၂၀၂၁ ခုနှစ် မေလ ၈ရက်နေ့က ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့ ကြက်ခြေနီအသင်းခွဲငယ်မှ ကြက်ခြေနီစေတနာလုပ်အားရှင်များက ကိုဗစ်-၁၉ ရောဂါ ကူးစက်မှုများအား ကြိုတင်ကာကွယ်နိုင်ရန်အတွက် မြို့တွင်းလူစည်ကားသောနေရာများနှင့် ရပ်ကွက်များတွင် ကျန်းမာရေးအသိပညာပေးခြင်း၊ ရေမလိုလက်သန့်ဆေးရည်ဖြင့်လက်ဆေးစေခြင်းနှင့် နှာခေါင်းစည်းများ စနစ်တကျတပ်ဆင်အသုံးပြုကြရန်နှိုးဆော်ခြင်းတို့ကို ဆောင်ရွက်လျှက်ရှိပါသည်။

၂၀၂၁ခုနှစ်၊ မေလ(၈)ရက်နေ့ နံနက်ပိုင်းက မွန်ပြည်နယ် မုဒုံမြို့နယ်ကြက်ခြေနီတပ်ဖွဲ့မှူးနှင့်ကြက်ခြေနီစေတနာလုပ်အားရှင်များသည် မော်လမြိုင်မြို့သို့သွားရာတွင် လမ်းခရီး၌ ဆိုင်ကယ်မ‌ေတာ်တဆဖြစ်မှုကြောင့် ထိခိုက်ဒဏ်ရာရသူကို တွေ့ရသဖြင့် ရှေးဦးပြုစုပေးခဲ့ကြပါတယ်။

၂၀၂၁ခုနှစ်၊ မေလ(၈)ရက်နေ့က တနင်္သာရီတိုင်းဒေသကြီး မြိတ်မြို့နယ်ကြက်ခြေနီသူနာပြုတပ်ဖွဲ့မှ ကမ္ဘာ့ကြက်ခြေနီနေ့အထိမ်းအမှတ် ရှေးဦးပြုစုခြင်းစွမ်းရည်ပြိုင်ပွဲကို မြို့နယ်ကြက်ခြေနီအသင်းခွဲရုံးမှာ ပြုလုပ်ခဲ့ပါတယ်။

၂၀၂၁ခုနှစ်၊ မေလ(၈)ရက်နေ့က ရခိုင်ပြည်နယ်၊ ကျောက်တော်မြို့နယ်ကြက်ခြေနီသူနာပြုတပ်ဖွဲ့မှ တပ်စုမှူး ဦးခိုင်စိုးမင်းသည် မြို့နယ်ပြည်သူ့ဆေးရုံ၌ အရေးပေါ်လိုအပ်နေသော (B)သွေးတစ်လုံးကို ကမ္ဘာ့ကြက်ခြေနီနေ့အထိမ်းအမှတ်အဖြစ် သွားရောက်လှူဒါန်းခဲ့ပါတယ်။