| RMS

တနင်္သာရီတိုင်းဒေသကြီးမှ ကြက်ခြေနီစေတနာလုပ်အားရှင်များ၏ ကူညီဆောင်ရွက်မှုများ

  18/ Sep/ 2021

၂၀၂၁ခုနှစ်၊ စက်တင်ဘာလ(၁၇)ရက်နေ့က ကော့သောင်းမြို့ မြို့မဆိပ်ခံတံတား၌ ကော့သောင်းခရိုင် ကြက်ခြေနီတပ်ဖွဲ့မှ ကြက်ခြေနီစေတနာလုပ်အားရှင်များသည် ထိုင်းနိုင်ငံ၌ ပြစ်ဒဏ်ကျခံပြီး ပြန်လည်ဝင်ရောက်လာသူ (၁၇၆)ဦးတို့အား စာရင်းပြုစုခြင်း၊ ပစ္စည်းများ ပိုးသတ်‌ဆေးဖျန်းခြင်း၊ ကျန်းမာရေးစစ်ဆေးခြင်းနှင့် ကြိုဆိုလက်ခံခြင်း တို့ကို ဌာနဆိုင်ရာများနှင့်အတူ ပူးပေါင်းကူညီ ဆောင်ရွက်ပေးခဲ့ပါသည်။

စက်တင်ဘာလ(၁၈)ရက်နေ့တွင် ထားဝယ်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်(၃)ဦး တို့သည် ထားဝယ်မြို့ပြည်သူ့ဆေးရုံတွင် အရေးပေါ်သွေးလိုအပ်နေသည့်လူနာများအတွက် (A)သွေး(၁)လုံး၊ (B)သွေး(၁)လုံး၊ (O)သွေး(၁)လုံးတို့ကို လှူဒါန်းခဲ့ပါသည်။

ထို့အတူ ထားဝယ်မြို့နှင့် သရက်ချောင်းမြို့တို့မှဆေးရုံတက်/ဆင်း လူနာ(၉)ဦးတို့အား ဆေးရုံ/နေအိမ်များသို့ ထားဝယ်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက မြို့နယ်ကြက်ခြေနီအသင်းခွဲမှ လူနာတင်ယာဥ်ဖြင့် စက်တင်ဘာလ(၁၈)ရက်နေ့နှင့် စက်တင်ဘာလ(၁၉)ရက်နေ့တို့တွင် ကူညီပို့ဆောင်ပေးခဲ့ကြပါသည်။

ထို့အပြင် မသန်စွမ်းသူများနှင့် သက်ကြီးရွယ်အိုများ COVID-19 ကာကွယ်ဆေးထိုးရန်အတွက်
ရငဲတိုက်နယ်ကျန်းမာရေးဌာနသို့ သွားရောက်နိုင်ရန် သရက်ချောင်းမြို့နယ် ရငဲကျေးရွာ ကြက်ခြေနီအသင်းခွဲငယ်မှ ကြက်ခြေနီစေတနာလုပ်အားရှင်များက အကူအညီ ပေးခဲ့ကြပါသည်။

မြိတ်မြို့နယ်ကြက်ခြေနီတပ်ဖွဲ့မှ ကြက်ခြေနီ‌စေတနာလုပ်အားရှင်များသည်လည်း ဇီဝိတစက္ခုဒါနသံဃာ့ဆေးရုံ COVID-19 ကုသရေးစင်တာ၌ (၁)လတာ ကူညီဆောင်ရွက်ခဲ့ပြီး စက်တင်ဘာလ(၁၆)ရက်နေ့မှ စတင်ကာ.ဆက်လက် ကူညီဆောင်ရွက်လျက်ရှိသည့်အပြင် မြန်မာနိုင်ငံဆရာဝန်အသင်း(မြိတ်)၊ ပရဟိတအသင်းများ၊ ကျန်းမာရေးဌာနတို့နှင့် ပူးပေါင်းပြီး အလယ်ကုန်းနှင့် မယင်းကျေးရွာများ၌ COVID-19 ရောဂါစစ်ဆေးခြင်း၊ အလယ်ကုန်းကျေးရွာရှိ isolated center၌ စစ်ဆေးကုသမှုပေးခြင်းတို့ကို ကူညီပေးခဲ့ပါသည်။ ပိုးတွေ့လူနာများအား စင်တာများသို့ လွှဲပို့ပေးကာ ဆပ်ပြာ
ရည်၊ နှာခေါင်းစည်း၊ မျက်နှာကာ၊ တစ်ခါသုံးလက်အိတ်တို့ကို isolated center သို့ ပေးအပ်လှူဒါန်းခဲ့ပါသည်။