၂၀၂၂ ခုနှစ်၊ ဇွန်လ ၂၉ ရက်နေ့က ရခိုင်ပြည်နယ်၊ မြောက်ဦးခရိုင်ပြည်သူ့ဆေးရုံတွင် ဆေးကုသမှုခံယူနေသော လူနာတစ်ဦးသည် အရေးပေါ်သွေးလိုအပ်လျှက်ရှိရာ ကျောက်တော်မြို့နယ်မှ ကြက်ခြေနီစေတနာလုပ်အားရှင် ဦးဘိုအောင်သိန်းမှ (A+) သွေးတစ်လုံးကို သွားရောက်လှူဒါန်းပေးခဲ့ပါသည်။

ဧရာဝတီတိုင်းဒေသကြီး၊ ကျောင်းကုန်းမြို့နယ်မှာ မြို့နယ်အတွင်း လူမှုကရုဏာအကူအညီလိုအပ်နေတဲ့ ရပ်ရွာလူထုအတွက် မြို့နယ်ကြက်ခြေနီအသင်းခွဲမှ စေတနာလုပ်အားရှင်တွေက တတ်စွမ်းသရွေ့အကူအညီတွေကို ဆောင်ရွက်ပေးနေကြပါတယ်။

အဲ့ဒီလိုဆောင်ရွက်ပေးရာမှာ ရှေးဦးပြုစုခြင်းကျွမ်းကျင်သူ ကြက်ခြေနီစေတနာလုပ်အားရှင်တွေနဲ့ ရှေးဦးပြုစုခြင်းအကူအညီတွေပြုလုပ်ပေးသလို လူနာတင်ယာဉ်လိုအပ်သူလူနာတွေအတွက်လည်း လူနာတင်ယာဉ်ဝန်ဆောင်မှုကို ဆောင်ရွက်ပေးလျက်ရှိပါတယ်။ ထို့ပြင် သွေးလိုအပ်သူလူနာတွေအတွက် သွေးလှူဒါန်းပေးခြင်းနဲ့ သွေးအလှူရှင်ချိတ်ဆက်ပေးခြင်း၊ သွေးလွန်တုပ်ကွေးရောဂါကာကွယ်ရေးအသိပညာပေး၊ ဖုံး/သွန်/လဲ/စစ် ပြုလုပ်ခြင်း၊ COVID 19 ရောဂါတုံ့ပြန်ဆောင်ရွက်ခြင်းနဲ့ ကာကွယ်ဆေးထိုးလုပ်ငန်းတွေမှာ ပါဝင်ကူညီပေးခြင်း၊ သဘာဝဘေးအန္တရာယ်နှင့်ကြုံတွေ့လာပါကလည်း အကောင်းဆုံးတုံ့ပြန်ဆောင်ရွက်နိုင်ဖို့ ကြိုတင်ဇာတ်တိုက်လေ့ကျင့်ခြင်းတို့ကို ပြုလုပ်လျက်ရှိကြပါတယ်။

ကြက်ခြေနီလှုပ်ရှားမှုတွေဟာ အခြေခံမူ(၇)ချက်နဲ့အညီ ဆောင်ရွက်ကြရတာဖြစ်ပြီး ကြက်ခြေနီစေတနာလုပ်အားရှင်တွေဟာလည်း မိမိတို့ရဲ့လူမှုကရုဏာဆောင်ရွက်ချက်တိုင်းမှာ ကြက်ခြေနီလှုပ်ရှားမှုကိုသာ ဦးတည်ဆောင်ရွက်ကြပြီး ရပ်ရွာလူထုအတွက် အထိရောက်ဆုံးအကူအညီတွေပေးနိုင်ဖို့ အချိန်တိုင်း ကြိုးပမ်းအားထုတ်နေကြတာပဲ ဖြစ်ပါတယ်။

ဧရာဝတီတိုင်းဒေသကြီး၊ ငပုတောမြို့နယ်မှာ မြို့နယ်ကြက်ခြေနီအသင်းခွဲမှ ဇွန်လအတွင်း လူနာတင်ယာဉ်ဝန်ဆောင်မှုများစွာ ကူညီပေးနိုင်ခဲ့ပြီး ဇွန်လ(၄)ရက်နေ့က လေဖြတ်လူနာတစ်ဦးအား နေအိမ်မှ ပုသိမ်မြို့ရှိ လမင်းဆေးရုံသို့လည်းကောင်း၊ ဇွန်လ(၁၀)ရက်နေ့က သွေးလွန်တုပ်ကွေးလူနာကလေးငယ်တစ်ဦးအား ငပုတောဆေးရုံမှ ပုသိမ်ဆေးရုံကြီးသို့လည်းကောင်း၊ ဇွန်လ(၁၃)ရက်နေ့က အရေးပေါ်သွေးလွန်တုပ်ကွေးလူနာကလေးငယ်တစ်ဦးအား ငပုတောဆေးရုံမှ ပုသိမ်ဆေးရုံကြီးသို့လည်းကောင်း၊ ဇွန်လ(၁၄)ရက်နေ့က ငှက်ဖျားလူနာတစ်ဦးအား ငပုတောဆေးရုံမှ ပုသိမ်ဆေးရုံကြီးသို့လည်းကောင်း၊ ဇွန်လ(၁၆)ရက်နေ့က အရေးပေါ်လူနာအမျိုးသားတစ်ဦးအား ငပုတောဆေးရုံမှ ပုသိမ်ဆေးရုံကြီးသို့လည်းကောင်း၊ ဇွန်လ(၁၇)ရက်နေ့က ဆိုင်ကယ်မတော်တဆဖြစ်ပွားမှုကြောင့် ထိခိုက်ဒဏ်ရာရရှိသူတစ်ဦးအား ပုသိမ်အရိုးအကြောဆေးရုံသို့လည်းကောင်း၊ ထိုမှတစ်ဆင့် ရန်ကုန်ကြည့်မြင့်တိုင်အရိုးဆေးရုံသို့လည်းကောင်း ထို့နောက် ရန်ကုန်ပြည်သူ့ဆေးရုံကြီးသို့လည်းကောင်း အဆင့်ဆင့်လွှဲပြောင်းပေးခဲ့ပြီး လှိုင်သာယာ ရှိရိုးလေးကျေးရွာသို့လည်းကောင်း၊ ဇွန်လ (၁၈)ရက်နေ့က ဆိုင်ကယ်မတော်တဆဖြစ်ပွားမှုတွင် ထိခိုက်ဒဏ်ရာရရှိသူတစ်ဦးအား ရှေးဦးပြုစုပေးပြီး ငပုတောဆေးရုံသို့လည်းကောင်း၊ ဇွန်လ(၁၉)ရက်နေ့က ကမ်းနီကျေးရွာမှ မီးဖွားလူနာတစ်ဦးအား ငပုတောဆေးရုံနှင့် ရေငံသရက်ကုန်းကျေးရွာမှ အမျိုးသမီးလူနာတစ်ဦးအား ပုသိမ်ဆေးရုံသို့လည်းကောင်း၊ ဇွန်လ(၂၂)ရက်နေ့က ဖျန်ရေကျော်သင်္ဘောဆိပ်မှ အမျိုးသမီးလူနာတစ်ဦးအား ပုသိမ်ဆေးရုံကြီးသို့လည်းကောင်း၊ ဇွန်လ(၂၃)ရက်နေ့က တံခွန်တိုင်ကျေးရွာမှ ထိခိုက်ဒဏ်ရာရရှိသူကလေးတစ်ဦးအား ငပုတောဆေးရုံသို့လည်းကောင်း၊ ဇွန်လ(၂၆)ရက်နေ့က ငွေသောင်ယံစက်လှေဆိပ်မှ အမျိုးသားလူနာတစ်ဦးအား ပုသိမ်ဆေးရုံကြီးသို့လည်းကောင်း၊ ဇွန်လ(၂၆)ရက်နေ့က ငပုတောမြို့နယ်မှ အတက်ရောဂါလူနာကလေးငယ်တစ်ဦးအား ပုသိမ်ဆေးရုံကြီးသို့လည်းကောင်း အသီးသီးပို့ဆောင်ကူညီပေးခဲ့ကြပါသည်။

ငပုတောမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်တွေဟာ ၂၄နာရီလူနာတင်ယာဉ်ဝန်ဆောင်မှုအတွက် အလှည့်ကျတာဝန်ထမ်းဆောင်လျက်ရှိပြီး လိုအပ်ပါက ရှေးဦးပြုစုခြင်းအကူအညီများပေးနိုင်ရန် ကြိုတင်ပြင်ဆင် ဆောင်ရွက်ထားလျက်ရှိကြပါသည်။

ထို့ပြင် ၂၄နာရီ လူနာတင်ယာဉ်ဝန်ဆောင်မှုကိုလည်း အရှိန်အဟုန်မြှင့်လာကာ လူနာတင်ယာဉ်လိုအပ်သူတွေကို အချိန်နဲ့တပြေးညီကူညီပေးနေကြပြီး ရှေးဦးပြုစုခြင်းအကူအညီတွေကိုလည်း ကျွမ်းကျင်သူ ကြက်ခြေနီစေတနာလုပ်အားရှင်များက ကူညီပံ့ပိုးပေးလျက်ရှိကြပါတယ်။

COVID-19 ကာကွယ်ဆေးထိုးလုပ်ငန်းတွေမှာလည်း ဆေးထိုးရန်လာရောက်ကြသူတွေကို တွဲကူပေးခြင်း၊ စိတ်ပိုင်းဆိုင်ရာအားပေးကူညီခြင်း၊ စာရင်းမှတ်တမ်းများပေးသွင်းပေးခြင်းနဲ့ အခြားလိုအပ်တဲ့ အကူအညီတွေဆောင်ရွက်ပေးနေကြပါတယ်။

ကြက်ခြေနီ အခြေခံမူ(၇)ချက်နဲ့အညီ အများအကျိုးအတွက် တာဝန်ထမ်းဆောင်ပေးနေကြတဲ့ ကျွန်ုပ်တို့ရဲ့ ကြက်ခြေနီစေတနာလုပ်အားရှင်တွေက မြန်မာနိုင်ငံကြက်ခြေနီအသင်းရဲ့ ရည်ရွယ်ချက်ဖြစ်တဲ့ ရပ်ရွာလူထုခံစားနေရတဲ့ဆင်းရဲဒုက္ခလျော့ပါးသက်သာစေရန်အတွက် သာမန်အခြေအနေတွေမှာသာမကဘဲ အရေးပေါ်အခြေအနေတွေနဲ့ ဘေးအန္တရာယ်ကျရောက်လာတဲ့အချိန်တိုင်း အစောဆုံးတုံ့ပြန်ဆောင်ရွက်ပေးသူတွေအဖြစ် ကျရာနေရာကနေ တတ်စွမ်းသရွေ့ကူညီဆောင်ရွက်ပေးလျက်ရှိနေကြပါတယ်။

၂၀၂၂ ခုနှစ်၊ ဇွန်လ (၂၇) ရက်နေ့က ကရင်ပြည်နယ်၊ မြဝတီမြို့နယ် သောင်ရင်းမြစ်ကမ်းနှင့်ခွန်ဆာဝင်း သောင်ရင်းဘောကွင်းတို့တွင် သဘာဝဘေးအန္တရာယ်ကြိုတင်ကာကွယ်ရေး ရေဘေးအန္တရာယ်သဏ္ဍာန်တူဇာတ်တိုက်လေ့ကျင့်ခြင်းများကို ဆောင်ရွက်ခဲ့ကြပါသည်။

မြဝတီမြို့နယ်မှ ကြက်ခြေနီစေတနာလုပ်အားရှင်များ၊ လူမှုရေးအသင်းအဖွဲ့များ၊ ပရဟိတအဖွဲ့များ၊ မြဝတီမြို့ပေါ်မှပြည်သူများနှင့် သက်ဆိုင်ရာတာဝန်ရှိသူများက ဇာတ်တိုက်လေ့ကျင့်ခြင်းများကို ပါဝင်ဆောင်ရွက်ခဲ့ကြပါသည်။

ရေကြီးရေလျှံမှုအန္တရာယ်များနှင့်ကြုံတွေ့လာရပါက စနစ်တကျ တုန့်ပြန်ဆောင်ရွက်နိုင်ရန် အဆိုပါသဏ္ဍာန်တူလေ့ကျင့်ခြင်းများကို ပြုလုပ်ခဲ့ပြီး ရေဘေးအန္တရာယ်အသိပညာပေးနှိုးဆော်ခြင်း၊ ရေနစ်သူများအား ကူညီကယ်ဆယ်ခြင်းနှင့် ရှေးဦးပြုစုခြင်း၊ ကျန်းမာရေးဌာနသို့ ညွှန်းပို့ခြင်း၊ စာရင်းမှတ်တမ်းကောက်ယူခြင်း၊ ရေဘေးသင့်ပြည်သူများအား ယာယီကယ်ဆယ်ရေးစခန်းများဆီသို့ ပို့ဆောင်ကူညီခြင်းတို့ကို ဆောင်ရွက်ခဲ့ကြပါသည်။