| RMS

မြန်မာနိုင်ငံကြက်ခြေနီအသင်း WASH ယူနစ် မှ ရှမ်းပြည်နယ်တောင်ပိုင်းကြက်ခြေနီကြီးကြပ်မှုကော်မတီ နှင့် ပူးပေါင်းကာ တောင်ကြီးမြို့နယ်ရှိ ရေလိုအပ်ချက်ရှိသော နေရပ်စွန့်ခွာစခန်း(၇)ခုခန့် မှ ပြည်သူများ သန့်ရှင်းသော သောက်ရေ၊သုံးရေရရှိနိုင်ရေးအတွက် တစ်ရက်လျှင် ရေ (၃၀၀၀၀)လီတာ သန့်စင်ထုတ်လုပ်နိုင်သည့် ရေသန့်စက်အား တပ်ဆင်လျက်ရှိ

  18/ Feb/ 2022

မြန်မာနိုင်ငံကြက်ခြေနီအသင်း WASH ယူနစ် မှ ရှမ်းပြည်နယ်တောင်ပိုင်းကြက်ခြေနီကြီးကြပ်မှုကော်မတီ နှင့် ပူးပေါင်းကာ တောင်ကြီးမြို့နယ်ရှိ ရေလိုအပ်ချက်ရှိသော နေရပ်စွန့်ခွာစခန်း(၇)ခုခန့် မှ ပြည်သူများ သန့်ရှင်းသော သောက်ရေ၊သုံးရေရရှိနိုင်ရေးအတွက် တစ်ရက်လျှင် ရေ (၃၀၀၀၀)လီတာ သန့်စင်ထုတ်လုပ်နိုင်သည့် ရေသန့်စက်အား တပ်ဆင်တည်ဆောက်လျက်ရှိပါသည်။

ရေသန့်စက်တည်ဆောက်မှုကို ဖေဖော်ဝါရီလ(၁၀)ရက်နေ့က စတင်ဆောင်ရွက်ခဲ့ကြပြီး ဖေဖော်ဝါရီလ(၂၀)ရက်နေ့တွင် ရေလိုအပ်ချက်ရှိသော နေရပ်စွန့်ခွာစခန်း(၇)ခုအတွက် ရေသန့်များ စတင်ပေးဝေနိုင်ရန်လျာထားဆောင်ရွက်လျက်ရှိပါသည်။

ရေသန့်စက်ကို လူဦးရေ (၃၀၆၀၀)အတွက် လုံလောက်သည့် သောက်ရေသုံးရေပေးဝေနိုင်ရန် စီစဉ်ထားပြီး တည်ဆောက်နေစဉ်ကာလအတွင်း ရေလိုအပ်လျက်ရှိသော နေရပ်စွန့်ခွာပြည်သူများအတွက် လိုအပ်သည့်ရေသန့်များအားဝယ်ယူကာ ဖြန့်ဝေပေးလျက်ရှိနေပါသည်။

မြန်မာနိုင်ငံကြက်ခြေနီအသင်းသည် ၂၀၀၈ခုနှစ် နာဂစ်မုန်တိုင်းတိုက်ခတ်မှုအပြီး ပတ်ဝန်းကျင်ပျက်စီးဆုံးရှုံးမှုများနှင့် ရေကောင်းရေသန့်ရှားပါးမှုပြဿနာများကို ရပ်ရွာအတွင်း ရင်ဆိုင်ကြုံတွေ့ချိန်မှစတင်ကာ ရေ၊ ပတ်ဝန်းကျင်သန့်ရှင်းရေးနှင့် တစ်ကိုယ်ရေသန့်ရှင်းရေးအတွက် အသိပညာပေးခြင်းနှင့် ရေသန့်စက် ရေသန့်ဆေး ကိုင်တွယ်အသုံးပြုပုံများကို ရပ်ရွာလူထုသိရှိစေဖို့ စတင်ဆောင်ရွက်ခဲ့ကြတာ ဖြစ်ပါတယ်။

၂၀၁၇ခုနှစ်မှာတော့ အသင်းရဲ့ WASH ယူနစ်ကို စတင်ဖွဲ့စည်းခဲ့ကြပြီး ရေ၊ ပတ်ဝန်းကျင်သန့်ရှင်းရေးနဲ့ ဆက်စပ်နေတဲ့ ထိခိုက်ဆုံးရှုံးမှုတွေ လျှော့ချပေးနိုင်ရေးအတွက်ဆောင်ရွက်ခဲ့ကြကာ ယခုအချိန်ထိ နိုင်ငံတဝန်းရေကောင်းရေသန့်ရရှိစေနိုင်ရေးအတွက် ကြိုးပမ်းအားထုတ်လျက်ရှိကြပါသည်။