ထားဝယ်၊ ၂၀၂၂ခုနှစ်၊ ဖေဖော်ဝါရီလ(၁၄)ရက်။

COVID-19 ရောဂါကာကွယ်ရေးလုပ်ငန်းများဆောင်ရွက်ရာတွင် ကြက်ခြေနီစေတနာလုပ်အားရှင်များသည် ကျရာနေရာမှ ပါဝင်ကူညီ ဖြည့်ဆည်းပေးလျက် ရှိပါတယ်။

ယခုလို ဆောင်ရွက်ရာတွင် တနင်္သာရီတိုင်းဒေသကြီး တနင်္သာရီမြို့နယ်ကြက်ခြေနီတပ်ဖွဲ့မှ ကြက်ခြေနီစေတနာလုပ်အားရှင်များသည် မြို့နယ်ဆရာဝန်၊ တိုက်နယ်ဆရာဝန်များပါဝင်သည့် အဖွဲ့များနှင့် ပူးပေါင်းပြီး မောတောင်မြို့၌ COVID-19ရောဂါ ရှာဖွေစစ်ဆေးခြင်းများကို ပြုလုပ်ခဲ့တယ်လို့သိရပါတယ်။

ထားဝယ်မြို့နယ်နှင့် ရေဖြူမြို့နယ်နှင့် သရက်ချောင်းမြို့နယ်တို့မှ ကြက်ခြေနီစေတနာလုပ်အားရှင်များကလည်း အသိပညာပေးခြင်း ၊ နှာခေါင်းစည်းများ‌ ပေးဝေခြင်း၊ လက်ကမ်းစာစောင်များဖြန့်ဝေခြင်း ဗီနိုင်းကပ်ခြင်းများကို ဆောင်ရွက်လျက်ရှိပြီး ကလိန်အောင်မြို့အဝင် ကံပေါက်လမ်းဆုံရှိ စစ်ဆေးရေးဂိတ်တွင် ဌာနဆိုင်ရာများ၊ လူမှုရေးအသင်းအဖွဲ့များနှင်အတူ COVID-19ရောဂါ ရှာဖွေစစ်ဆေးခြင်း ဆောင်ရွက်ရာတွင် ပါဝင်ကူညီလျက်ရှိပါတယ်။

ထားဝယ်မြို့နယ်နှင့် ကော့သောင်းမြို့နယ်မှ ကြက်ခြေနီ‌စေတနာလုပ်အားရှင်များကလည်း ထားဝယ်လေဆိပ်နှင့် ကော့သောင်းလေဆိပ်တို့တွင် ခရီးသည်များအား ရောဂါကာကွယ်ရေး ဆောင်ရွက်ရာတွင် ပူးပေါင်းကူညီပေးလျက်ရှိပါတယ်။

COVID-19ရောဂါကာကွယ်ရေးလုပ်ငန်းများအပြင် အကြောင်းကြောင်းကြောင့် ထိခိုက်ဒဏ်ရာရသူများအား ရှေးဦးပြုစုခြင်း၊ ဆေးကုသမှုခံယူရန် လိုအပ်သူများကို ကြက်ခြေနီလူနာတင်ယာဉ်ဖြင့် ဆေးရုံ၊ ဆေးခန်းများသို့ ကူညီပို့ဆောင်ပေးနေကြတဲ့အကြောင်းကို ထားဝယ်မြို့က ဦးမြင့်နိုင်က သတင်းပေးပို့ထားတာဖြစ်ပါတယ်။

၂၀၂၂ခုနှစ် ဖေဖော်ဝါရီလ (၁၂)ရက်နေ့က ဧရာဝတီတိုင်းဒေသကြီး၊ အိမ်မဲမြို့နယ်တွင် ရှေးဦးပြုစုခြင်း(အခြေခံ)သင်တန်း အမှတ်စဉ်(၁)နှင့် အမှတ်စဉ်(၂) ဆင်းပွဲ အခမ်းအနားကို ကျင်းပပြုလုပ်ခဲ့ကြသည်။

အခမ်းအနားတွင် မြောင်းမြခရိုင်ကြက်ခြေနီတပ်ဖွဲ့မှူးဦးတင်ဦးက အဖွင့်အမှာစကားပြောကြားခဲ့ပြီး သင်တန်းသားများအား သင်တန်းဆင်းလက်မှတ်များ ပေးအပ်ခဲ့ကြပါသည်။

အခမ်းအနားကို မြောင်းမြခရိုင်ကြက်ခြေနီကြီးကြပ်မှုကော်မတီမှတာဝန်ရှိသူများ၊ အိမ်မဲမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များ၊ သင်တန်းနည်းပြများနှင့် သင်တန်းသား/သူ (၉၂)ဦးတက်ရောက်ခဲ့ကြပါသည်။

မြန်မာနိုင်ငံကြက်ခြေနီအသင်း၊ အရင်းအမြစ်စုစည်းအသုံးချရေးဌာနမှ ပြုလုပ်သော အရင်းအမြစ်စုစည်းအသုံးချရေး နှစ်ပတ်လည်သုံးသပ်ခြင်းအစည်းအဝေးဖွင့်ပွဲကို ယနေ့ ၂၀၂၂ ခုနှစ်၊ ဖေဖော်ဝါရီလ (၁၁) ရက်နေ့က Online ဖြင့် ပြုလုပ်ခဲ့ရာ အသင်းဥက္ကဌ ဒေါက်တာမောင်မောင်မြင့် တက်ရောက်ခဲ့ပါသည်။

အဆိုပါအစည်းအဝေးတွင် အသင်းဥက္ကဌက အဖွင့်အမှာစကားပြောကြားခဲ့ပါသည်။ အစည်းအဝေးကို ဆက်လက်ပြုလုပ်ခဲ့ရာ အရင်းအမြစ်စုစည်းအသုံးချရေးဌာန၏ လုပ်ငန်းပြီးမြောက်မှုနှင့် စိန်ခေါ်မှုများအား ပြန်လည်သုံးသပ်ဆွေးနွေးခဲ့ပြီး ဌာနအသီးသီးနှင့် ပူးပေါင်း၍ ရှေ့ဆက်ဆောင်ရွက်ရမည့် လုပ်ငန်းဆောင်တာများအား ရေးဆွဲခဲ့ကြပါသည်။

အစည်းအဝေးဖွင့်ပွဲအခမ်းအနားကို အသင်းဥက္ကဌနှင့်အတူ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့်အလုပ်အမှုဆောင်များ၊ ဒုတိယအထွေထွေအတွင်းရေးမှူးများ၊ ညွှန်ကြားရေးမှူးများနှင့် ဌာနမှူးများ တက်ရောက်ခဲ့ပါသည်။

ပြည်ထောင်စုနယ်မြေနေပြည်တော်၊ ပျဉ်းမနားမြို့နယ်၊ သစ်ထုတ်လုပ်ရေးဝန်ထမ်းအိမ်ရာမှ မီးလောင်ကာ နေအိမ်ဆုံးရှုံးခဲ့သော အိမ်ထောင်စု (၁) စုအတွက် မိသားစုသုံးပစ္စည်း (၁)စုံ၊ တစ်ကိုယ်ရည်သန့်ရှင်းရေးသုံးပစ္စည်း (၁)စုံနှင့် အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၁)စုံတို့ကို နေပြည်တော်ကြက်ခြေနီကြီးကြပ်မှုကော်မတီ ဥက္ကဌ ဦးအောင်ချိုနှင့် ကြက်ခြေနီစေတနာလုပ်အားရှင်များက ၂၀၂၂ ခုနှစ်၊ ဖေဖော်ဝါရီလ (၉) ရက်နေ့တွင် သွားရောက်ထောက်ပံ့ပေးခဲ့ပါသည်။

ဖေဖော်ဝါရီလ (၅) ရက်နေ့ကလည်း ပျဉ်းမနားဘိုးဘွားရိပ်သာ၊ အေးငြိမ်းချမ်းသာဘိုးဘွားရိပ်သာနှင့် နေပြည်တော်သဘာဝတရားရိပ်သာသို့ နှာခေါင်းစည်းများ၊ လက်သန့်ဆေးရည်များ၊ ကာဘော်လစ်ဆပ်ပြာများနှင့် မုန့်များကို သွားရောက်လှူဒါန်းခဲ့ပါသည်။ ထို့အတူ COVID-19 ရောဂါကာကွယ်ရေးအတွက် ဇေယျာသီရိမြို့နယ်ရှိ ကျေးရွာများတွင် အသိပညာပေးပိုစတာများနှင့် ဗီနိုင်းများကို ကပ်ပေးခြင်းဖြင့် အသိပညာပေးလုပ်ငန်းများ ဆောင်ရွက်ခဲ့ပါသည်။

ထို့အပြင် ပြည်ထောင်စုနယ်မြေနေပြည်တော်ရှိ မြို့နယ်အသီးသီးမှ ယာဉ်မတော်တဆဖြစ်ပွားကာ ထိခိုက်ဒဏ်ရာရရှိခဲ့သူ (၆)ဦးနှင့် ရောဂါအမျိုးမျိုးကြောင့် ဆေးကုသမှုခံယူမည့်သူ (၂)ဦးအား နေပြည်တော်ပြည်သူ့ဆေးရုံကြီး ကုတင် (၁၀၀၀) သို့ ကြက်ခြေနီစေတနာလုပ်အားရှင်များက မြို့နယ်လူမှုကူညီရေးပရဟိတအသင်းများနှင့် ပူးပေါင်းပို့ဆောင်ပေးခဲ့ပါသည်။

ကိုယ်ခန္ဓာလှုပ်ရှားဖို့အတွက်ဆိုရင် လူ့ခန္ဓာကိုယ်အစိတ်အပိုင်းတွေထဲမှာ ခြေ၊လက်အင်္ဂါတွေဟာ အဓိက ပံ့ပိုး ထောက်ပံ့ပေးရတဲ့ အစိတ်အပိုင်းတွေဖြစ်ပါတယ်။ ဒီလိုအရေးကြီးတဲ့ အစိတ်အပိုင်းတွေ မတော်တဆ ထိခိုက်မိပါက ထိခိုက်မှု အနည်းအများပေါ် မူတည်ပြီး ခြေ၊လက်တွေရဲ့ လုပ်ဆောင်နိုင်မှု ယာယီ ရပ်ဆိုင်း သွားတဲ့အခါမျိုးတွေ၊ အဆင်မပြေမှုနဲ့ လိုက်လျောညီထွေ မဖြစ်တာတွေကို ကြုံတွေ့ခံစားဖူးကြမှာပါ။

အကြောင်းရင်းတစုံတရာကြောင့် ခြေ၊လက်တွေကို အပြီးတိုင် ဆုံးရှုံးလိုက်ရသူတွေ အတွက် ဆိုရင်တော့ ဘဝမှာ ကြီးမားတဲ့ အခက်အခဲတွေကို ရင်ဆိုင်ကြုံတွေ့ ကြရမှာဖြစ်ပြီး ရုပ်ပိုင်းဆိုင်ရာ သာမက စိတ်ပိုင်းဆိုင်ရာကိုပါ ထိခိုက်ခံစားကြရမှာ မလွဲမသွေဖြစ်ပါတယ်။ ခြေ၊လက်အင်္ဂါဆုံးရှုံး လိုက်ရသူ အများစုက လက်နက်ကိုင်ပဋိပက္ခအပါအဝင် မိုင်းနဲ့ ပေါက်ကွဲစေတတ်သော လက်နက် အကြွင်း အကျန်များကြောင့် ဆုံးရှုံးလိုက်ကြရသူတွေ ဖြစ်ပါတယ်။

ဒီလို ခြေလက်အင်္ဂါ ဆုံးရှုံးသွားသူတွေအတွက် ကရင်ပြည်နယ်၊ ဘားအံမြို့မှာ မြန်မာနိုင်ငံ ကြက်ခြေနီအသင်းနှင့် အပြည်ပြည်ဆိုင်ရာကြက်ခြေနီကော်မတီတို့ ပူးပေါင်းဖွင့်လှစ်ထားတဲ့ ဘားအံ ခြေတု လက်တုဆိုင်ရာပြန်လည်သန်စွမ်းရေးစင်တာ 𝑯𝒐𝒓𝒄 (𝑯𝒑𝒂_𝑨𝒏 𝑶𝒓𝒕𝒉𝒐𝒑𝒂𝒆𝒅𝒊𝒄 𝑹𝒆𝒉𝒂𝒃𝒊𝒍𝒊𝒕𝒂𝒕𝒊𝒐𝒏 𝑪𝒆𝒏𝒕𝒆𝒓 – 𝑯𝑶𝑹𝑪) ကို ၂၀၀၃ ခုနှစ်ကတည်းက စတင် ဖွင့်လှစ်ခဲ့ပြီး ခြေလက်အင်္ဂါ ဆုံးရှုံးသွားသူများအတွက် လိုအပ် တဲ့ ခြေတု၊ လက်တုများ၊ အားပြုကိရိယာ (သို့) ဘီးတပ်ကုလားထိုင်များကို အခမဲ့ ထောက်ပံ့ပေးလျှက်ရှိပြီး အရည်အသွေးပြည့်မီတဲ့ စောင့်ရှောက်မှုပေးနိုင်ဖို့ ကျွမ်းကျင် ဝန်ထမ်းတွေ၊ အကြော အဆစ်ပိုင်းဆိုင်ရာ ပညာရှင်တွေနဲ့ ကူညီဆောင်ရွက်ပေးနေကြပါတယ်။

“ဒါက ကြက်ခြေနီရဲ့ မွန်မြတ်တဲ့ အလုပ်တစ်ခုပါ။ ကျမအနေနဲ့ ကိုယ်လက်အင်္ဂါ ဆုံးရှုံးလိုက်ရသူတွေကို မသန်ပေမဲ့ စွမ်းနိုင်ဖို့ ကိုယ်တတ်နိုင်တဲ့ဘက်ကနေ အတတ်နိုင်ဆုံး စိတ်ရင်းနဲ့ ကူညီပေးချင်လို့ တခြားအလုပ်တွေကို မပြောင်းဖြစ်တော့ဘဲ ဒီအလုပ်မှာပဲ ၁၈နှစ်ကြာ လုပ်ဆောင်ပေးနေတာပါ” လို့ မြန်မာနိုင်ငံကြက်ခြေနီအသင်း၊ ဘားအံခြေတုလက်တုဆိုင်ရာပြန်လည်သန်စွမ်းရေးဌာနမှာ လက်ရှိ မန်နေဂျာ တာဝန်ထမ်းဆောင်နေသူ မကျော့သီတာအောင်က ပြောပြခဲ့ပါတယ်။

ဘားအံခြေတုလက်တုဆိုင်ရာ ပြန်လည်သန်စွမ်းရေးဌာန အနေနဲ့ လုပ်ငန်းဆောင်ရွက်ရာမှာ စီမံချက် ဧရိယာများ ဖြစ်ကြတဲ့ မွန်ပြည်နယ်၊ ကရင်ပြည်နယ်၊ ကယားပြည်နယ်၊ ပဲခူးတိုင်းဒေသကြီး(အရှေ့ပိုင်း)၊ တနင်္သာရီတိုင်းဒေသကြီး စတဲ့ ပြည်နယ်နှင့်တိုင်းဒေသကြီး(၅)ခုက ခြေတုလက်တု လိုအပ်နေသူများကို အသစ်ပြုလုပ်ခြင်း၊ ပြုပြင်တပ်ဆင်မှုများ ပြုလုပ်ပေးလျက်ရှိပြီး နွေရာသီကျောင်းပိတ်ရက်မှာ ကလေးများ အတွက် ခြေတု တပ်ဆင်ရေးအစီအစဉ်၊ နယ်လှည့်ခြေတုတပ်ဆင်ရေးအစီအစဉ်၊ ရပ်ရွာအခြေပြု အသေးစား ခြေတု ပြုပြင် ရေး အစီအစဉ် တွေကို ဝန်ဆောင်မှုများပေးလျက်ရှိနေကြပါတယ်။

ဘားအံခြေတုလက်တုဆိုင်ရာ ပြန်လည်သန်စွမ်းရေးဌာနကို ၂၀၀၃ ခုနှစ်၊ ဇန်နဝါရီလ (၂၁) ရက်နေ့မှာ စတင် ဖွင့်လှစ်ခဲ့ပြီး ဝန်ဆောင်မှုစတင်သည့်အချိန်မှ ၂၀၂၁ ခုနှစ်၊ ဒီဇင်ဘာ (၃၁) ရက်နေ့အထိ စီမံချက် ဧရိယာ အတွင်းမှာရှိတဲ့ ခြေလက်အင်္ဂါမသန်စွမ်းသူပေါင်း (၈၃၀၄) ဦးကို ခြေတု (၁၁၈၆၈)ခု၊ လက်တု (၂၆၂)ခု၊ အားပြုကိရိယာ (၇၈၈)ခု၊ ချိုင်းထောက်/လက်ထောက် (၁၈၆၈၇)ခု၊ ဘီးတပ်ကုလားထိုင် (၅၁၉)ခု၊ ခြေဖဝါးတု (၂၂၂၀၇)ခု တို့ကို အခမဲ့ ထောက်ပံ့ဝန်ဆောင်မှုပေးနိုင်ခဲ့ပြီးဖြစ်ပါတယ်။

ဒီလို ကိုယ်အင်္ဂါပြန်လည်သန်စွမ်းဖို့ အကူအညီလိုအပ်နေသူများအတွက် မြန်မာနိုင်ငံကြက်ခြေနီ အသင်းက မွန်မြတ်လှတဲ့ ကြက်ခြေနီလှုပ်ရှားမှုများဖြင့် ကြိုးစားကူညီဆောင်ရွက်ပေးလျှက်ရှိနေပါတယ်။

ဒါကြောင့် ကျောင်းနှင့်ရပ်ရွာတွေမှာ ရှေးဦးပြုစုခြင်းပညာရပ်များကို ဆွေးနွေးပို့ချကာ ရှေးဦးပြုစုသူရဲကောင်းများ မွေးထုတ်ကြပါစို့။

ဇန်နဝါရီလ (၂၈)ရက်နေ့က ရှမ်းပြည်နယ်တောင်ပိုင်း တောင်ကြီးနဲ့ဆီဆိုင် မြို့နယ်တွေက နေရပ်စွန့်ခွာစခန်းတွေမှာရှိတဲ့အိမ်ထောင်စုတွေအတွက် ထပ်မံသွားရောက်ထောက်ပံ့ပေးဖို့ သွားရောက်ခဲ့ကြပါတယ်။

ထောက်ပံ့ရာမှာ အိမ်ထောင်စု (၅၄၆ စု) အတွက် တစ်ကိုယ်ရည်သန့်ရှင်းရေးသုံးပစ္စည်းများ(အရေးပေါ်) (၃၈၄)စုံ၊ အမျိုးသမီးတစ်ကိုယ်ရည် သန့်ရှင်းရေး သုံးပစ္စည်း ( ၂၃၃)စုံ၊ နှာခေါင်းစည်း( ၃၂၉ )ဗူး၊ လက်သန့်စင်ဆေးရည် (၈၀၃ ) ဗူး၊ စောင် (၆၀၉)ထည်၊ ခြင်ထောင် (၅၇၈ )လုံး၊ ရေချိုးဆပ်ပြာ (၂၆၂)ခု၊ တာပေါ်လင်(၈၈)ခု၊ တစ်ကိုယ်ရေသန့်ရှင်းရေးအစုံ(၁၂၆)စုံ၊ ဆိုလာ မီးအိမ်(၁၄၀)၊ ဂျယ်ရီကန်(၁၃၉)ခု၊ ကြိုး (၄၃)ခွေ၊ ယာယီအိမ်သာပစ္စည်း(၂) ခု၊ သန့်ရှင်းရေးကိရိယာအစုံ(၂)စုံကိုပေးအပ်ခဲ့ကြပြီး စိတ်ပိုင်းဆိုင်ရာအားပေးကူညီမှုများကိုလည်း ပြုလုပ်ပေးခဲ့ကြပါတယ်။