၂၀၂၂ခုနှစ်၊ မေလ(၁၄)ရက်နေ့က ရန်ကုန်တိုင်းဒေသကြီး၊ အင်းစိန်မြို့နယ်၊ အောင်ဆန်းရပ်ကွက်မှ စက်ဘီးမှောက်၍ ထိခိုက်မှုဖြစ်ပွားပြီး သတိလစ်လူနာတစ်ဦးအား မြို့နယ်ကြက်ခြေနီအသင်းခွဲမှ စေတနာလုပ်အားရှင်များက ရှေးဦးပြုစုပေးခဲ့ပြီး တွဲလက်လူမှုကူညီရေးအသင်းကားဖြင့် အင်းစိန်ဆေးရုံသို့ ပို့ဆောင်ကူညီပေးခဲ့ကြပါသည်။

မကွေး၊ ၂၀၂၂ခုနှစ်၊ မေလ(၁၄)ရက်။

မြန်မာနိုင်ငံကြက်ခြေနီအသင်းနှင့် အပြည်ပြည်ဆိုင်ရာကြက်ခြေနီကော်မတီတို့ ပူးပေါင်းဖွင့်လှစ်သော မိသားစုပြန်လည်ဆက်သွယ်ပေးရေး(မွမ်းမံ)သင်တန်း (၅/၂၀၂၂)ဖွင့်ပွဲအခမ်းအနားကို မေလ(၁၄)ရက်နေ့ နံနက်ပိုင်းက မကွေးမြို့၌ ကျင်းပပြုလုပ်ခဲ့ပါသည်။

အခမ်းအနားတွင် မကွေးတိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ ပါမောက္ခ ဒေါက်တာ ဒေါ်ချောခင် က နှုတ်ခွန်းဆက်စကားပြောကြားခဲ့ပြီး အသင်းဌာနချုပ် ဒုတိယအထွေထွေအတွင်းရေးမှူး ဒေါက်တာဒေါ်ညိုညိုဝင့်က အမှာစကားပြောကြားခဲ့ပါသည်။

ထို့နောက် ဘေးအန္တရာယ်ဆိုင်ရာစီမံခန့်ခွဲမှုဌာန ဒုတိယညွှန်ကြားရေးမှူး ဒေါ်မိုးသီတာဝင်းက သင်တန်းဖွင့်လှစ်ရခြင်း၏ ရည်ရွယ်ချက်ကို ရှင်းလင်းပြောကြားခဲ့ပါသည်။

အခမ်းအနားသို့ တိုင်းဒေသကြီးကြက်ခြေနီကြီးကြပ်မှုကော်မတီ အမှုဆောင်များ၊ တိုင်းဒေသကြီးကြက်ခြေနီတပ်ဖွဲ့မှူးနှင့် ခရိုင်ကြက်ခြေနီတပ်ဖွဲ့မှူးများ၊ မိသားစုပြန်လည်ဆက်သွယ်ပေးရေးဌာနမှ ဝန်ထမ်းများနှင့် သင်တန်းသား/သူများ တက်ရောက်ခဲ့ကြပါသည်။

လုပ်ငန်းလိုအပ်ချက်နှင့်အညီမွမ်းမံထားရှိသည့် သင်ခန်းစာများကို ပြန်လည်ပို့ချရန်၊ ရွေ့ပြောင်းသွားလာခြင်းနှင့် နေရပ်စွန့်ခွာနေထိုင်ခြင်းတို့ကြောင့် နောက်ဆက်တွဲကြုံတွေ့လာနိုင်သည့်မိသားစုပြန်လည်ဆက်သွယ်ပေးရေး လိုအပ်ချက်များဖော်ထုတ်နိုင်ရန် အတွက် သင်တန်းကို ဖွင့်လှစ်ခြင်းဖြစ်ပြီး မေလ(၁၄)ရက်နှင့် (၁၅)ရက် (၂)ရက်တာ အတွင်း မကွေးတိုင်းဒေသကြီးရှိ မြို့နယ်(၂၅)မြို့နယ်မှ သင်တန်းသား/သူ (၃၀)ဦး တက်ရောက်သွားမည်ဖြစ်ပါသည်။

မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲမှုဌာနသည် ပေါက်ကွဲစေတတ်သော ပစ္စည်းများကြောင့် ထိခိုက်မှုလျှော့ပါးရေး အသိပညာပေးခြင်း စီမံချက်လုပ်ငန်းများကို နိုင်ငံတစ်ဝန်းရှိ မြို့နယ်များတွင် စဉ်ဆက်မပြတ် ဆောင်ရွက်လျှက်ရှိပါသည်။

၂၀၂၂ ခုနှစ်၊ မေလ (၁၄) ရက်နေ့က ရှမ်းပြည်နယ်(မြောက်ပိုင်း)၊ မန်တုံမြို့အတွင်းရှိ ပြည်သူများ ပေါက်ကွဲစေတတ်သော ပစ္စည်းများကြောင့် ထိခိုက်မှုလျှော့ပါးသက်သာစေရန်ရည်ရွယ်၍ မြေမြုပ်မိုင်းနှင့် ပေါက်ကွဲစေတတ်သော ပစ္စည်းအကြွင်းအကျန်များ၏ ဆိုးကျိုးများ၊ ထိခိုက်မှုအန္တရာယ်များနှင့် ဒေသဆိုင်ရာအမှတ်အသားများ အကြောင်းကို အသိပညာပေးဆွေးနွေးပြောကြားခဲ့ကြပါသည်။ ထိုသို့ဆွေးနွေးရာတွင် မန်တုံမြို့နယ်မှ မြို့နယ်တပ်ဖွဲ့မှူး ဦးခင်ဇော် နှင့် မြို့နယ်ကြက်ခြေနီစေတနာလုပ်အားရှင်များက ဦးဆောင်ဆွေးနွေးကာ တတ်ရောက်လာသူများကလည်း စိတ်ပါဝင်စားစွာပြန်လည်ဆွေးနွေးခဲ့ကြပါသည်။

ရှမ်းပြည်နယ်(အရှေ့ပိုင်း)၊ တာချီလိတ်မြို့ရှိ ဝမ်ပုံဆိပ်ကမ်းသို့ အကြောင်းအမျိုးမျိုးကြောင့် လာအိုနိုင်ငံမှ ပြန်လည်ဝင်ရောက်လာသည့် ရွှေ့ပြောင်းလုပ်သား နေရပ်ပြန် (၁၈၂)ဦးအား လက်ခံကြိုဆိုကူညီဆောင်ရွက်ခဲ့ပေးခြင်း၊ အဆိုပါနေရပ်ပြန်များအား သီးသန့်ထားရှိစင်တာတွင် (၇)ရက်တာနေထိုင်ရမည်ဖြစ်ပြီး အိုမီခရွန်စစ်ဆေး၍ ရောဂါကင်းစင်သူများအား သက်ဆိုင်ရာပြည်နယ်နှင့် တိုင်းဒေသကြီးသို့ ပြန်လည် ပို့ဆောင်ပေးခြင်းလုပ်ငန်းများကို မြို့နယ်ကြက်ခြေနီစေတနာလုပ်အားရှင်များက ကူညီဆောင်ရွက်လျက်ရှိပါသည်။ ထို့ပြင် ရောဂါတွေ့ရှိသူများကို သီးသန့်ထားရှိကာ အဆိုပါသီးသန့်လူနာ‌ဆောင်များတွင်လည်း ကြက်ခြေနီစေတနာလုပ်အားရှင်များက တာဝန်ယူကူညီဆောင်ရွက်ပေးလျက်ရှိပါသည်။

၂၀၂၂ခုနှစ်၊ မေလ(၁၂)ရက်နေ့က ရန်ကုန်တိုင်းဒေသကြီး၊ လမ်းမတော်မြို့နယ်ရှိ မင်းရဲကျော်စွာလမ်းအနီးတွင် စိတ်ဝေဒနာခံစားနေရသူတစ်ဦး ဦးခေါင်းကွဲဒဏ်ရာများရရှိနေသဖြင့် လမ်းမတော်မြို့နယ်ကြက်ခြေနီအသင်းခွဲမှ စေတနာလုပ်အားရှင်များသွားရောက်ကာ အရေးပေါ်ရှေးဦးပြုစုပေးခဲ့ပြီး ရန်ကုန်ဆေးရုံကြီးအရေးပေါ်ဌာနသို့ ပို့ဆောင်ကူညီပေးခဲ့ပါသည်။

ရန်ကုန်၊ မေလ(၁၂)ရက်။

မြန်မာနိုင်ငံကြက်ခြေနီအသင်းသည် နိုင်ငံတစ်ဝန်း အကူအညီလိုအပ်သူများအတွက် လူမှုကရုဏာ အကူအညီများ‌ ပေးရာတွင် ကြက်ခြေနီအခြေခံမူများနှင့်အညီ ကူညီလျက်ရှိရာ ပြီးခဲ့သည့် ဧပြီလ (၂၃) ရက်မှ ဧပြီလ (၂၉) ရက်‌နေ့အထိ စစ်ကိုင်းတိုင်းဒေသကြီးရှိ ပြည်သူများအား အရေးပေါ် လူသားချင်းစာနာ ထောက်ထားမှု ဆိုင်ရာလုပ်ငန်းများဖြစ်သည့် စားနပ်ရိက္ခာ နှင့် အခြားအခြေခံ လိုအပ်သည့် ပစ္စည်းများ၊ Covid-19 ကာကွယ်ရေးသုံးပစ္စည်းများ၊ ရေနှင့် သန့်ရှင်းရေးသုံးပစ္စည်းများကို သွားရောက် ကူညီ ထောက်ပံ့ ပေးခဲ့ကြပါသည်။

ထိုသို့သွားရောက်ဆောင်ရွက်ရာတွင် မြန်မာနိုင်ငံကြက်ခြေနီအသင်း ဌာနချုပ်မှ ဝန်ထမ်း (၇) ဦးနှင့် စစ်ကိုင်းတိုင်းဒေသကြီးမှ ကြက်ခြေနီစေတနာလုပ်အားရှင် (၁၂) ဦး စုစုပေါင်း (၁၉) ဦးတို့သည် စစ်ကိုင်းတိုင်းဒေသကြီး စစ်ကိုင်း၊ ရွှေဘို၊ မုံရွာ၊ ကန့်ဘလူမြို့နယ် (၄) မြို့နယ်မှ ယာယီခိုလှုံရေးစခန်း (၅) ခုနှင့် ရွေဘိုမြို့နယ်မှ ကျေးရွာ(၂) ရွာရှိ အိမ်ထောင်စု (၃၃၈) စု လူဦးရေ (၁,၁၉၁) ဦးအတွက် (၇၉,၅၄၅,၀၅၀)ကျပ် တန်ဖိုးရှိ ကနဦး အရေးပေါ်လိုအပ်ချက်များဖြစ်သည့် အစားအစာ (ဆန်၊ ဆီ၊ ဆား၊ ပဲ၊ ငါးသေတ္တာ) (၃၃၈) စုံ၊ နှာခေါင်းစည်း (၅၀ ပါဗူး) ၃၃၈ ဗူး၊ လက်သန့်ဆေးရည် (၃၃၈) ဗူး၊ မိသားစုသုံး တစ်ကိုယ်ရည်သန့်ရှင်းရေး သုံးပစ္စည်း (၃၃၈) ပုံး၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၃၂၅) ပုံး၊ အမျိုးသား တစ်ကိုယ် ရည်သန့်ရှင်းရေးသုံးပစ္စည်း (၃၂၆) ပုံး၊ မိုးကာအင်္ကျီ (၆၅၂) ထည်၊ တာပေါ်လင် (၆၇၆) ချပ်၊ အိမ်ဆောက် အထောက်အကူပြုပစ္စည်း (၁၆၈) အိတ်၊၊ မိသားစုသုံး ရေသန့်ပုံး (Life Straw) (၇) ခု၊ ၂၀၀ ဂါလံဆန့် ရေပုံး (၆) ခုတို့ကို သွားရောက်ထောက်ပံ့ကူညီပေးခဲ့သည့်အပြင် စိတ်ပိုင်းဆိုင်ရာ အားပေးကူညီခြင်းများ ကိုလည်း ပြုလုပ်ခဲ့ကြပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများအတွက် စားနပ်ရိက္ခာများ၊ ရေနှင့် သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန် ဆောင်ရွက်လျက်ရှိပါသည်။

ရန်ကုန်၊ မေလ(၁၂)ရက်။

မြန်မာနိုင်ငံကြက်ခြေနီအသင်းသည် နိုင်ငံတစ်ဝန်း အကူအညီလိုအပ်သူများအတွက် လူမှုကရုဏာ အကူအညီများ‌ ပေးရာတွင် ကြက်ခြေနီအခြေခံမူများနှင့်အညီ ကူညီလျက်ရှိရာ ပြီးခဲ့သည့် မေလ (၄) ရက်မှ မေလ (၆) ရက်‌နေ့အထိ မကွေးတိုင်းဒေသကြီးရှိ ပြည်သူများအား အရေးပေါ် လူသားချင်းစာနာ ထောက်ထားမှု ဆိုင်ရာလုပ်ငန်းများဖြစ်သည့် စားနပ်ရိက္ခာ နှင့် အခြား အခြေခံ လိုအပ်သည့် ပစ္စည်းများ၊ ကိုဗစ်-၁၉ ကာကွယ်ရေးသုံးပစ္စည်းများနှင့် သန့်ရှင်းရေးသုံးပစ္စည်းများကို သွားရောက် ကူညီ ထောက်ပံ့ ပေးခဲ့ကြပါသည်။

ထိုသို့သွားရောက်ဆောင်ရွက်ရာတွင် မြန်မာနိုင်ငံကြက်ခြေနီအသင်းမှ ညွှန်ကြားရေးမှူး ဒေါ်အေးအေးငြိမ်း ဦးဆောင်သော ဝန်ထမ်း (၁၀) ဦး နှင့် မကွေးတိုင်းဒေသကြီးမှ ကြက်ခြေနီစေတနာ လုပ်အားရှင် (၄) ဦး စုစုပေါင်း (၁၄) ဦးတို့သည် မကွေးတိုင်းဒေသကြီး၊ ဆောမြို့နယ်နှင့် ကျောက်ထုမြို့ရှိ အိမ်ထောင်စု (၄၆၈) စု လူဦးရေ (၁,၈၀၃) ဦးအတွက် ကနဦး အရေးပေါ်လိုအပ်ချက်များဖြစ်သည့် အစားအစာ (ဆန်၊ ဆီ၊ ဆား၊ ပဲ၊ ငါးသေတ္တာ) (၄၆၈) စုံ၊ နှာခေါင်းစည်း (၅၀ ပါဗူး) (၄၆၈) ဗူး၊ လက်သန့်ဆေးရည် (၁၀၀ မီလီဗူး) (၄၆၈) ဗူး၊ မိသားစုသုံး တစ်ကိုယ်ရည်သန့်ရှင်းရေး သုံးပစ္စည်း (၄၆၈) ပုံး၊ မီးဖိုချောင်သုံးပစ္စည်း (၄၆၈)ပုံး၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၄၆၈) ပုံး၊ အမျိုးသား တစ်ကိုယ် ရည်သန့်ရှင်းရေးသုံးပစ္စည်း (၄၆၈) ပုံး၊ မိုးကာအင်္ကျီ (၉၃၆) ထည်၊ တာပေါ်လင် (၉၃၆) ချပ်၊ အိမ်ဆောက် အထောက်အကူပြုပစ္စည်း (၂၃၅) အိတ်နှင့် ရပ်ရွာလူထုသုံးရေသန့်ပုံး (Community Lifestraw ) ၂ ခုတို့ကို သွားရောက်ထောက်ပံ့ကူညီပေးခဲ့သည့်အပြင် စိတ်ပိုင်းဆိုင်ရာ အားပေးကူညီခြင်းတို့ကိုလည်း ပြုလုပ်ခဲ့ကြပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများအတွက် စားနပ်ရိက္ခာများ၊ ရေနှင့် သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန် ဆောင်ရွက်လျက် ရှိပါသည်။