| RMS

မရပ်မနားရှေ့ဆက်သွားကြက်ခြေနီရဲ့စုပေါင်းအား

  06/ Jul/ 2021

“အခုလောလောဆယ် လူနာကလည်း (၃၀)လောက်ရှိနေပြီဆိုတော့ ကျွန်တော်တို့ အခုလက်ရှိ လုပ်အားပေးနေတဲ့ ကြက်ခြေနီစေတနာလုပ်အားရှင် (၁၀)ဦးခန့်အပြင် အင်အားထပ်ဖြည့်ပြီး လူနာတွေအတွက် လိုအပ်တဲ့ နေရာထိုင်ခင်း၊ အစားအသောက်နဲ့ စိတ်ပိုင်းလူမှုပိုင်းဆိုင်ရာ ကူညီစောင့်ရှောက်ပေးတာတွေကို တတ်နိုင်သလောက်ဖြည့်ဆည်းဆောင်ရွက်ပေးသွားဖို့ စီစဥ်နေပါတယ်။ လိုအပ်တာတွေကို တတ်နိုင်သလောက်ဖြည့်ဆည်းဆောင်ရွက်ပြီး ကျွန်တော်တို့ အတူရင်ဆိုင်ကျော်ဖြတ်သွားကြမယ်”
ဦးကိုကိုနိုင် (ထားဝယ်မြို့နယ်ကြက်ခြေနီတပ်ဖွဲ့မှူး)
တနင်္သာရီတိုင်းမှကြက်ခြေနီစေတနာလုပ်အားရှင်များသည် မြန်မာနိုင်ငံတဝန်းမှ အခြားကြက်ခြေနီစေတနာလုပ်အားရှင်များနည်းတူ ကိုဗစ်၁၉ရောဂါ ကူးစက်မှု စတင်ဖြစ်ပွားသည့်အချိန်မှ စကာ ရောဂါကာကွယ်တားဆီးရေးလုပ်ငန်းများကို သက်ဆိုင်ရာများနှင့် ပူးပေါင်းကာ ကူညီဆောင်ရွက်ပေးခဲ့ကြပါသည်။
အလားတူ ထားဝယ်မြို့နယ်ရှိ သီတဂူဆေးရုံတွင် ဖွင့်ထားသော ကိုဗစ်ကုသရေးစင်တာတွင် ထားဝယ်ကြက်ခြေနီစေတနာလုပ်အားရှင်များက ရပ်ရွာလူထုနှင့်အတူ ပူးပေါင်းကာ ရောဂါကူးစက်ခံရသူလူနာများအား အစားအသောက်နှင့် နေရာထိုင်ခင်းပြင်ဆင်ပေးခြင်း၊ ဆေးရုံအတွင်း၊အပြင်သန့်ရှင်းရေးလုပ်ငန်းများဆောင်ရွက်ပေးခြင်း၊ လူနာအဝင်၊အထွက်စာရင်းများပြုလုပ်ပေးခြင်း၊ ပိုးသတ်ဆေးဖြန်းခြင်းနှင့် စိတ်ပိုင်းလူမှုပိုင်းဆိုင်ရာ အားပေးကူညီခြင်းတို့ကို ၂၀၂၁ခုနှစ်၊ ဖေဖော်ဝါရီလ ၂၃ရက်နေ့မှ စတင်ကာ ယနေ့အထိ ကူညီဆောင်ရွက်ပေးလျှက်ရှိကြပါသည်။
ယခုအခါ ထပ်မံမြင့်တက်လာသော ရောဂါကူးစက်မှု အခြေအနေများကြောင့် အဆိုပါဆေးရုံတွင် ရောဂါကုသမှုခံယူမည့် လူနာဦးရေ(၃၀)ခန့်ရှိနေပြီး လူနာများအတွက် ပိုမို ထိရောက်သောအကူအညီများပေးနိုင်ရန်အတွက် ကြက်ခြေနီစေတနာလုပ်အားရှင်အင်အား ပိုမိုတိုးချဲ့ပြီး ကူညီပေးသွားရန်နှင့် လိုအပ်သည်များ ထောက်ပံ့ကူညီပေးသွားရန် စီစဥ်ဆောင်ရွက်လျက်ရှိနေကြပါသည်။