COVID-19ရောဂါကာကွယ်ရေးအတွက် နိုင်ငံအနှံ့ နေရာတိုင်းမှာ အရင်ကထက် အရှိန်အဟုန်မြှင့်ပြီးလုပ်ဆောင်နေရာ မန္တလေးတိုင်းဒေသကြီး မိုးကုတ်မြို့နယ် လူငယ်ကြက်‌ခြေနီကော်မတီက ဦးဆောင်ပြီး ၂၀၂၀ပြည့်နှစ်အောက်တိုဘာလ ၄ ရက်နေ့က မိုးကုတ်အရှေ့ပိုင်းနဲ့ အနောက်ပိုင်းတို့မှာ နှာခေါင်းစည်း ၃၀၀၀ ကို ပေးဝေခဲ့ကြပါတယ်။ လူငယ်ကြက်‌ခြေနီကော်မတီဝင်များ၊ ကြက်ခြေနီစေတနာလုပ်အားရှင်များ စုစုပေါင်း ၂၇ဦး တို့ပါဝင်လှုပ်ရှားခဲ့ပြီး လူငယ်ကြက်‌ခြေနီကော်မတီခေါင်းဆောင် မဖြူစင်မေနှင့် ဒုတိယခေါင်းဆောင် ကိုဟိန်းထက်ဇော်တို့က ဦးဆောင်ခဲ့ ပါတယ်။ မြို့နယ်စည်ပင်သာယာရေးကော်မတီဥက္ကဌ ဦးဝင်းတင့်မှနေ့လည်စာ ထမင်းဘူးနဲ့ ဖျော်ရည်၊ ဦးအောင်မြင့်အေး+ဒေါ်သဲဆုထွေးမိသားစုတို့က ခေါက်ဆွဲကျွေးခဲ့ပြီး ကျပ်ပြင်မှ ဆရာမဒေါ်လှလှဝင်းမိသားစု (ဝင်းကျောက်မျက်ရတနာ)က Pocari Sweat ၂ ကတ်နဲ့ နှာခေါင်းစည်း ၃ဘူး လှူဒါန်းခဲ့ကြသည်။

၂၀၂၀ ပြည့်နှစ်၊ အောက်တိုဘာလ ၄ ရက်နေ့က မွန်ပြည်နယ်ကြက်ခြေနီကြီးကြပ်မှုကော်မတီဥက္ကဌ ဦးချိုမင်းလင်းနှင့် ပြည်နယ်တပ်ဖွဲ့မှူး ဦးကျော်မြင့်တို့က မွန်ပြည်နယ်ရှိ မြို့နယ် ၁၀ မြို့နယ်မှ COVID-19 ရောဂါကာကွယ်ရေးလုပ်ငန်းများတွင် စွမ်းစွမ်းတမံ ဆောင်ရွက်နေကြသော ကြက်ခြေနီစေတနာလုပ်အားရှင်များအား အခြေခံစားသုံးကုန်များ (ဆန်၊ ဆီ၊ ဆား၊ ကြက်သွန်၊ အာလူး)၊ အသင်းအမှတ်တံဆိပ်ပါ အင်္ကျီနှင့် ဦးထုပ်၊ လက်သန့်ဆေးရည်နှင့် နှာခေါင်းစည်းများကို ထောက်ပံ့ပေးခဲ့ပါသည်။ ထို့နောက် ကြက်ခြေနီစေတနာလုပ်အားရှင်များကို ချီးကျူးဂုဏ်ပြုစကား ပြောကြားပြီး လိုအပ်ချက်များအား လမ်းညွှန်ပြောကြားခဲ့ကြသည်။

ကရင်ပြည်နယ်၊ မြဝတီမြို့နယ်၊ သင်္ကန်းညီနောင်ကျေးရွာ၊ သဘာဝရိပ်သာ အသွားအလာကန့်သတ်‌စောင့်ကြည့်စခန်းရှိ ထိုင်းနိုင်ငံ၌ အကြောင်းအမျိုးမျိုးကြောင့် ပြစ်ဒဏ်ခံရပြီး ပြန်လည်လွတ်မြောက်လာသည့် နေရပ်ပြန်ပြည်သူ ကျား (၂၀)၊ မ (၅) ဦးတို့အား ခရီးစရိတ်၊ စားစရိတ်၊ အဝတ်အထည်၊ အမျိုးသမီးတစ်ကိုယ်ရည်သုံးပစ္စည်းနှင့် အမျိုးသားတစ်ကိုယ်ရည်သုံးပစ္စည်းများကို မြန်မာနိုင်ငံကြက်ခြေနီအသင်း၊ မြဝတီမြို့နယ်ကြက်ခြေနီအသင်းခွဲမှ မြို့နယ်တပ်ဖွဲ့မှူး ဦးအောင်သွင်ဦး ဦးဆောင်သော ကြက်ခြေနီစေတနာလုပ်အားရှင် (၇) ဦးတို့က ၂၀၂၀ ပြည့်နှစ်၊ အောက်တိုဘာ ၄ ရက်နေ့တွင် ကူညီထောက်ပံ့ခဲ့ကြသည်။

၂၀၂၀ပြည့်နှစ်၊ အောက်တိုဘာလ ၃ ရက်နေ့တွင် ဧရာဝတီတိုင်းဒေသကြီး ကျိုက်လတ်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် ၈ ဦးတို့သည် အနောက်ပိုင်းလှည်းဆိပ်ဈေး၊ မြို့မဈေးကြီး၊ အရှေ့ပိုင်းအောက်ရွာလေးစျေး၊ အမှတ်(၁)ရပ်ကွက်များ၌ လည်းကောင်း၊ အောက်တိုဘာလ ၄ ရက်နေ့တွင် မြို့နယ်ကြက်ခြေနီအသင်းခွဲ မြို့နယ်ကြက်ခြေနီတပ်ဖွဲ့မှ ဒုတိယမြို့နယ်ကြက်‌ခြေနီတပ်ဖွဲ့မှူးဦးခင်စိုး ဦးဆောင်သည့် ကြက်ခြေနီစေတနာလုပ်အားရှင် ၇ဦးတို့သည် မြို့မဈေးကြီးနှင့်အမှတ်(၅)ရပ်ကွက်တို့တွင်လည်း‌ကောင်း COVID-19 ရောဂါကာကွယ်ရေး အသိပညာပေးနှိုးဆော်ခြင်း၊ နှာခေါင်းစည်းများပေးဝေခြင်း ၊ လက်သန့်ဆေးရည်ဖြင့် လက်ဆေးစေခြင်းများကို‌ ပြုလုပ်ခဲ့ကြသည်။

၂၀၂၀ပြည့်နှစ်၊ အောက်တိုဘာလ ၃ ရက်နေ့က ကရင်ပြည်နယ်၊ သံတောင်ကြီးမြို့နယ်၊ သံတောင်မြို့အဝင်ဂိတ်တွင် ခရီးသည်များအား COVID-19 ရောဂါကာကွယ်ရေး လမ်းညွှန်ချက်များ အသိပညာပေးနှိုးဆော်ခြင်း၊ ကိုယ်အပူချိန်တိုင်းတာပေးခြင်းနှင့် အမည်စာရင်းများကောက်ယူခြင်းတို့ကို သံတောင်ကြီးမြို့နယ် ကြက်ခြေနီအသင်းခွဲမှ တပ်ခွဲမှူး ဦးစောခင်မောင်ဆန်း ဦးဆောင်သော ကြက်ခြေနီစေတနာလုပ်အားရှင် ၄ ဦးတို့က ဌာနဆိုင်ရာများမှ တာဝန်ရှိသူများနှင့် ပူပေါင်းဆောင်ရွက်ခဲ့ကြသည်။

ကရင်ပြည်နယ်၊ ဘားအံမြို့၊ အမှတ် (၃) ရပ်ကွက်အုပ်ချုပ်ရေးမှူးရုံးရှေ့တွင် COVID-19 ရောဂါကာကွယ်ရေးအဖြစ် ရောဂါကာကွယ်ရေးလမ်းညွှန်ချက်များအား အသိပညာပေးနှိုးဆော်ခြင်း၊ နှာခေါင်းစည်းများအခမဲ့ဖြန့်ဝေခြင်း၊ ရေမလိုလက်သန့်ဆေးရည်များဖြန့်ဝေခြင်းနှင့် စနစ်တကျလက်ဆေးခြင်းအား သရုပ်ပြသခြင်းတို့ကို ဘားအံမြို့နယ်ကြက်ခြေနီအသင်းခွဲမှ ဒုတိယမြို့နယ်တပ်ဖွဲမှူး ဒေါ်တင်မာနွယ် ဦးဆောင်သော ကြက်ခြေနီစေတနာလုပ်အားရှင် ၁၂ ဦးတို့က ၂၀၂၀ပြည့်နှစ်၊ အောက်တိုဘာလ ၂ ရက်နေ့က ပြုလုပ်ခဲ့ကြသည်။

၂၀၂၀ပြည့်နှစ် အောက်တိုဘာလ ၂ရက်နေ့က ရခိုင်ပြည်နယ်၊ ဘူးသီးတောင်မြို့ မြိုသစ် အခြေခံပညာအလယ်တန်း(ကျောင်းခွဲ)တွင် ကိုဗစ်-၁၉ စောင့်ကြည့်ရေးစင်တာပြုလုပ်ထားရှိမည်ဖြစ်သဖြင့် အိပ်ရာကုတင်များတပ်ဆင်ခြင်း၊ အသုံးအဆောင်များထားရှိပေးခြင်း၊ အိမ်သာများဆောက်လုပ်ခြင်း၊ ရေချိုးမည့်ရေကန်များ ဆောက်လုပ်ခြင်း၊ သန့်ရှင်းရေးလုပ်ငန်းများဆောင်ရွက်ခြင်းများကို ဘူးသီးတောင်မြို့နယ် ကြက်ခြေနီတပ်ဖွဲ့မှူး ဉီးကျော်မြင့်ဝေ ဉီးဆောင်သော ကြက်ခြေနီစေတနာလုပ်အားရှင်များက ဆောင်ရွက်ခဲ့ကြသည်။ ထို့ပြင် ဘူးသီးတောင်ကြက်ခြေနီ စေတနာလုပ်အားရှင်များက တိုက်ပွဲရှောင်စခန်းများတွင်လည်း ကိုဗစ်-၁၉ ရောဂါကာကွယ်ရေးအသိပညာပေးခြင်း၊ လိုက်နာဆောင်ရွက်ရမည့်အချက်များအားနှိုးဆော်ခြင်း၊ နှာခေါင်းစည်းများအခမဲ့ပေးဝေခြင်း ဝတ်ဆင်အသုံးပြုစေခြင်းတို့ကို ဆောင်ရွက်ခဲ့ကြသည်။

၂၀၂၀ပြည့်နှစ် အောက်တိုဘာလ ၂ရက်နေ့က ရှမ်းပြည်နယ်အရှေ့ပိုင်း၊ တာချီလိတ်မြို့နယ်ရှိ မိုးကုတ်ဝိပဿနာဓမ္မရိပ်သာတွင် ဖွင့်ထားသောအသွားအလာကန့်သတ်စောင့်ကြည့်ရေးစခန်းသို့ ရောက်ရှိလာသည့် နေရပ်ပြန်ပြည်သူ ၁၀၀ဦးအား တာချီလိတ်ခရိုင်ကြက်ခြေနီတပ်ဖွဲ့မှူးနှင့် တာချီလိတ်မြို့နယ်ကြက်ခြေနီတပ်ဖွဲ့မှူး ဦးဆောင်သော ကြက်ခြေနီစေတနာလုပ်အားရှင်များက စိတ်ပိုင်းဆိုင်ရာအားပေးကူညီမှုများပြုလုပ်ပေးခဲ့ပြီး ကိုဗစ်၁၉ရောဂါကာကွယ်ရေးအသိပညာပေးခြင်း၊ လိုက်နာဆောင်ရွက်ရမည့်အချက်များအားတိုက်တွန်းနှိုးဆော်ခြင်း၊ အမျိုးသမီးတစ်ကိုယ်ရည်သုံးပစ္စည်းနှင့် အမျိုးသားတစ်ကိုယ်ရည်သုံးပစ္စည်းများ၊ ခြင်ထောင်များ စသည့်အသုံးအဆောင်ပစ္စည်းများ ထောက်ပံ့ပေးအပ်ခြင်းတို့ကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။

၂၀၂၀ ပြည့်နှစ်၊ အောက်တိုဘာလ ၂ ရက်နေ့က မွန်ပြည်နယ်၊ ချောင်းဆုံမြို့နယ်တွင် ဆရာတော်ကြီးများက ဘေးအန္တရာယ်ကင်း ပရိတ်တရားတော်များအား လှည့်လည်ရွတ်ဖတ်ပူဇော်ရာတွင် ချောင်းဆုံမြို့နယ်ကြက်ခြေနီအသင်းခွဲဥက္ကဌ ဦးတင်လှိုင်ဦး ဦးဆောင်သော ကြက်ခြေနီစေတနာလုပ်အားရှင် (၈) ဦးတို့က လိုက်ပါ၍ ကျန်းမာရေးစောင့်ရှောက်မှုပေးခဲ့ကြသည်။ ထို့အပြင် အထူးရဲသင်တန်းဖွင့်ပွဲတွင် လိုအပ်သော ကျန်းမာရေးစောင့်ရှောက်မှုပေးခြင်းနှင့် COVID-19 ရောဂါ ကာကွယ်ရေးအတွက် နှာခေါင်းစည်းများ ဖြန့်ဝေပေးခဲ့ကြသည်။