ကြက်ခြေနီလှုပ်ရှားမှုများ | Myanmar Red Cross Society (MRCS)

01/ Apr/ 2022

ဧရာဝတီတိုင်းဒေသကြီးအတွင်းရှိ ကြက်ခြေနီများက လူမှုကရုဏာလုပ်ငန်းများဆောင်ရွက်လျက်ရှိ

ဧရာဝတီ၊ ၂၀၂၂ခုနှစ်၊ ဧပြီလ(၁)ရက်။

၂၀၂၂ခုနှစ်၊ မတ်လ (၃၁)ရက်နေ့တွင် ကျောင်းကုန်းမြို့နယ်ဆေးရုံတွင် ဆေးကုသမှုခံယူနေသော လူနာအတွက်အရေးပေါ်လိုအပ်နေသည့် ‘A’သွေး (၁)လုံးအား မြို့နယ်ကြက်ခြေနီစေတနာလုပ်အားရှင် မောင်မင်းလွင်ဦး မှ လှူဒါန်းကုသိုလ်ပြုခဲ့ပါသည်။ ကျောင်းကုန်းမြို့နယ်၊ အခြေခံပညာအထက်ကျောင်း(ခွဲ) အောက်ပိုင်းကျောင်း တွင် ဖွင့်လှစ်သော ရှေးဦးပြုစုခြင်း(အခြေခံ)သင်တန်း သင်တန်းဆင်းပွဲအား မတ်လ(၃၀)ရက်နေ့တွင် ပြုလုပ်ခဲ့ပြီး ပုသိမ်ခရိုင်ကြက်ခြေနီတပ်ဖွဲ့မှူး၊ မြို့နယ်ပညာရေးမှူး၊ မြို့နယ်ကြက်ခြေနီတပ်ဖွဲ့မှူး နှင့် သင်တန်းသူ/သားများ တက်ရောက်ခဲ့ကြပါသည်။ အဆိုပါ သင်တန်းအား မတ်လ(၂၈)ရက်နေ့မှ စတင်ဖွင့်လှစ်ခဲ့ပြီး (၃)ရက်တာသင်ကြားပြီးစီးခဲ့ပါသည်။

၂၀၂၂ခုနှစ်၊ မတ်လ (၂၅)ရက်နေ့ နှင့် (၂၈)ရက်နေ့များတွင် ငပုတောမြို့နယ်ကြက်ခြေနီအသင်းခွဲ၊ ရေငံသရက်ကုန်း ကြက်ခြေနီစေတနာလုပ်အားရှင်များသည် ဟင်းအိုးချောင်းကျေးရွာအုပ်စု၊ မြတ်တိုဝဲကြီးကျေးရွာ နှင့် ကွင်းချောင်းကျေးရွာအုပ်စု၊ သူကြီးကုန်းကျေးရွာ များတွင် COVID-19 ရောဂါ ကာကွယ်ဆေးထိုးခြင်းလုပ်ငန်းများတွင် ကူညီဆောင်ရွက်ပေးခဲ့ပါသည်။

ထို့နောက် မတ်လ (၂၈)ရက်နေ့တွင် အရေးပေါ်လူနာအား ငပုတောဆေးရုံမှ ပုသိမ်ဆေးရုံကြီးသို့ ငပုတောမြို့နယ်ကြက်ခြေနီစေတနာလုပ်အားရှင်များက လွှဲပြောင်းပို့ဆောင်ပေးခဲ့ပါသည်။

ဘိုကလေးမြို့နယ်၊ ဘိုကလေးနဒီ အထူးကုဆေးရုံမှ ရန်ကုန်မြို့၊ ပန်းလှိုင်ဆေးရုံသို့ လွှဲပြောင်းလူနာ အမျိုးသမီးတစ်ဦးအား ဘိုက‌လေးမြို့နယ် ကြက်ခြေနီစေတနာလုပ်အားရှင်များက ပို့ဆောင်ကူညီပေးခဲ့ပါသည်။

26/ Mar/ 2022

ရှမ်းပြည်နယ်(တောင်ပိုင်း)ရှိ မြို့နယ်များမှ နေရပ်စွန့်ခွာစခန်းများသို့ ရောက်ရှိလာကြတဲ့ ပြည်သူများကို ကြက်ခြေနီများက အကူအညီများ ပေးလျက်ရှိ

မြန်မာနိုင်ငံကြက်ခြေနီအသင်းသည် အပြည်ပြည်ဆိုင်ရာကြက်ခြေနီကော်မတီ၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်း၊ မိတ်ဖက်အမျိုးသားကြက်ခြေနီအသင်းများနှင့် အလှူရှင်များ ပူးပေါင်းကာ ရှမ်းပြည်နယ်(တောင်ပိုင်း)ရှိ မြို့နယ်များမှ နေရပ်စွန့်ခွာစခန်းများသို့ ရောက်ရှိလာကြတဲ့ ပြည်သူများကို အကူအညီများ ပေးလျက်ရှိပါတယ်။

ယခုနှစ်မတ်လအတွင်းမှာ ညောင်ရွှေမြို့နယ် အင်းလေးဒေသရှိ နေရပ်စွန့်ခွာစခန်းများကပြည်သူများ လိုအပ်သည့် အသုံးအဆောင်ပစ္စည်များဖြစ်တဲ့ တစ်ကိုယ်ရည်သန့်ရှင်းရေးသုံးပစ္စည်းများ၊ စောင်၊ ခြင်ထောင်၊ ဖျာ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်းများ၊ လက်သန့်ဆေးရည်များနဲ့ ပါးစပ်နှာခေါင်းစည်များကို သွားရောက်ပေးအပ်ကူညီခဲ့ပါတယ်။

ဆိုလာမီးအိမ်၊ ရေသန့်စင်ကိရိယာများကိုလည်း ပေးအပ်ခဲ့ကြပြီး အသုံးပြုပုံများကိုရှင်းလင်းပြသခဲ့ကြတဲ့အပြင် စိတ်ပိုင်း၊ လူမှုပိုင်းဆိုင်ရာ အားပေးမှုတွေကိုလည်း ပြုလုပ်ပေးခဲ့ကြပါတယ်။

ရွေ့လျားဆေးကုသခန်းများလည်း သွားရောက်ဖွင့်လှစ်ပေးပြီး ပဏာမကျန်းမာရေးစောင့်ရှောက်မှုများပေးလျက်ရှိရာမှာ မတ်လ(၁)ရက်မှ မတ်လ(၂၅)ရက်နေ့အထိ တောင်ကြီး၊ ညောင်ရွှေ၊ ဆီဆိုင်၊ ပင်လောင်းမြို့နယ်များရှိ နေရပ်စွန့်ခွာစခန်းများကပြည်သူ

(၂,၃၆၂)ဦးကို ကျန်းမာရေးစောင့်ရှောက်မှုပေးနိုင်ခဲ့ပါတယ်။

ထိုသို့ဆောင်ရွက်ရာတွင် ပြည်နယ်ကြက်ခြေနီကြီးကြပ်မှုကော်မတီ၊ အသင်းဌာနချုပ် ဘေးအန္တရာယ်ဆိုင်ရာစီမံခန့်ခွဲမှုဌာနနဲ့ ပြည်နယ်အတွင်းရှိ မြို့နယ်များမှ ကြက်ခြေနီစေတနာလုပ်အားရှင်များက ကူညီဆောင်ရွက်ပေးလျက်ရှိပါတယ်။

23/ Mar/ 2022

တနင်္သာရီတိုင်းဒေသကြီးတွင် ကြက်ခြေနီက လူမှုကရုဏာလုပ်ငန်းများ ဆောင်ရွက်လျက်ရှိ

တနင်္သာရီတိုင်း၊ မတ်လ (၂၃)ရက် ။

တနင်္သာရီတိုင်းဒေသကြီးတွင် ကြက်ခြေနီက လူမှုကရုဏာလုပ်ငန်းများကို တိုးမြှင့်ဆောင်ရွက်လျက်ရှိကြပါသည်။ COVID 19ရောဂါတုံ့ပြန်ဆောင်ရွက်ရေးလုပ်ငန်းများမှ စတင်ကာ ရပ်ရွာလူထုအတွင်း အရေးပေါ်လိုအပ်လျက်ရှိသည့် လူမှုကရုဏာအကူအညီများကို အချိန်နဲ့တပြေးညီ အထိရောက်ဆုံးပံ့ပိုးကူညီပေးနိုင်စေဖို့ ကြိုးစားအားထုတ်လျက်ရှိကြပါသည်။

ယနေ့ မတ်လ(၂၃)ရက်နေ့တွင် သရက်ချောင်းမြို့နယ်ကြက်ခြေနီအသင်းခွဲမှ စေတနာလုပ်အားရှင်များက လောင်းလုံမြို့နယ် ဝေတီကျေးရွာမှ အသေးစားခြေတုပြုပြင်ရန်လိုအပ်သူ(၂)ဦးအား ခြေဖဝါးအသစ်လဲပေးခြင်းနှင့် ဒူးခါးပတ်ကြိုးလဲပေးခြင်းတို့ကို ဆောင်ရွက်ကူညီပေးခဲ့ပါသည်။

မတ်လ(၂၁)ရက်နေ့က ထားဝယ်မြို့နယ်ကြက်ခြေနီအသင်းခွဲမှ စေတနာလုပ်အားရှင်များသည် ဆန်းချီရပ်မှဆေးရုံဆင်းလူနာတစ်ဦးအား မယ်ဒီလန်းဆေးရုံမှ နေအိမ်သို့လည်းကောင်း၊ သရက်ချောင်းမြို့နယ် ဆီတောကျေးရွာမှ ဆေးရုံလွှဲပြောင်းလူနာတစ်ဦးအား ထားဝယ်ဆေးရုံကြီးမှ ချမ်းမြေ့ဆေးရုံသို့လည်းကောင်း၊ ကြက်စားပြင်ရပ်မှ ခြေထောက်အရိုးကျိုးလူနာတစ်ဦးအား ထားဝယ်ဆေးရုံကြီးမှ သီရိအားမာန်ဓာတ်မှန်ခန်းသို့လည်းကောင်း၊ ဘုမ္မောရပ်က လူနာတစ်ဦးအား မြင့်မိုရ်ဦးဆေးရုံသို့လည်းကောင်း အသီးသီးပို့ဆောင်ကူညီပေးခဲ့ကြပါသည်။

22/ Mar/ 2022

ညောင်ရွှေတွင် မြန်မာနိုင်ငံကြက်ခြေနီအသင်းနှင့် ကမ္ဘာ့စားနပ်ရိက္ခာအစီအစဉ်တို့ ပူးပေါင်းပြီး နေရပ်စွန့်ခွာပြည်သူများအား စားနပ်ရိက္ခာများ ထောက်ပံ့

ညောင်ရွှေ၊ မတ်လ(၂၂) ရက်။

မြန်မာနိုင်ငံကြက်ခြေနီအသင်းနှင့် ကမ္ဘာ့စားနပ်ရိက္ခာအစီအစဉ် (WFP)တို့ ပူးပေါင်း၍ ရှမ်းပြည်နယ် (တောင်ပိုင်း) ညောင်ရွှေမြို့နယ်တွင် ရောက်ရှိနေသော နေရပ်စွန့်ခွါစခန်း (၃) ခုရှိ အိမ်ထောင်စု(၉၅) စုတို့အား စားနပ်ရိက္ခာထောက်ပံ့သည့်အစီအစဉ်ကို မတ်လ(၂၁) ရက်က ပြုလုပ်ခဲ့ရာ ဒုတိယဥက္ကဌဒေါက်တာဒေါ်အမယာမော်နိုင် တက်ရောက်ခဲ့ပါသည်။

အဆိုပါ နေရပ်စွန့်ခွါစခန်း (၃) ခုရှိ အိမ်ထောင်စု (၉၅) စု လူဦးရေ (၃၃၃) ဦး တို့အတွက် ဆန်၊ ဆီ၊ ပဲ၊ ဆား စသည့် စားနပ်ရိက္ခာနှင့် (၅) နှစ်အောက်ကလေး (၂၇) ဦး၊ နို့တိုက်မိခင်နှင့် ကိုယ်ဝန်ဆောင်မိခင် (၉) ဦး တို့အတွက် အဟာရဖြည့်စွက်စာများ ထောက်ပံ့ပေးခဲ့ပါသည်။

ထိုသို့ထောက်ပံ့ရာတွင် ဒုတိယဥက္ကဌနှင်အတူ ရှမ်းပြည်နယ် (တောင်ပိုင်း) ကြက်ခြေနီကြီးကြပ်မှုကော်မတီ ဥက္ကဌ ဦးညီညီ ၊ အသင်းဌာနချုပ်ဘေးအန္တရာယ်ဆိုင်ရာစီမံခန့်ခွဲမှုဌာန ဒုတိယညွှန်ကြားရေးမှူး ဒေါ်မိုးသီတာဝင်းနှင့် ညောင်ရွှေမြို့နယ်မှကြက်ခြေနီစေတနာလုပ်အားရှင်များက နေရပ်စွန့်ခွာပြည်သူများအား ဆန်၊ဆီအစရှိသည့် စားသောက်ကုန်များကို ထောက်ပံ့ကူညီ ပေးအပ်ခဲ့ကြပါသည်။

အသင်းနေဖြင့် ရှမ်းပြည်နယ် (တောင်ပိုင်း) ရှိ နေရပ်စွန့်ခွါစခန်းများတွင် ယခုလ (၁၉) ရက်နေ့မှ (၂၁) ရက်နေ့ထိ အိမ်ထောင်စု စုစုပေါင်း (၂၃၄) လူဦးရေ (၇၉၆) ဦးအား ဆန်၊ ဆီ၊ ပဲ၊ ဆား စသည့် စားနပ်ရိက္ခာနှင့် (၅) နှစ်အောက်ကလေး (၆၇) ဦး၊ နို့တိုက်မိခင်၊ ကိုယ်ဝန်ဆောင်မိခင် (၃၁) ဦးအတွက် အာဟာရဖြည့်စွက်စာများ ဖြန့်ဝေပေးခဲ့ပြီးဖြစ်ပါသည်။

ဆက်လက်ပြီး ညောင်ရွှေ၊ တောင်ကြီး၊ ဆီဆိုင်၊ ပင်းတယ၊ ပင်လောင်း မြို့နယ်များအတွင်းရှိ နေရပ်စွန့်ခွါပြည်သူများအတွက် ထောက်ပံ့နိုင်ရန် စီစဉ်ဆောင်ရွက်လျက်ရှိပါသည်။ အသင်းအနေဖြင့် ကမ္ဘာ့စားနပ်ရိက္ခာအစီအစဉ်တို့ဖြင့် ပူးပေါင်းပြီး ပြီးခဲ့သည့် လအနည်းငယ်က ရန်ကုန်နှင့် မန္တလေးတို့တွင်လည်း ဆန်များဖြန့်ဝေခဲ့ပြီးဖြစ်ပါသည်။

21/ Mar/ 2022

Data Management in Excel Training သင်တန်းဖွင့်ပွဲပြုလုပ်

ရန်ကုန်၊ ၂၀၂၂ခုနှစ်၊ မတ်လ(၂၁)ရက်။

မြန်မာနိုင်ငံကြက်ခြေနီအသင်းနှင့် အမေရိကန်နိုင်ငံကြက်ခြေနီအသင်းတို့ ပူးပေါင်းဖွင့်လှစ်သော Data Management in Excel Training သင်တန်းဖွင့်ပွဲကို မတ်လ(၂၁)ရက်နေ့ နံနက်ပိုင်းက ရန်ကုန်ရုံးခွဲ၌ ပြုလုပ်ခဲ့ရာ အချိန်ပြည့်အလုပ်အမှုဆောင် ဒေါက်တာတင်ညွန့်က အမှာစကားပြောကြားခဲ့ပါသည်။

မတ်လ(၂၁)ရက်နေ့မှ မတ်လ(၂၅)ရက်နေ့အထိ (၅)ရက်ကြာပြုလုပ်သွားမည့်အဆိုပါသင်တန်းကို ကြက်ခြေနီစေတနာလုပ်အားရှင်များ၊ ဝန်ထမ်းများအား နည်းပညာပိုင်းဆိုင်ရာ စွမ်းဆောင်ရည်များမြင့်မားစေရန်ရည်ရွယ် ဖွင့်လှစ်ခြင်းဖြစ်ပြီး တိုင်းဒေသကြီး/ပြည်နယ်များမှ အထောက်အကူပြုအရာရှိများ၊ အသင်းဌာနချုပ်မှဝန်ထမ်းများ စုစုပေါင်းသင်တန်းသား(၂၁)ဦးတို့ တက်ရောက်ကြမည် ဖြစ်ပါသည်။

21/ Mar/ 2022

ပုသိမ်တွင် ယာဉ်တိုက်မှုဖြစ်ပွားရာသို့ ကြက်ခြေနီက သွားရောက်ကူညီ

၂၀၂၂ခုနှစ်၊ မတ်လ(၁၉)ရက်နေ့ မွန်းလွဲပိုင်းက ဧရာဝတီတိုင်းဒေသကြီး၊ ပုသိမ်မြို့နယ်၊ ရှောပြာကျေးရွာအနီး၌ ခရီးသည်တင်ကားနှင့် ကိုယ်ပိုင်ကားတို့ ယာဉ်တိုက်မှုဖြစ်ပွားကာ မီးလောင်သည့်နေရာသို့ ပုသိမ်ခရိုင်/မြို့နယ်များမှ ကြက်ခြေနီစေတနာလုပ်အားရှင်များသည် ကူညီဆောင်ရွက်ပေးနိုင်ရန် သွားရောက်ခဲ့ပါသည်။

အဆိုပါဖြစ်စဉ်ကြောင့် မီးလောင်သေဆုံးသွားခဲ့သူများ၏ ရုပ်အလောင်းများကို ပုသိမ်ပြည်သူ့ဆေးရုံကြီး ရင်ခွဲရုံသို့ ပို့ဆောင်နိုင်ရေးအတွက် မိတ်ဖက်လူမှုကူညီရေးအသင်းများနှင့်အတူ အကူအညီ ပေးခဲ့ပါသည်။

ထို့အပြင် သေဆုံးသူများ၏ မိသားစုဝင်များထံ ဆက်သွယ်အကြောင်းကြားနိုင်ရေးအတွက် ပြည်နယ်/တိုင်းဒေသကြီးများရှိ မြို့နယ်ကြက်ခြေနီအသင်းခွဲများထံ ပုသိမ်မြို့နယ်ကြက်ခြေနီအသင်းခွဲမှကြက်ခြေနီစေတနာလုပ်အားရှင်များက ချိတ်ဆက်ကူညီ ဆောင်ရွက်ခဲ့ပါသည်။

21/ Mar/ 2022

နေပြည်တော်တွင် ကြက်ခြေနီက လူမှုကရုဏာလုပ်ငန်းများ ဆက်လက်ဆောင်ရွက်

နေပြည်တော်၊ မတ်လ (၂၁) ရက်။

မတ်လ(၁၉)ရက်နေ့က ပြည်ထောင်စုနယ်မြေ၊နေပြည်တော်၊ ဥတ္တရသီရိမြို့နယ် မိုးဆွေအုပ်စု ပန်းတင်ကျေးရွာတွင် လမ်းဖြတ်ကူးသူအမျိုးသမီးတစ်ဦး ယာဉ်တိုက်မှုဖြစ်ပွားခဲ့သဖြင့် ဥတ္တရသီရိမြို့န်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသွားရောက်၍ အရေးပေါ်ရှေးဦးပြုစုပေးခဲ့ကြပြီး မြတ်စေတနာပရဟိတအသင်းလူနာတင်ယာဉ်ဖြင့် နေပြည်တော်ပြည်သူ့ဆေးရုံကြီး (ကုတင် ၁၀၀၀)သို့ ပို့ဆောင်ကူညီပေးခဲ့ပါသည်။

မတ်လ (၂၀)ရက်နေ့က ဇေယျာသီရိမြို့နယ်မှ ကြက်ခြေနီစေတနာလုပ်အားရှင်များက ဥတ္တရသီရိအထူးကုဆေးရုံမှ ဆေးရုံဆင်းလူနာအမျိုးသမီးတစ်ဦးအား ပြည်စံအောင်ရပ်ကွက်ရှိ နေအိမ်သို့ ပြန်လည်ပို့ဆောင်ပေးခဲ့ပြီး Oxygen Concentrator တစ်လုံးကို ငှားရမ်းကူညီပေးခဲ့ပါသည်။

21/ Mar/ 2022

မုန်တိုင်းအန္တရာယ်နှင့်ပတ်သက်၍ အသိပညာပေးခြင်းများ ဆက်လက်ဆောင်ရွက်

မတ်လ(၂၁)ရက်နေ့က ဧရာဝတီတိုင်းဒေသကြီး၊ မအူပင်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်(၁၀)ဦးက မုန်တိုင်းအန္တရာယ်နှင့်ပတ်သက်၍ အသိပညာပေးခြင်းနှင့် မုန်တိုင်းကျရောက်ပါက ပြင်ဆင်ထားရမည့်အချက်များအား မအူပင်ဆိပ်ကမ်းရှိ ခရီးသွားရေယာဉ်များအား အသိပညာပေးဆောင်ရွက်ခြင်းများကို ပြုလုပ်ပေးခဲ့ကြပါသည်။

20/ Mar/ 2022

နေပြည်တော်တွင် ကြက်ခြေနီက လူမှုကရုဏာအကူအညီများ ဆက်လက်ဆောင်ရွက်

နေပြည်တော်၊ မတ်လ (၂၀)ရက် ။

၂၀၂၂ ခုနှစ်၊ မတ်လ(၁၇)ရက်နေ့က ပြည်ထောင်စုနယ်မြေ နေပြည်တော် ၊ ပျဉ်းမနား-တောင်ညိုလမ်း ၊ ဇမ္ဗူသီရိအထူးကုဆေးရုံအနီးတွင် ယာဉ်မတော်တဆမှုဖြစ်ပွားခဲ့သဖြင့် ကြက်ခြေနီစေတနာလုပ်အားရှင်များက ထိခိုက်ဒဏ်ရာရရှိသူ(၂၁)ဦးအား အရေးပေါ်ရှေးဦးပြုစုပေးခဲ့ကြပြီး မိုးစေတနာပရဟိတအသင်း၊ ပေးဆပ်သူများလူမှုကူညီရေးအသင်း တို့နှင့်အတူ ပူးပေါင်းကာ လူနာတင်ယာဉ်များဖြင့် နေပြည်တော်ပြည်သူ့ဆေးရုံကြီး ကုတင်(၁၀၀၀)သို့ ပို့ဆောင်ကူညီပေးခဲ့ကြပါသည်။ ထို့ပြင် ဇမ္ဗူသီရိအထူးကုဆေးရုံမှ လွှဲပြောင်းလူနာတစ်ဦးအား အမှတ်(၂)တပ်မတော်ဆေးရုံ ကုတင်(၁၀၀၀)သို့ လူနာတင်ယာဉ်ဖြင့် ကူညီပို့ဆောင်ပေးခဲ့ကြပါသည်။

ထို့ပြင် မတ်လ(၁၇)ရက်နေ့က ဥတ္တရခရိုင်၊ ဇေယျာသီရိမြို့နယ်၊ စည်ပင်ကြီးကျေးရွာအုပ်စု၊ ချောင်းကမ်းကြီးကျေးရွာတွင် မီးလောင်မှုဖြစ်ပွားခဲ့ပြီး အိမ်ထောင်စု(၁)စု ထိခိုက်ခံစားခဲ့ရသဖြင့် မိသားစုသုံးပစ္စည်း(၁)စုံ၊ တစ်ကိုယ်ရည်သန့်ရှင်းရေးသုံးပစ္စည်း(၁)စုံ၊ အိမ်ဆောက်အထောက်အကူပြုပစ္စည်း(၁)စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း(၁)စုံ နှင့် ရေသန့်ပုံး(၁)ပုံး တို့ကို ကြက်ခြေနီက သွားရောက် ထောက်ပံ့ပေးခဲ့ပြီး စိတ်ပိုင်းဆိုင်ရာအားပေးကူညီမှုများ ပြုလုပ်ပေးခဲ့ကြပါသည်။

အလားတူ မတ်လ(၁၈)ရက်နေ့က ပြည်ထောင်စုနယ်မြေ၊နေပြည်တော်၊ဇေယျာသီရိမြို့နယ်၊ ပြည်စံအောင်ရပ်ကွက်မှ ဦးခေါင်းကွဲဒဏ်ရာရရှိသူအမျိုးသမီးတစ်ဦးအား ကရုဏာရှင်လူမှုကူညီရေးပရဟိတအသင်း လူနာတင်ယာဉ်ဖြင့် ပြည်စံအောင်ကျေးလက်ကျန်းမာရေးဆေးခန်းသို့ ပို့ဆောင်ပေးခဲ့ပြီး အရေးပေါ်ရှေးဦးပြုစုပေးခဲ့ကြပါသည်။