မုဒုံ၊ ဩဂုတ်လ ၉ မုဒုံမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များ ပြုလုပ်ထားသော ခြေနင်းလက်ဆေးစင်နှင့် ခြေနင်းအမှိုက်ပုံးများကို ကော့ခလွယ်ကျေးရွာရှိ အခြေခံပညာမူလတန်းလွန်ကျောင်းမှ ဆရာ/ဆရာမများနှင့် ကျောင်းသား/သူများ အသုံးပြုနိုင်ရန် မုဒုံမြို့နယ်ကြက်ခြေနီအသင်းခွဲမှ ဒုတိယမြို့နယ်တပ်ဖွဲ့မှူးဦးဆောင်သော ကြက်ခြေနီစေတနာ လုပ်အားရှင်များက ၂၀၂၀ပြည့်နှစ်၊ ဩဂုတ်လ ၉ရက်နေ့က သွားရောက်ထောက်ပံ့ခဲ့ပါသည်။

၂၀၂၀ ပြည့်နှစ် သြဂုတ်လ ၂ ရက်နေ့ နံနက် ၉ နာရီက ရှမ်းပြည်နယ် (အရှေ့ပိုင်း) ကျိုင်းတုံမြို့နယ်ကြက်ခြေနီအသင်းခွဲမှ မြို့နယ်ကြက်ခြေနီတပ်ဖွဲ့မှူး ဦးရန်နိုင်နှင့် ဦးကောင်းခန့်တို့သည် ကျိုင်းတုံခရိုင်ဥပဒေရုံးရှိ ရှမ်းပြည်နယ်မဲဆန္ဒနယ်အမှတ်(၂)၌ ပြုလုပ်သည့် တရားလွှတ်တော်ရှေ့နေများကောင်စီ ရွေးကောက်ပွဲအတွက် ဆန္ဒမဲလာရောက်ပေးကြသည့် တရားလွှတ်တော်ရှေ့နေများကို ကိုဗစ်-၁၉ ရောဂါကာကွယ်ရေးအတွက် ကိုယ်အပူချိန်တိုင်းပေးခြင်း ဆောင်ရွက်ခဲ့ကြပါသည်။

မိုင်းရှူး၊ ဇူလိုင် ၂၉ ၂၀၂၀ပြည့်နှစ်၊ ဇူလိုင်လ ၂၉ ရက်နေ့က ရှမ်းပြည်နယ် (တောင်ပိုင်း) မိုင်းရှူးမြို့နယ်အတွင်းရှိ နားနမ့်ရွာ၊ ပါကော်ရွာ၊ ဝမ်လီရွာများနှင့် မိုင်းစံမြို့ရှိ ရပ်ကွက်များမှ အခြေခံလူတန်းစား အိမ်ထောင်စု(၂၃)စုအား နိုင်ငံတော်က စားနပ်ရိက္ခာထောက်ပံ့မှုများအား ရပ်ကွက်အသီးသီးရှိအုပ်ချုပ်ရေးမှူးရုံးများတွင် ထောက်ပံ့ပေးအပ်ရာ မိုင်းရှူးမြို့နယ်ကြက်ခြေနီအသင်းခွဲမှ ကြက်ခြေနီတပ်ဖွဲ့မှူးဦးစိုင်းစိုးထွန်း ဦးဆောင်သော ကြက်ခြေနီစေတနာလုပ်အားရှင် ၃ ဦးက ထောက်ပံ့ပေးအပ်ခြင်းများနှင့် နှာခေါင်းစည်းများ ဖြန့်ဝေရာတွင် သက်ဆိုင်ရာအဖွဲ့အစည်းအသီးသီးနှင့် ပူးပေါင်းဆောင်ရွက်ခဲ့ပါသည်။

တာချီလိတ်၊ ဇူလိုင်၂၀ ရက်

၂၀၂၀ပြည့်နှစ် ဇူလိုင်လ၂၀ရက်နေ့က ထိုင်းနိုင်ငံ၊ အမှတ်((၂)ချစ်ကြည်ရေးတံတားမှ ရှမ်းပြည်နယ်အရှေ့ပိုင်း၊ တာချီလိတ်မြို့သို့ ပြန်လည်ဝင်ရောက်လာကြသော နေရပ်ပြန်ပြည်သူ ၅၈ဦးအား တာချီလိတ်မြို့နယ်ကြက်ခြေနီအသင်းခွဲဥက္ကဌ ဦးမြင့်သိန်းနှင့် ကြက်ခြေနီစေတနာလုပ်အားရှင်၄ဦးတို့သည် COVID-19ရောဂါကာကွယ်ရေးအသိပညာပေးခြင်း၊ ကိုယ်အပူချိန်တိုင်းပေးခြင်း၊ စိတ်ပိုင်းလူမှုပိုင်းဆိုင်ရာအားပေးကူညီခြင်းတို့ကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းကူညီဆောင်ရွက်ပေးခဲ့ကြပါသည်။

မြစ်သား၊ ဇူလိုင် ၁၈

မန္တလေးတိုင်းဒေသကြီး မြစ်သားမြို့နယ်တွင် COVID-19ရောဂါ ကာကွယ်ရေးလုပ်ငန်းများကို ဆောင်ရွက်နေကြသော မြစ်သားမြို့နယ် ကြက်ခြေနီစေတနာလုပ်အားရှင်များအား ဂုဏ်ပြုပွဲကို ၂၀၂၀ပြည့်နှစ်၊ ဇူလိုင်လ ၁၈ ရက်နေ့ နံက်၁၀နာရီအချိန်က လုပ်အားကြေးမုံခန်းမတွင်ကျင်းပရာ တိုင်းဒေသကြီးလွှတ်တော်ကိုယ်စားလှယ်များ၊ မြို့နယ်အထွေထွေအုပ်ချုပ်ရေးဦးစီးဌာန၊မြို့နယ်ပြည်သူ့ကျန်းမာရေးဦးစီးဌာန တို့မှတာဝန်ရှိသူများ၊ ကျောက်ဆည်ခရိုင် ဒုတိယခရိုင်ကြက်ခြေနီတပ်ဖွဲ့မှူးဒေါ်နွဲ့နွဲ့ထွေးနှင့်တပ်ဖွဲ့ဝင်များ၊ မြစ်သားမြို့နယ်ကြက်ခြေနီအသင်းခွဲကြီးကြပ်ရေးအဖွဲ့ဥက္ကဌနှင့်အဖွဲ့ဝင်များ၊ ကြက်ခြေနီစေတနာလုပ်အားရှင်များ တက်ရောက်ခဲ့ကြပါသည်။
အခမ်းအနားတွင် တိုင်းဒေသကြီးလွှတ်တော်ကိုယ်စားလှယ်မှ အမှာစကားပြောကြားပြီး COVID-19ရောဂါကာကွယ်ရေးလုပ်ငန်းများတွင် ပါဝင်ဆောင်ရွက်လျှက်ရှိကြသော မြစ်သားမြို့နယ် ကြက်ခြေနီစေတနာလုပ်အားရှင် များအား တာဝန်ရှိသူများက ဂုဏ်ပြုမှတ်တမ်းလွှာများ ပေးအပ်ခဲ့ကြောင်း သိရှိရပါသည်။

မြဝတီ၊ ဇူလိုင် ၁၇ မြဝတီခရိုင်/မြို့နယ် အစိုးရ ပါဠိပထမပြန်စာမေးပွဲကို မြဝတီမြို့ ရွှေမြင်းဝန်စေတီတော် သာ့သနာ့ဗိမာန်တော်၌ ၂၀၂၀ပြည့်နှစ်၊ ဇူလိုင်လ ၁၇ရက်နေ့က ဆက်လက်ပြုလုပ်လျက်ရှိရာ ဆရာတော်ကြီးများ၊ စာဖြေသံဃာတော်များ၊ ခရိုင်/မြို့နယ်အုပ်ချုပ်ရေးမှူးများ၊ ဌာနဆိုင်ရာတာဝန်ရှိသူများနှင့် ဘာသာရေးအသင်းအဖွဲ့များတက်ရောက်ခဲ့ရာ ကရင်ပြည်နယ်ခရိုင်ကြက်ခြေနီတပ်ဖွဲ့မှူးဦးအောင်နိုင်ဦး ဦးဆောင်သော ကြက်ခြေနီစေတနာလုပ်အားရှင် ၅ဦးက ကိုယ်အပူချိန်တိုင်းပေးခြင်း၊ နှာခေါင်းစည်းများလှူဒါန်းခြင်း၊ စနစ်တကျတပ်ဆင်ပေးခြင်း၊ ဆွမ်းဆပ်ကပ်လှူဒါန်းခြင်းနှင့် ကျန်းမာရေးစောင့်ရှောက်မှုများပေးခြင်းတို့ကို ဆောင်ရွက်ခဲ့သည်။ ယင်းနေ့တွင်ပင် ကရင်ပြည်နယ်ခရိုင်ကြက်ခြေနီတပ်ဖွဲ့မှူးနှင့် ကြက်ခြေနီတပ်စုမှူးဦးမင်းမင်းစိုး ဦးဆောင်သော ကြက်ခြေနီစေတနာလုပ်အားရှင် ၆ ဦးသည် COVID-19 ရောဂါကာကွယ်တားဆီးရေးလုပ်ငန်းများအဖြစ်မြဝတီအမှတ်(၂)ချစ်ကြည်ရေးတံတား Cargo Gateတွင် ထိုင်းနိုင်ငံမှ မြန်မာနိုင်ငံအတွင်းသို့ဝင်ရောက်လာသည့် ကုန်တင်ကားများနှင့် ယာဉ်ပေါ်ပါလာသူများအား ကိုယ်အပူချိန်တိုင်းခြင်း၊ စာရင်းသွင်းခြင်း၊ သတင်းပေးပို့ခြင်း၊ Health Checked လက်မှတ်ထုတ်ပေးခြင်းများကို ဆောင်ရွက်ပေးခဲ့ပါသည်။

ဟားခါး၊ ဇူလှိုင် ၁၇ ဟားခါးမြို့နယ်ကြက်ခြေနီတပ်စုမှူးဒေါ်သဇင်သိန်းနှင့် ကြက်ခြေနီစေတနာလုပ်အားရှင်များသည် ချင်းပြည်နယ်၊ ဟားခါးမြို့နယ်ရှိ GTI ကျောင်းဝင်းအတွင်းဖွင့်ထားသော အသွားအလာကန့်သတ်စောင့်ကြည့်ရေးစခန်းများတွင် လက်သန့်စင်ဆေးရည်များ၊ မျက်နှာသုတ်ပဝါများ၊ ရေသန့်ဘူးများ၊ သွားတိုက်တံများ၊ ဆပ်ပြာခဲများ စသည့်အသုံးအဆောင်ပစ္စည်းများလှူဒါန်းခဲ့ပြီး COVID-19ရောဂါကာကွယ်ရေးအသိပညာပေး လက်ကမ်းစာစောင်များနှင့် ပိုစတာများအား ၂၀၂၀ပြည့်နှစ် ဇူလိုင်လ ၁၇ရက်နေ့က ထောက်ပံ့ပေးအပ်ခဲ့ပါသည်။

ကျောက်တံခါး၊ ဇူလိုင် ၁၆ ကျောက်တံခါးမြို့နယ်ကြက်ခြေနီတပ်ဖွဲ့မှူးနှင့် ကြက်ခြေနီစေတနာလုပ်အားရှင် ၄ဦးတို့သည် ပဲခူးတိုင်းဒေသကြီး၊ ကျောက်တံခါးမြို့နယ်တွင် ပါဠိပထမပြန်စာမေးပွဲဖြေဆိုမည့် သံဃာတော်များအား COVID-19 ရောဂါကာကွယ်ရေးအသိပညာပေးခြင်း၊ နှာခေါင်းစည်းများပေးဝေခြင်း၊ အပူချိန်တိုင်းပေးခြင်းနှင့် ရှေးဦးပြုစုခြင်းကျန်းမာရေးစောင့်ရှောက်မှုပေးခြင်းတို့ကို ၂၀၂၀ပြည့်နှစ် ဇူလိုင်လ ၁၅ရက်နေ့မှ ၂၂ရက်နေ့အထိ မြို့နယ်ပြည်သူ့ကျန်းမာရေးဦးစီးဌာနမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။