ရန်ကုန်၊ မေလ(၁၂)ရက်။

မြန်မာနိုင်ငံကြက်ခြေနီအသင်းသည် နိုင်ငံတစ်ဝန်း အကူအညီလိုအပ်သူများအတွက် လူမှုကရုဏာ အကူအညီများ‌ ပေးရာတွင် ကြက်ခြေနီအခြေခံမူများနှင့်အညီ ကူညီလျက်ရှိရာ ပြီးခဲ့သည့် မေလ (၄) ရက်မှ မေလ (၆) ရက်‌နေ့အထိ မကွေးတိုင်းဒေသကြီးရှိ ပြည်သူများအား အရေးပေါ် လူသားချင်းစာနာ ထောက်ထားမှု ဆိုင်ရာလုပ်ငန်းများဖြစ်သည့် စားနပ်ရိက္ခာ နှင့် အခြား အခြေခံ လိုအပ်သည့် ပစ္စည်းများ၊ ကိုဗစ်-၁၉ ကာကွယ်ရေးသုံးပစ္စည်းများနှင့် သန့်ရှင်းရေးသုံးပစ္စည်းများကို သွားရောက် ကူညီ ထောက်ပံ့ ပေးခဲ့ကြပါသည်။

ထိုသို့သွားရောက်ဆောင်ရွက်ရာတွင် မြန်မာနိုင်ငံကြက်ခြေနီအသင်းမှ ညွှန်ကြားရေးမှူး ဒေါ်အေးအေးငြိမ်း ဦးဆောင်သော ဝန်ထမ်း (၁၀) ဦး နှင့် မကွေးတိုင်းဒေသကြီးမှ ကြက်ခြေနီစေတနာ လုပ်အားရှင် (၄) ဦး စုစုပေါင်း (၁၄) ဦးတို့သည် မကွေးတိုင်းဒေသကြီး၊ ဆောမြို့နယ်နှင့် ကျောက်ထုမြို့ရှိ အိမ်ထောင်စု (၄၆၈) စု လူဦးရေ (၁,၈၀၃) ဦးအတွက် ကနဦး အရေးပေါ်လိုအပ်ချက်များဖြစ်သည့် အစားအစာ (ဆန်၊ ဆီ၊ ဆား၊ ပဲ၊ ငါးသေတ္တာ) (၄၆၈) စုံ၊ နှာခေါင်းစည်း (၅၀ ပါဗူး) (၄၆၈) ဗူး၊ လက်သန့်ဆေးရည် (၁၀၀ မီလီဗူး) (၄၆၈) ဗူး၊ မိသားစုသုံး တစ်ကိုယ်ရည်သန့်ရှင်းရေး သုံးပစ္စည်း (၄၆၈) ပုံး၊ မီးဖိုချောင်သုံးပစ္စည်း (၄၆၈)ပုံး၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၄၆၈) ပုံး၊ အမျိုးသား တစ်ကိုယ် ရည်သန့်ရှင်းရေးသုံးပစ္စည်း (၄၆၈) ပုံး၊ မိုးကာအင်္ကျီ (၉၃၆) ထည်၊ တာပေါ်လင် (၉၃၆) ချပ်၊ အိမ်ဆောက် အထောက်အကူပြုပစ္စည်း (၂၃၅) အိတ်နှင့် ရပ်ရွာလူထုသုံးရေသန့်ပုံး (Community Lifestraw ) ၂ ခုတို့ကို သွားရောက်ထောက်ပံ့ကူညီပေးခဲ့သည့်အပြင် စိတ်ပိုင်းဆိုင်ရာ အားပေးကူညီခြင်းတို့ကိုလည်း ပြုလုပ်ခဲ့ကြပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများအတွက် စားနပ်ရိက္ခာများ၊ ရေနှင့် သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန် ဆောင်ရွက်လျက် ရှိပါသည်။

ဆင်ဖြူကျွန်း၊ ၂၀၂၂ခုနှစ်၊မေလ(၁၂)ရက်။

မကွေးတိုင်းဒေသကြီး ဆင်ဖြူကျွန်းမြို့ကြက်ခြေနီအသင်းခွဲငယ်မှ ကြက်ခြေနီစေတနာလုပ်အားရှင် ကိုသက်ဇော်ဦးသည် ဆင်ဖြူကျွန်းဆေးရုံတွင် သွေးလိုအပ်နေသည့် လူနာအတွက် (A)အမျိုးအစား သွေး (၁)လုံးကို မေလ (၁၂) ရက်နေ့က သွားရောက် လှူဒါန်းပေးခဲ့ပါသည်။

မွန်၊ မေလ (၉)ရက်။

၂၀၂၂ခုနှစ်၊ ကမ္ဘာ့ကြက်ခြေနီနေ့ အထိမ်းအမှတ် စုပေါင်းသွေးလှူဒါန်းပွဲကို မေလ(၈)ရက်နေ့၊နံနက်(၈း၀၀)နာရီအချိန်တွင် မော်လမြိုင်သွေးလှူဘဏ်၌ ကျင်းပပြုလုပ်ခဲ့ပါသည်။ အဆိုပါ သွေးလှူဒါန်းပွဲသို့ မြန်မာနိုင်ငံကြက်ခြေနီအသင်း ဂုဏ်ထူးဆောင်အမှုဆောင် ဒေါက်တာတိုးတိုးအောင်၊ ပြည်နယ်ကြက်ခြေနီကြီးကြပ်မှုကော်မတီ ဒုတိယဥက္ကဌ ဒေါ်ခင်လေးသိင်္ဂါ နှင့် ကော်မတီဝင်များ၊ ပြည်နယ်ကြက်ခြေနီသူနာပြုတပ်ဖွဲ့ ဒုတိယပြည်နယ်တပ်ဖွဲ့မှူးနှင့် တပ်ဖွဲ့ဝင်များ၊ သထုံခရိုင်ကြက်ခြေနီသူနာပြုတပ်ဖွဲ့မှူး ဒုတိယခရိုင်တပ်ဖွဲ့မှူးနှင့် တပ်ဖွဲ့ဝင်များ၊ ပေါင်မြို့နယ်ကြက်ခြေနီအသင်းခွဲဥက္ကဌနှင့် တပ်ဖွဲ့ဝင်များ၊ မြို့နယ်များမှ မြို့နယ်တပ်ဖွဲ့မှူးများ၊ ဒုတိယမြို့နယ်တပ်ဖွဲ့မှူးများနှင့် တပ်ဖွဲ့ဝင်များ၊ စေတနာသွေးသန့် သွေးလှူရှင် တပ်ဖွဲ့ဝင်များ တက်ရောက်ခဲ့ကာ သွေးများ လှူဒါန်းခဲ့ကြပါသည်။နံနက်(၉း၀၀)အချိန်တွင် ပြည်နယ်ကြက်ခြေနီကြီးကြပ်မှုကော်မတီရုံး ခန်းမတွင် ကမ္ဘာ့ကြက်ခြေနီနေ့ အထိမ်းအမှတ် အခမ်းအနားကို ဆက်လက် ကျင်းပခဲ့ကြပါသည်။

ကျိုက္ခမီမြို့တွင်လည်း ၂၀၂၂ခုနှစ်၊ ကမ္ဘာ့ကြက်ခြေနီနေ့ အထိမ်းအမှတ် အခမ်းအနားများကို ကျိုက္ခမီမြို့ကြက်ခြေနီအသင်းခွဲရုံးတွင် ပြုလုပ်ကျင်းပခဲ့ပြီး ကြက်ခြေနီလူမှုကရုဏာလုပ်ငန်းများတွင် စွမ်းစွမ်းတမံဆောင်ရွက်ခဲ့ကြသည့် ကြက်ခြေနီစေတနာလုပ်အားရှင်တပ်ဖွဲ့ဝင်များအား ဂုဏ်ပြုဆုများချီးမြှင့်ခဲ့ပါသည်။

သံဖြူဇရပ်မြို့နယ်နှင့် ရေးမြို့နယ်များတွင်လည်း ၂၀၂၂ခုနှစ်၊ကမ္ဘာ့ကြက်ခြေနီနေ့ အထိမ်းအမှတ်အခမ်းအနားကို ကျင်းပပြုလုပ်ခဲ့ပြီး ကြက်ခြေနီလူမှုကရုဏာလုပ်ငန်းများတွင် စွမ်းစွမ်းတမံဆောင်ရွက်ခဲ့ကြသည့် ကြက်ခြေနီစေတနာလုပ်အားရှင်တပ်ဖွဲ့ဝင်များအား ဂုဏ်ပြုမှတ်တမ်းလွှာများပေးအပ်ကာ မြို့နယ်ကြက်ခြေနီအသင်းခွဲသို့ အလှူငွေများပေးအပ်လှူဒါန်းခဲ့သော အလှူရှင်များအား ဂုဏ်ပြုမှတ်တမ်းလွှာများ ပေးအပ်ချီးမြှင့်ခဲ့ပါသည်။ ထို့နောက် ပေါက်ကွဲစေတတ်သောပစ္စည်းများအန္တရာယ် အသိပညာပေး အစီအစဉ်အနေဖြင့် ပြခန်းများခင်းကျင်းပြသခြင်း နှင့် အသိပညာပေး မေးခွန်းများ အမေးအဖြေများ ပြုလုပ်ကာ လာရောက်ကြသူများအား အမှတ်တရလက်ဆောင်များ ပေးအပ်ခဲ့ကြပါသည်။

မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲမှုဌာနသည် ပေါက်ကွဲစေတတ်သော ပစ္စည်းများကြောင့် ထိခိုက်မှုလျှော့ပါးရေး အသိပညာပေးခြင်း စီမံချက်လုပ်ငန်းများကို နိုင်ငံတစ်ဝန်းရှိ မြို့နယ်များတွင် စဉ်ဆက်မပြတ် ဆောင်ရွက်လျှက်ရှိပါသည်။

၂၀၂၂ ခုနှစ်၊ မေလ (၁၁) ရက်နေ့က ရှမ်းပြည်နယ်(မြောက်ပိုင်း)၊ ကွမ်းလုံမြို့အတွင်းရှိ ပြည်သူများ ပေါက်ကွဲစေတတ်သော ပစ္စည်းများကြောင့် ထိခိုက်မှုလျှော့ပါးသက်သာစေရန်ရည်ရွယ်၍ မြေမြုပ်မိုင်းနှင့် ပေါက်ကွဲစေတတ်သော ပစ္စည်းအကြွင်းအကျန်များ၏ ဆိုးကျိုးများ၊ ထိခိုက်မှုအန္တရာယ်များနှင့် ဒေသဆိုင်ရာအမှတ်အသားများ အကြောင်းကို အသိပညာပေးဆွေးနွေးပြောကြားခဲ့ကြပါသည်။ ထိုသို့ဆွေးနွေးရာတွင် ပြည်နယ်ကြက်ခြေနီဒုတိယတပ်ဖွဲ့မှူး ဦးသိန်းစိုးနိုင်၊ စီမံချက်အရာရှိ ဒေါ်နှင်းနွယ်နွယ်ထွေးနှင့် မြို့နယ်မှကြက်ခြေနီစေတနာလုပ်အားရှင်များက ဦးဆောင်ဆွေးနွေးကာ တတ်ရောက်လာသူများကလည်း စိတ်ပါဝင်စားစွာပြန်လည်ဆွေးနွေးခဲ့ကြပါသည်။

ဖြူး၊ ၂၀၂၂ခုနှစ်၊ မေလ(၁၁)ရက်။

ရန်ကုန်-နေပြည်တော် အမြန်လမ်း(၁၂၈)မိုင်(၂/၃)ဖာလုံကြားတွင် မေလ(၁၁)ရက်နေ့ နံနက်ပိုင်းက မော်တော်ယာဉ်(၁)စီးတိမ်းမှောက်ခဲ့ရာ ထိခိုက်ဒဏ်ရာရသူ(၅)ဦးအား ဖြူးမြို့ပြည်သူ့ဆေးရုံတွင် ဆေးကုသမှုခံယူရန်နှင့် ရန်ကုန်ပြည်သူ့ဆေးရုံကြီးတွင် ဆက်လက်ကုသမှုခံယူရန် လူနာများညွှန်းပို့ရာတွင် မြန်မာနိုင်ငံကြက်ခြေနီအသင်း (၁၁၅)မိုင် ရှေးဦးပြုစုခြင်းစခန်းနှင့် ဖြူးမြို့နယ်ကြက်ခြေနီအသင်းခွဲတို့မှ ကြက်ခြေနီစေတနာလုပ်အားရှင်များသည် လူမှုရေအသင်းအဖွဲ့များနှင့်အတူ ကြက်ခြေနီလူနာတင်ယာဉ်ဖြင့် ပါဝင်ကူညီ ဆောင်ရွက်ခဲ့ကြပါသည်။

၂၀၂၂ ခုနှစ်၊ မေလ (၁၁) ရက်နေ့က ရခိုင်ပြည်နယ်၊ ကျောက်တော်မြို့နယ်၊ အလယ်ကျွန်းကျေးရွာမှ အသက် (၄၇) နှစ်အရွယ် အမျိုးသားတစ်ဦး အရေးပေါ် သွေးလိုအပ်နေသဖြင့် မြို့နယ်မှ ကြက်ခြေနီစေတနာလုပ်အားရှင် ဦးခိုင်စိုးမင်းက (B) သွေးတစ်လုံးလှူဒါန်းခဲ့ပါသည်။ ယခုသွေးလှူဒါန်းမှုသည် (၁၀) ကြိမ်မြောက်သွေးလှူဒါန်းခြင်းဖြစ်ကြောင်း သိရပါသည်။

၂၀၂၂ ခုနှစ်၊ မေလ (၉) ရက်။

၂၀၂၂ခု နှစ်၊ ကမ္ဘာ့ကြက်ခြေနီနေ့အထိမ်းအမှတ် အခမ်းအနားကို ရခိုင်ပြည်နယ်၊ ကျောက်တော်မြို့နယ်၊ ကြက်ခြေနီအသင်းခွဲရုံးတွင် မေလ (၈) ရက်နေ့က ကျင်းပခဲ့ရာ မြန်မာနိုင်ငံကြက်ခြေနီအသင်း ဥက္ကဌ ဒေါက်တာမောင်မောင်မြင့်မှ ပေးပို့သော သဝဏ်လွှာကို မြို့နယ်ကြက်ခြေနီတပ်ဖွဲ့မှူးက ဖတ်ကြားခဲ့ပါသည်။

ထို့နောက် မြို့နယ်ကြက်ခြေနီအသင်းခွဲ ဥက္ကဌက အမှာစကားပြောကြားခဲ့ပြီး COVID-19 ရောဂါ ကာကွယ်ထိန်းချုပ်ရေးလုပ်ငန်းများတွင် စွမ်းစွမ်းတမံ ကူညီဆောင်ရွက်ခဲ့သော ကြက်ခြေနီစေတနာလုပ်အားရှင်(၁၃) ဦးတို့အား ရောဂါကာကွယ်ထိန်းချုပ်ရေး အရေးပေါ်တုန့်ပြန်ရေးကော်မတီက ပေးအပ်သည့် ဂုဏ်ပြုမှတ်တမ်းလွှာများကို ပေးအပ်ချီးမြှင့်ခဲ့ပါသည်။

ထို့အတူ စစ်တွေမြို့နယ်ကြက်ခြေနီအသင်းခွဲရုံးတွင် ကမ္ဘာ့ကြက်ခြေနီနေ့အထိမ်းအမှတ် အခမ်းအနားကို ကျင်းပခဲ့ရာ မြန်မာနိုင်ငံကြက်ခြေနီအသင်းဥက္ကဌ ဒေါက်တာမောင်မောင်မြင့်ထံမှ ပေးပို့သော သဝဏ်လွှာကို မြို့နယ်ကြက်ခြေနီအသင်းခွဲဥက္ကဌက ဖတ်ကြားခဲ့ပါသည်။

ထို့နောက် ရှေးဦးပြုစုခြင်းနည်းဖြင့် ကူညီပေးမှုများအား သရုပ်ပြသခဲ့ပြီး ရှေးဦးပြုစုခြင်းစွမ်းရည်ပြိုင်ပွဲတွင် ဆုရရှိသည့် ကြက်ခြေနီစေတနာလုပ်အားရှင်များအား ဆုများချီးမြှင့်ပေးအပ်ခဲ့ပါသည်။

၂၀၂၂ခုနှစ်၊ ကမ္ဘာ့ကြက်ခြေနီနေ့အထိမ်းအမှတ်အဖြစ် ကချင်ပြည်နယ်၊ မြစ်ကြီးနားမြို့ရှိ နေရပ်စွန့်ခွာစခန်းများတွင် ကချင်ပြည်နယ် ကြက်ခြေနီကြီးကြပ်မှုကော်မတီ နှင့် အပြည်ပြည်ဆိုင်ရာကြက်ခြေနီကော်မတီတို့ ပူပေါင်းပြီး ကြက်ခြေနီအကြောင်း သိကောင်းစရာများကို ပြောကြားခဲ့ရာ ပြည်နယ်ကြက်ခြေနီကြီးကြပ်မှုကော်မတီဥက္ကဌ ဦးဘရန်ဒီးနှင့် အပြည်ပြည်ဆိုင်ရာကြက်ခြေနီကော်မတီမှ တာဝန်ရှိသူများ တက်ရောက်ခဲ့ပြီး အသက်(၆၀)နှစ်အထက် သက်ကြီးရွယ်အို (၁၉၀)ဦးတို့အား ဖျာ၊ ဆပ်ပြာ၊ နှာခေါင်းစည်း၊ မျက်နှာအကာနှင့် လက်သန့်ဆေးရည် များကို ထောက်ပံ့ ပေးအပ်ခဲ့ပါသည်။

ထို့အတူ မိုးညှင်းခရိုင်၊ မိုးကောင်းမြို့တွင် ၂၀၂၂ခုနှစ်၊‌ ကမ္ဘာ့ကြက်ခြေနီနေ့ အထိမ်းအမှတ်အခမ်းအနားနှင့် အလှူငွေပေးအပ်ပွဲကို မေလ(၈)ရက်နေ့ နံနက်ပိုင်းက ကျင်းပခဲ့ရာ မြို့နယ်မှ ကြက်ခြေနီစေတနာလုပ်အားရှင်များက “မြန်မာပြည်မြောက်ဖျားက တို့ကြက်ခြေနီ” သီချင်းဖြင့် သီဆိုဖွင့်လှစ်ခဲ့ပြီး မြန်မာနိုင်ငံကြက်ခြေနီအသင်းဥက္ကဌ ဒေါက်တာမောင်မောင်မြင့်ထံမှ ပေးပို့သော ကမ္ဘာ့ကြက်ခြေနီနေ့ အထိမ်းအမှတ်သဝဏ်လွှာကို မြို့နယ်ကြက်ခြေနီအသင်းခွဲ ဒုတိယဥက္ကဌက ဖတ်ကြားခဲ့ပါသည်။

ထို့နောက် ပြည်နယ်ကြက်ခြေနီကြီးကြပ်မှုကော်မတီ ဥက္ကဌက ကမ္ဘာ့ကြက်ခြေနီနေ့ အထိမ်းအမှတ် အမှာစကားပြောကြားပြီး မြို့နယ်ကြက်ခြေနီအသင်းခွဲနာယက က ကမ္ဘာ့ကြက်ခြေနီနေ့အထိမ်းအမှတ် ကျင်းပရခြင်းကို ရှင်းလင်းပြောကြားခဲ့ပါသည်။

ဆက်လက်ပြီး မြို့နယ်ကြက်ခြေနီတပ်ဖွဲ့မှူးက မြို့နယ်ကြက်ခြေနီအသင်းခွဲ၏ ဆောင်ရွက်ချက်များကို ရှင်းလင်းပြောကြားခဲ့ပြီး အလှူရှင်များအား ဂုဏ်ပြုမှတ်တမ်းလွှာများကို ပေးအပ်ခဲ့ပါသည်။

ယင်းနောက် မြို့နယ်ကြက်ခြေနီအသင်းခွဲနှင့် မြို့နယ်ကြက်ခြေနီသူနာပြုတပ်ဖွဲ့တွင် (၁၅)နှစ်ပြည့် လှုပ်ရှားဆောင်ရွက်ခဲ့သူ(၂၉)ဦး နှင့် (၃၀)နှစ်ပြည့်လှုပ်ရှားဆောင်ရွက်ခဲ့သူ(၂)ဦးတို့အား မြန်မာနိုင်ငံကြက်ခြေနီအသင်းမှ ပေးပို့သော ဂုဏ်ပြုမှတ်တမ်းလွှာနှင့် ဂုဏ်ထူးဆောင်တံဆိပ်များကို ပေးအပ်ချီးမြှင့်ခဲ့ပြီး မြို့နယ်ကြက်ခြေနီအသင်းခွဲ ဥက္ကဌက ကျေးဇူးတင်စကားပြောကြားကာ မြို့နယ်မှ ကြက်ခြေနီ‌စေတနာလုပ်အားရှင်များက “ခြေလှမ်းသစ်များနဲ့ တို့ကြက်ခြေနီ” သီချင်းကို သီဆိုခဲ့ကြပါသည်။

၂၀၂၂ခုနှစ်၊ မေလ (၉)ရက်နဲ့ (၁၀)ရက်နေ့များမှာ ဆိုရင် ထားဝယ်မြို့နယ်မှ ကြက်ခြေနီစေတနာလုပ်အားရှင်များဟာ ၂၄နာရီပတ်လုံး အရေးပေါ်လူနာတင်ယာဉ်ဝန်ဆောင်မှုဖြင့် အရေးပေါ်လူနာများနှင့် ထိခိုက်ဒဏ်ရာရသူတွေကို ဆေးရုံသို့ပို့ဆောင်ကူညီပေးခဲ့ပါတယ်။ အဲ့ဒီလိုကူညီဆောင်ရွက်ရာမှာ မေလ(၉)ရက်နေ့၊ နေ့လည် (၁၂း၀၀)နာရီအချိန်ခန့်က ထားဝယ်မြို့၊ ဇဟာကျေးရွာမှာနေထိုင်တဲ့ ဆေးရုံပြောင်းလူနာတစ်ဦးကို မြင့်မိုရ်ဦးဆေးရုံကနေ ထားဝယ်မြို့ပြည့်သူ့ဆေးရုံကြီးသို့ ပို့ဆောင်ပေးခြင်း၊ မွန်းလွဲ (၁း၀၀)နာရီခန့်က မယ်ဒီလန်းဆေးရုံမှ ဆေးကုသမှုခံယူပြီးလူနာအား ဘုမ္မော်ရပ်ရှိ နေအိမ်သို့ ပို့ဆောင်ပေးခြင်း၊ မွန်းလွဲ(၂း၀၀)နာရီခန့်က ဆန်းချီရပ်မှာနေထိုင်တဲ့ အရိုးကျိုးလူနာကို နေအိမ်မှ ဓါတ်မှန်ခန်း ထိုမှတဆင့် အရိုးဆေးခန်း မှနေအိမ်သို့ ပို့ဆောင်ပေးခြင်းများကို ကြက်ခြေနီစေတနာလုပ်အားရှင်များက ကူညီပို့ဆောင်ပေးခဲ့ပါတယ်။

မေလ(၁၀)ရက်နေ့မှာတော့ နံနက်(၁၀:၅၀)နာရီအချိန်ခန့်က သရက်ချောင်းမြို့နယ်၊ အောက်သရက်ချောင်းကျေးရွာမှ ဓါတ်မှန်ရိုက်လူနာအား မြင့်မိုရ်ဦးဆေးရုံမှ မယ်ဒီလန်းဆေးရုံသို့ ပို့ဆောင်ပေးခြင်း၊ နံနက်(၁၁း၀၀)နာရီ အချိန်ခန့်က ဆေးရုံဆင်းလူနာအား မြင့်မိုရ်ဦးဆေးရုံမှ ဘုမ္မော်ရပ် နေအိမ်သို့ ပို့ဆောင်ပေးခြင်း၊ မွန်းလွဲ (၁း၅၀)နာရီအချိန်ခန့်က သရက်ချောင်းမြို့နယ်၊ ပိတိုင်ကျေးရွာက ဓါတ်မှန်ရိုက်လူနာအား ထားဝယ်ဆေးရုံကြီးမှ မယ်ဒီလန်းဆေးရုံသို့ ပို့ဆောင်ပေးခြင်း၊ ညနေ(၃း၁၅)နာရီခန့်က ဥသာရံရပ်မှ ကိုယ်ဝန်ဆောင်မိခင်အား နေအိမ်မှ မယ်ဒီလန်းဆေးရုံသို့ ပို့ဆောင်ပေးခြင်း၊ ည(၁၁း၀၀)နာရီအချိန်ခန့်မှာ ဆောင်းနှင်းပြင်ကျေးရွာမှ အသက်ရှူကြပ် ရောဂါဝေဒနာခံစားနေရသော လူနာအား နေအိမ်မှ ထားဝယ်ပြည့်သူ့ဆေးရုံကြီးသို့ ပို့ဆောင်ပေးခြင်း များကို ထားဝယ်မြို့နယ်မှ ကြက်ခြေနီစေတနာလုပ်အားရှင်များက ကူညီဆောင်ရွက်ပေးခဲ့ပါတယ်။