက်မှ ဧပြီလ (၂၉) ရက်‌နေ့အထိ စစ်ကိုင်းတိုင်းဒေသကြီးရှိ ပြည်သူများအား အရေးပေါ် လူသားချင်းစာနာ ထောက်ထားမှု ဆိုင်ရာလုပ်ငန်းများဖြစ်သည့် စားနပ်ရိက္ခာ နှင့် အခြားအခြေခံ လိုအပ်သည့် ပစ္စည်းများ၊ Covid-19 ကာကွယ်ရေးသုံးပစ္စည်းများ၊ ရေနှင့် သန့်ရှင်းရေးသုံးပစ္စည်းများကို သွားရောက် ကူညီ ထောက်ပံ့ ပေးခဲ့ကြပါသည်။

ထိုသို့သွားရောက်ဆောင်ရွက်ရာတွင် မြန်မာနိုင်ငံကြက်ခြေနီအသင်း ဌာနချုပ်မှ ဝန်ထမ်း (၇) ဦးနှင့် စစ်ကိုင်းတိုင်းဒေသကြီးမှ ကြက်ခြေနီစေတနာလုပ်အားရှင် (၁၂) ဦး စုစုပေါင်း (၁၉) ဦးတို့သည် စစ်ကိုင်းတိုင်းဒေသကြီး စစ်ကိုင်း၊ ရွှေဘို၊ မုံရွာ၊ ကန့်ဘလူမြို့နယ် (၄) မြို့နယ်မှ ယာယီခိုလှုံရေးစခန်း (၅) ခုနှင့် ရွေဘိုမြို့နယ်မှ ကျေးရွာ(၂) ရွာရှိ အိမ်ထောင်စု (၃၃၈) စု လူဦးရေ (၁,၁၉၁) ဦးအတွက် (၇၉,၅၄၅,၀၅၀)ကျပ် တန်ဖိုးရှိ ကနဦး အရေးပေါ်လိုအပ်ချက်များဖြစ်သည့် အစားအစာ (ဆန်၊ ဆီ၊ ဆား၊ ပဲ၊ ငါးသေတ္တာ) (၃၃၈) စုံ၊ နှာခေါင်းစည်း (၅၀ ပါဗူး) ၃၃၈ ဗူး၊ လက်သန့်ဆေးရည် (၃၃၈) ဗူး၊ မိသားစုသုံး တစ်ကိုယ်ရည်သန့်ရှင်းရေး သုံးပစ္စည်း (၃၃၈) ပုံး၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၃၂၅) ပုံး၊ အမျိုးသား တစ်ကိုယ် ရည်သန့်ရှင်းရေးသုံးပစ္စည်း (၃၂၆) ပုံး၊ မိုးကာအင်္ကျီ (၆၅၂) ထည်၊ တာပေါ်လင် (၆၇၆) ချပ်၊ အိမ်ဆောက် အထောက်အကူပြုပစ္စည်း (၁၆၈) အိတ်၊၊ မိသားစုသုံး ရေသန့်ပုံး (Life Straw) (၇) ခု၊ ၂၀၀ ဂါလံဆန့် ရေပုံး (၆) ခုတို့ကို သွားရောက်ထောက်ပံ့ကူညီပေးခဲ့သည့်အပြင် စိတ်ပိုင်းဆိုင်ရာ အားပေးကူညီခြင်းများ ကိုလည်း ပြုလုပ်ခဲ့ကြပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများအတွက် စားနပ်ရိက္ခာများ၊ ရေနှင့် သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန် ဆောင်ရွက်လျက်ရှိပါသည်။