၂၀၂၁ခုနှစ် စက်တင်ဘာလ ၁၈ရက်နေ့က အမှတ်(၂) မြန်မာ-ထိုင်းချစ်ကြည်ရေးတံတားမှတစ်ဆင့် မြန်မာနိုင်ငံအတွင်းသို့ ပြန်လည်ဝင်ရောက်လာသော ရွှေ့ပြောင်းမြန်မာအလုပ်သမားများအား မြဝတီမြို့နယ်ကြက်ခြေနီတပ်ဖွဲ့မှူး ဦးအောင်သွင်ဦးနှင့် ကြက်ခြေနီစေတနာလုပ်အားရှင်(၁၂)ဦးတို့က စာရင်းမှတ်တမ်းရေးသွင်းခြင်း၊ ကျန်းမာရေးအသိပညာပေးခြင်း၊ နေရပ်အသီးသီးသို့ ပြန်လည်ရောက်ရှိနိုင်ရန်ညွှန်းပို့ကူညီပေးခြင်းတို့ကို ကူညီဆောင်ရွက်ပေးခဲ့ကြပါသည်။

၂၀၂၁ခုနှစ်၊ စက်တင်ဘာလ ၁၈ရက်နေ့က ကျောက်တံခါးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက ပဲခူးတိုင်းဒေသကြီး၊ ဖြူးမြို့ဇီဝကဆေးရုံတွင် ဆေးကုသမှုခံယူလျှက်ရှိသောလူနာတစ်ဦးအရေးပေါ်လိုအပ်နေသော (A)သွေးတစ်လုံးအားလည်းကောင်း၊ မြို့ချောင်းတိုက်နယ်ဆေးရုံတွင် ဆေးကုသမှုခံယူလျှက်ရှိသောလူနာတစ်ဦး အရေးပေါ်လိုအပ်နေသော (O)သွေးတစ်လုံးအားလည်းကောင်း၊ စက်တင်ဘာလ (၁၉)ရက်နေ့က မြို့ချောင်းတိုက်နယ်ဆေးရုံတွင် ဆေးကုသမှုခံယူနေသော သွေးအားနည်းလူနာတစ်ဦးအတွက် အရေးပေါ်လိုအပ်နေသော (B)သွေးတစ်လုံးအားလည်းကောင်း အသီးသီးလှူဒါန်းပေးခဲ့ကြပါသည်။