ပြည်ထောင်စုနယ်မြေ နေပြည်တော် လယ်ဝေးမြို့နယ်တွင် လေဆင်နှာမောင်းတိုက်ခတ်မှုဖြစ်ပွားခဲ့သော တံတားဦးကျေးရွာနှင့် အောင်မြင်ကုန်း ကျေးရွာတို့မှ ဒေသခံရွာသူရွာသားများအား မြန်မာနိုင်ငံကြက်ခြေနီအသင်းမှ အခြေခံစားသောက်ကုန်များ ထောက်ပံ့ပေးအပ်ခြင်း အစီအစဥ်ကို ဧပြီလ (၂၆) ရက်နေ့ နံနက်ပိုင်းက အဆိုပါကျေးရွာများတွင် ပြုလုပ်ခဲ့ရာ မြန်မာနိုင်ငံကြက်ခြေနီအသင်း ဥက္ကဌ ဒေါက်တာမျိုးညွန့် တက်ရောက်ခဲ့ပြီး လေဘေးသင့်ပြည်သူ များအား အခြေခံစားသောက်ကုန်များ ထောက်ပံ့ပေးအပ်ခဲ့ပြီး ရင်းရင်းနှီးနှီး အားပေးစကားပြောကြားခဲ့ပါသည်။

ထိုသို့ထောက်ပံ့ပေးအပ်ရာတွင် တံတားဦးကျေးရွာမှ အိမ်ထောင်စု (၉၆) စုနှင့် အောင်မြင်ကုန်းကျေးရွာမှ အိမ်ထောင်စု (၁၆၉) စု စုစုပေါင်း အိမ်ထောင်စု (၂၆၅) စုအတွက် အိမ်ထောင်စု (၁) စုလျှင် ဆန် (၆) ပြည် အိတ် (၁) အိတ်၊ ဆီ (၅၀) ကျပ်သား (၁) ဗူး၊ ခေါက်ဆွဲခြောက် (၁၂) ထုပ်၊ ငါးသေတ္တာ (၃) ဗူး တို့ကို ထောက်ပံ့ပေးအပ်ခဲ့ပါသည်။

အဆိုပါပေးအပ်ပွဲသို့ အသင်းဥက္ကဌနှင့်အတူ ဒုတိယဥက္ကဌ ဒေါက်တာတင်တင်လေး၊ အချိန်ပြည့်အလုပ် အမှုဆောင်ဒေါက်တာဒေါ်ရီရီတင် ၊ နေပြည်တော်ကြက်ခြေနီကြီးကြပ်မှုကော်မတီ ဥက္ကဌ ဦးအောင်ချို၊ အသင်းဌာနချုပ် ဒုတိယအထွေထွေအတွင်းရေးမှူး၊ ညွှန်ကြားရေးမှူးများနှင့် တာဝန်ရှိသူများ တက် ရောက်ခဲ့ကြပါသည်။

အဆိုပါ လေဆင်နှာမောင်းတိုက်ခတ်မှုဖြစ်ပွားခဲ့သော ဧပြီလ(၂၁)ရက်နေ့ ညနေပိုင်းကလည်း နေပြည်တော်မှ ကြက်ခြေနီစေတနာလုပ်အားရှင်များသည် အဆိုပါကျေးရွာများသို့ အချိန်နှင့်တပြေးညီ သွားရောက်ခဲ့ပြီး အပျက်အစီးများကို ကူညီရှင်းလင်းပေးခြင်း၊ ရွာသူ/သားများ ဘေးလွတ်ရာသို့ ရွေ့ပြောင်းရာတွင် ကူညီ ခြင်း၊ မိသားစုချင်း အဆက်အသွယ် ရရှိစေရန် ဆောင်ရွက်ပေးခြင်း၊ ထိခိုက်ဒဏ်ရာရရှိသူများကို ရှေးဦးပြုစု စောင့်ရှောက်ပေးခြင်း၊ ဆေးရုံများသို့ ဆက်လက် ပို့ဆောင်ရန် လိုအပ်သည့် လူနာများကို ကြက်ခြေနီ လူနာတင်ယာဉ်များဖြင့် ပို့ဆောင်ပေးခြင်း စသည့် လူမှုကရုဏာအကူအညီ ပေးခြင်းများကိုဆောင်ရွက်ခဲ့ကြပါသည်။

မြန်မာသက္ကရာဇ် ၁၃၈၅ ခုနှစ်၊ နှစ်ဆန်း(၁)ရက်နေ့သည် မြန်မာတို့အတွက် ပျော်ရွှင်ဖွယ်ရာ နှစ်သစ်ကူးမင်္ဂလာအခါသမယ ဖြစ်သည်နှင့် အညီ ကြက်ခြေနီ တပ်ဖွဲ့ဝင်များ၊ အသင်းဝင်များ၊ စေတနာလုပ် အားရှင်များ၊ ဝန်ထမ်းများနှင့် ပြည်သူပြည်သားအပေါင်းတို့ကို စိတ်၏ချမ်းသာခြင်း၊ ကိုယ်၏ကျန်းမာခြင်းနဲ့ ပြည်စုံပြီး လူမှုဘဝများ အေးချမ်းသာယာပါစေကြောင်း ဆုတောင်းမေတ္တာပို့သပါတယ်။

ဒီလို မင်္ဂလာ ရှိလှတဲ့ နှစ်သစ်ရဲ့ ပထမဦးဆုံးနေ့မှာ ကျက်သရေ မင်္ဂလာ အပေါင်းနဲ့ ပြည်စုံကြပါစေကြောင်းနဲ့ နှစ်ဟောင်းကုန်လို့ နှစ်သစ်ကူးပြောင်းတဲ့ အချိန်အခါဖြစ်သည်နဲ့အညီ ပြည်သူလူထုလိုအပ်တဲ့ အကူအညီတွေကို ဘက်ပေါင်းစုံမှ မိမိတို့ တတ်မြောက် ထားတဲ့ အသိပညာ၊ အတတ်ပညာများဖြင့် လူထုအကျိုးပြုလုပ်ငန်းများ ကို စေတနာ၊ မေတ္တာ၊ ဝါသနာအရင်းခံကာ လူမှုကရုဏာစိတ်ထားအရင်းခံပြီး ကြက်ခြေနီ အခြေခံမူများနှင့် အရှိန်အဟုန်မြင့် ကြိုးပမ်းဆောင်ရွက်ကြပါလို့ တိုက်တွန်းရင်း ဆုမွန်ကောင်း တောင်းမေတ္တာပို့ နှုတ်ခွန်းဆက် အပ်ပါတယ်။

ဒေါက်တာမျိုးညွန့်

ဥက္ကဌ

မြန်မာနိုင်ငံကြက်ခြေနီအသင်း

နေပြည်တော်၊ ၂၀၂၃ခုနှစ်၊ မတ်လ(၃၀)ရက်။

(၁၄)ကြိမ်မြောက် မြန်မာနိုင်ငံကြက်ခြေနီညီလာခံ ပထမနေ့ နေ့လည်ပိုင်း အစီအစဉ်များကို မတ်လ (၃၀) ရက်နေ့ နေ့လည် (၁း၃၀) နာရီတွင် ဆက်လက် ကျင်းပခဲ့ပါသည်။

အစီအစဉ်အရ ညီလာခံယာယီသဘာပတိ ပါမောက္ခဒေါက်တာအေးအောင် က ရွေးချယ်တင်မြှောက်ရေး လုပ်ငန်းစဥ်များကို ရှင်းလင်းပြောကြားခဲ့ပြီး အလုပ်အမှုဆောင်အဖွဲ့ဝင်အသစ်များ ရွေးချယ်တင်မြှောက်ခြင်းလုပ်ငန်းများကို ရွေးချယ်တင်မြှောက်ရေး လုပ်ငန်းစဉ်များနှင့်အညီ ဆောင်ရွက်ခဲ့ပါသည်။

ထို့နောက် (၁၄)ကြိမ်မြောက်မြန်မာနိုင်ငံကြက်ခြေနီညီလာခံသက်တမ်း (၂၀၂၃-၂၀၂၆)အတွက် ကြက်ခြေနီလှုပ်ရှားမှုနှင့် ဆက်စပ်သည့် ဝန်ကြီးဌာနကိုယ်စားလှယ်များ၊ နေပြည်တော်နှင့် တိုင်းဒေသကြီး/ပြည်နယ်တို့မှ ရွေးချယ်တင်မြှောက်ခြင်းခံရသည့် ကိုယ်စားလှယ်များ စုစုပေါင်း(၆၇) ဦး တို့အား ကောင်စီဝင်များအဖြစ်အတည်ပြုပြီး ယင်းတို့အနက်မှ အဆိုပြုထားသည့်အလုပ်အမှုဆောင် (၁၁) ဦးကို ရွေးချယ်တင်မြှောက်ရေး ညွှန်ကြားချက်များနှင့်အညီ ရွေးချယ်ခဲ့ကြပါသည်။

ရွေးချယ်တင်မြှောက်သည့် အချိန်ပြည့်/အချိန်ပိုင်း အလုပ်အမှုဆောင်(၁၁)ဦးမှာ

၁။ ဒေါက်တာမျိုးညွန့် (ဥက္ကဌ အချိန်ပြည့်အလုပ်

အမှုဆောင်)

၂။ ဒေါက်တာဒေါ်တင်တင်လေး (ဒုတိယဥက္ကဌ အချိန်

ပြည့်အလုပ်အမှုဆောင်)

၃။ ပါမောက္ခဒေါက်တာဒေါ်မြသူ (အချိန်ပြည့်အလုပ်

အမှုဆောင်)

၄။ပါမောက္ခဒေါက်တာရီရီတင် (အချိန်ပြည့်အလုပ်

အမှုဆောင်)

၅။ ဒေါက်တာတင်မောင်လှိုင်( အချိန်ပြည့်အလုပ်

အမှုဆောင်)

၆။ ဒေါက်တာမျိုးမြင့်သိန်း( အချိန်ပိုင်းအလုပ်

အမှုဆောင်)

၇။ ဒေါက်တာစိုးလှိုင်( အချိန်ပိုင်းအလုပ်အမှုဆောင်)

၈။ ပါမောက္ခဒေါက်တာမြင့်ဟန်( အချိန်ပိုင်းအလုပ်

အမှုဆောင်)

၉။ ပါမောက္ခဒေါက်တာခင်လှလှ( အချိန်ပိုင်းအလုပ်

အမှုဆောင်)

၁၀။ဦးကျော်မိုးကြည်( အချိန်ပိုင်းအလုပ်အမှုဆောင်)

၁၁။ပါမောက္ခဒေါက်တာမာလာဝင်း( အချိန်ပိုင်းအလုပ်

အမှုဆောင်) တို့ကို ရွေးချယ်တင်မြှောက်ခဲ့ပါသည်။

ယင်းနောက် ညီလာခံယာယီသဘာပတိ ရှေ့မှောက်တွင် အလုပ်အမှုဆောင်အဖွဲ့က ကတိသစ္စာပြုခဲ့ကြပြီး ညီလာခံပထမနေ့ အစီအစဉ်များကို ရပ်နားခဲ့ပါသည်။

နေပြည်တော်၊ ၂၀၂၃ခုနှစ်၊ မတ်လ(၃၀)ရက်။

(၁၄)ကြိမ်မြောက်မြန်မာနိုင်ငံကြက်ခြေနီညီလာခံ ပထမနေ့ အစီအစဉ်များကို မတ်လ(၃၀)ရက်နေ့ နံနက်ပိုင်းတွင် စတင် ကျင်းပရာ ညီလာခံသဘာပတိအဖြစ် အသင်းဥက္ကဌ ဒေါက်တာမောင်မောင်မြင့်က ဆောင်ရွက်ခဲ့ပါသည်။

ညီလာခံသို့ အသင်းဥက္ကဌနှင့်အတူ ဒုတိယဥက္ကဌ ဒေါက်တာ အမယာမော်နိုင်၊ အချိန်ပြည့်/အချိန်ပိုင်း အလုပ်အမှုဆောင်များ၊ ကောင်စီဝင်များ၊ အသင်းဌာနချုပ်အထွေထွေအတွင်းရေးမှူး၊ နေပြည်တော်နှင့် တိုင်းဒေသကြီး၊ ပြည်နယ်ကြက်ခြေနီကြီးကြပ်မှုကော်မတီဥက္ကဌများ၊ အသင်းဌာနချုပ် ဒုတိယအထွေအတွင်းရေးမှူး၊ ကြက်ခြေနီတပ်ဖွဲ့မှူးများ၊ ညွှန်ကြားရေးမှူးများ၊ ဌာနမှူးများ၊ ဒုတိယညွှန်ကြားရေးမှူးများ၊ ညီလာခံကိုယ်စားလှယ်များ၊ လူငယ်ကိုယ်စားလှယ်များ၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်း၊ အပြည်ပြည်ဆိုင်ရာကြက်ခြေနီကော်မတီနှင့် မိတ်ဖက်အမျိုးသားကြက်ခြေနီအသင်းများမှ တာဝန်ရှိသူများ၊ ဖိတ်ကြားထားသူများ တက်ရောက်ခဲ့ကြပါသည်။

ရှေးဦးစွာ (၁၃)ကြိမ်မြောက်မြန်မာနိုင်ငံကြက်ခြေနီညီလာခံ သက်တမ်းအတွင်းကောင်စီမှ ဆောင်ရွက်ပြီးစီးခဲ့သော လုပ်ငန်းများကို သဘာပတိ အသင်းဥက္ကဌ ဒေါက်တာမောင်မောင်မြင့်က လည်းကောင်း၊ နေပြည်တော်ကောင်စီနယ်မြေ၊ တိုင်းဒေသကြီးနှင့် ပြည်နယ်များ၏ ဆောင်ရွက်ချက် အစီရင်ခံစာကို ဒုတိယဥက္ကဌ ဒေါက်တာဒေါ်အမယာမော်နိုင်က လည်းကောင်း၊ (၁၃) ကြိမ်မြောက် မြန်မာနိုင်ငံကြက်ခြေနီညီလာခံသက်တမ်းအတွင်း ကောင်စီ၏ ဘဏ္ဍာရေး အစီရင်ခံစာကို အချိန်ပြည့်အလုပ်အမှုဆောင် ဦးအောင်မြင့်ဦး ကလည်းကောင်း ရှင်းလင်း တင်ပြခဲ့ပါသည်။

ဆက်လက်ပြီး ညီလာခံသဘာပတိက (၁၃)ကြိမ်မြောက်မြန်မာနိုင်ငံကြက်ခြေနီညီလာခံ သက်တမ်းကုန်ဆုံးကြောင်း ကြေငြာကာ အဆိုပါသက်တမ်းအတွင်း ကောင်စီဝင်များအဖြစ် တာဝန်ထမ်း ဆောင်ခဲ့သူများအား မှတ်တမ်းတင်ခြင်းကို ဆောင်ရွက်ခဲ့ပါသည်။

ထို့နောက် ညီလာခံယာယီသဘာပတိ အဖြစ်တာဝန်ထမ်းဆောင်မည့် ဗဟိုရွေးချယ်တင်မြှောက်ရေးကော်မတီဥက္ကဌ ပါမောက္ခဒေါက်တာအေးအောင်ထံ လုပ်ငန်းတာဝန်များကို လွှဲပြောင်းပေးအပ်ခဲ့ပြီး ညီလာခံယာယီသဘာပတိက (၁၄)ကြိမ်မြောက်မြန်မာနိုင်ငံကြက်ခြေနီညီလာခံသက်တမ်းအတွက်ကောင်စီဝင်များအဖြစ်ရွေးချယ်ခံရသူများကို ကြေငြာပြီး အတည်ပြုခြင်းကို ဆောင်ရွက်ကာ ညီလာခံ ပထမနေ့နံနက်ပိုင်း အစီအစဉ်များကို ရပ်နားခဲ့ပါသည်။

နေပြည်တော်၊ ၂၀၂၃ခုနှစ်၊ မတ်လ(၃၀)ရက်။

(၁၄)ကြိမ်မြောက် မြန်မာနိုင်ငံကြက်ခြေနီညီလာခံဖွင့်ပွဲ အခမ်းအနားကို ယနေ့နံနက်(၉)နာရီတွင် နေပြည်တော်ရှိ မြန်မာနိုင်ငံကြက်ခြေနီအသင်းဌာနချုပ်၌ ကျင်းပခဲ့ရာ ကျန်းမာရေးဝန်ကြီး ဌာန ပြည်ထောင်စုဝန်ကြီး ဒေါက်တာသက်ခိုင်ဝင်း၊ ဒုတိယဝန်ကြီး ဒေါက်တာအေးထွန်း၊ ညွှန်ကြားရေးမှူးချုပ်များ၊ နှီးနွယ်ဝန်ကြီးဌာနများမှ ညွှန်ကြားရေးမှူးချုပ်များ၊ မြန်မာနိုင်ငံ ကြက်ခြေနီ အသင်းဥက္ကဌ ဒေါက်တာမောင်မောင်မြင့်၊ အချိန်ပြည့်/အချိန်ပိုင်း အလုပ်အမှုဆောင်များ၊ တိုင်း ဒေသကြီး/ပြည်နယ်ကြက်ခြေနီ ကြီးကြပ်မှုကော်မတီဥက္ကဌများ၊ ကြက်ခြေနီကောင်စီဝင်များ၊ ပြည်နယ်/တိုင်းဒေသကြီးများမှ ကြက်ခြေနီတပ်ဖွဲ့မှူးများ၊ ညီလာခံကိုယ်စားလှယ်များ၊ လူငယ် ကိုယ်စားလှယ်များ၊ လူမှုရေးအသင်းအဖွဲ့များ၊ အပြည်ပြည်ဆိုင်ရာကြက်ခြေနီကော်မတီ၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်းနှင့် မိတ်ဖက်အမျိုးသားကြက်ခြေနီ အသင်းများမှတာဝန်ရှိသူများ၊ ဖိတ်ကြားထားသူများ တက်ရောက်ခဲ့ပါသည်။

ပြည်ထောင်စုဝန်ကြီးက အဖွင့်အမှာစကားပြောကြားရာ၌ ယနေ့စတင်ကျင်းပပြုလုပ်သည့် (၁၄)ကြိမ်မြောက် မြန်မာနိုင်ငံကြက်ခြေနီညီလာခံတွင် မြန်မာနိုင်ငံကြက်ခြေနီ ကောင်စီဝင်များနှင့် အလုပ်အမှုဆောင်အဖွဲ့အသစ်တို့ကို ရွေးချယ်တင်မြှောက် ဖွဲ့စည်းကြမည်ဖြစ်ကြောင်း၊ မြန်မာနိုင်ငံကြက်ခြေနီအသင်းသည် သမိုင်းကြောင်းအစဉ်အလာကြီးမြင့်ပြီး နိုင်ငံတော်၏ အရေးကြီးသော ပုံရိပ်တစ်ခုဖြစ်ကြောင်း၊ သဘာဝဘေးအန္တရာယ်များ၊ ဘေးဒုက္ခအန္တရာယ် အမျိုး မျိုးနှင့် ရင်ဆိုင်ကြုံတွေ့ရသည့်အခါတိုင်း နိုင်ငံတော်၏ အရန်အင်အားအဖြစ် လူမျိုး၊ ဘာသာ၊ ဆင်းရဲချမ်းသာ အဆင့်အတန်းမခွဲခြားဘဲ မိဘပြည်သူတစ်ရပ်လုံးကို ကိုယ်စွမ်းဉာဏ်စွမ်းရှိသမျှ ကယ်တင်ကူညီ စောင့်ရှောက်ခဲ့သည့် အသင်းဖြစ်ကြောင်း၊ အသင်း၏ ယခင်ဗဟိုကော်မတီဝင်များ၊ အလုပ်အမှုဆောင်အဖွဲ့ဝင်များကို လည်း မှတ်တမ်းတင်ဂုဏ်ပြုပါကြောင်း၊ ယခုတာဝန်ယူကြမည်ကောင်စီဝင်များ၊ အလုပ်အမှု ဆောင်အဖွဲ့ဝင်များအနေဖြင့် အသင်း၏ဥပဒေ၊ နည်းဥပဒေများနှင့်အညီ တာဝန်ယူမှု၊ တာဝန် ခံမှုအပြည့်ဖြင့် နိုင်ငံတော်နှင့် ပြည်သူတစ်ရပ်လုံး၏အကျိုးကို အစဉ်ရှေးရှု၍ ကျန်းမာရေးဝန်ကြီး ဌာန၏လုပ်ငန်းစဉ်များ၊ လမ်းညွှန်မှုများကိုခံယူ၍ ဗဟိုအဆင့်၊ တိုင်းဒေသကြီး/ ပြည်နယ်အဆင့်၊ ခရိုင်အဆင့်၊ မြို့နယ်အဆင့်မှ ရပ်ကွက်ကျေးရွာအဆင့်အထိ ထိထိမိမိ ညှိနှိုင်းပူးပေါင်း ဆောင် ရွက်သွားရန် အလေးထားမှာကြားလိုကြောင်း၊ အသင်း အနေဖြင့် သဘာဝဘေးအန္တရာယ်များ၊ လူ့ပယောဂကြောင့် ဖြစ်ပွားသည့်ဘေးအန္တရာယ်နှင့် အခြားသော အရေးပေါ်ကိစ္စရပ်များတွင် အမျိုးသားအဆင့်ကြိုတင် ပြင်ဆင်မှုနှင့် တုံ့ပြန်မှုအစီအစဉ်များတွင်ပါဝင်ဆောင်ရွက်ခြင်း၊ ကျန်းမာရေးနှင့်ရောဂါဘယ ကြိုတင်ကာကွယ်တားဆီးရေး လုပ်ငန်းများတွင်ဆောင်ရွက်ပေးခြင်း၊ ကိုဗစ်-၁၉ ကမ္ဘာလုံးဆိုင်ရာ ကပ်ရောဂါဖြစ်ပွားရာတွင်လည်း တပ်ဖွဲ့ဝင်များမှ စွမ်းစွမ်းတမံ ပူးပေါင်းကူညီ ဆောင်ရွက်ပေးခြင်း၊ ပြည်သူလူထုအတွက် ကျန်းမာရေး၊ လူမှုကာကွယ်ရေးနှင့် သက်ဆိုင်သော အသိပညာပေး လုပ်ငန်း များတွင် ကျေးလက်ဒေသ အောက်ခြေအထိ ပါဝင်ဆောင်ရွက်ပေးခြင်း၊ နိုင်ငံတကာ ကြက်ခြေနီ အဖွဲ့ အစည်းများ၊ AHAကဲ့သို့သောအဖွဲ့အစည်းများနှင့် ဆက်သွယ်ပူးပေါင်း၍ ပြည်သူလူထု အတွက် အမှန်တကယ် အကျိုးရှိစေမည့် လှူဒါန်းမှု၊ အကူအညီပေးမှုများဖြစ်စေရန် စီမံဆောင်ရွက် ပေးခြင်း၊ ပြည်သူလူထုအတွင်း လူမှုကရုဏာ၊ စေတနာရှင်၊ လုပ်ငန်းရှင်စိတ်ဓာတ်များ တိုးတက်ထွန်းကားလာစေရေးနှင့် အသိပညာပြန့်ပွားရေးတို့ကို တိုးမြှင့်ဆောင်ရွက်ပေးနိုင်ခဲ့သည် ကို တွေ့ရှိရ၍ ကျေးဇူးတင်ဝမ်းမြောက်ကြောင်း၊ အသင်းအနေဖြင့် ကြက်ခြေနီအခြေခံ“မူ”များနှင့်အညီ ပြည်သူလူထုအတွက်စာနာ ထောက်ထားမှုအကူအညီများကို ဆက်လက်ကြိုးပမ်းဆောင်ရွက်ရန်နှင့် အသင်း ရေရှည်တည် တံ့ခိုင်မြဲပြီးနိုင်ငံတော်နှင့် တိုင်းရင်းသားပြည်သူတို့၏ အကျိုးကို ထာဝစဉ်ရှေးရှု၍ လုပ်ငန်း တာဝန် များကို စွမ်းစွမ်းတမံ သယ်ပိုးထမ်းရွက်၍ ပူးပေါင်းဆောင်ရွက်ကြရန် ဖြစ်ကြောင်း ပြောကြားခဲ့ပါသည်။

ဆက်လက်၍ မြန်မာနိုင်ငံကြက်ခြေနီအသင်းဥက္ကဌ ဒေါက်တာမောင်မောင်မြင့်က(၁၃)ကြိမ် မြောက် မြန်မာနိုင်ငံကြက်ခြေနီညီလာခံ သက်တမ်းကာလအတွင်း အသင်း၏ လူမှုကရုဏာလုပ် ငန်းဆိုင်ရာ ဆောင်ရွက်ချက်များကို အကျဉ်းချုပ် ရှင်းလင်းတင်ပြသည်။ ထို့နောက် မှတ်တမ်း ဗီဒီယိုကို ပြသပြီး စုပေါင်းမှတ်တမ်းတင်ဓာတ်ပုံ ရိုက်ကူးခဲ့ပါသည်။